Read Apatani METHU 9 Bible Online

METHU 9 - Apatani bible

METHU 9

¹ Ho huluho chakula mo pache dalyiho botii ho mohka atoh citi ho ahtii.

² Ho kato, mohlu lukuñnii kone Jisu mi jolii bitii, mohka dotananii ho giila dopa; ho Jisu mohluka henje mi kappa lala mo lutii lukuñ bomi, “Haroto, ngiika oho; niika ingyamiigya atañmi hello bitiike.”

³Ho kato, pagenii tonge mohlu lusutii, “siika miyu si Pinii mi nipakoyada.”

⁴Hojalo Jisu, chimbii tola mohluka heniiñmi lutii, “niimpa nunu ayamanii drih hendu nunuka ahha ho?

⁵Niihpe lupyo yakiñ donii, hiila luniiñ peha, nunuka ingyamiigya mi hello bitiiku, malo hiila luniiñ peha, ‘gurito ho into’?

⁶Hojalo nunu chinto diike miyu ka Oho ko kiiddiapiñ daka ingyamiigya mi hello nanii otority giido hiila” ho mo lutii lukuñ bomi “Gurito, niika dotananii mi biikula ho ude ho ingeku.”

⁷Ho mo guritii ho udeho intiiku.

⁸Hiimi miyuabuje danii atañ kappa lala, mohlu biisotii, ho mohlu Pinii mi assañtii, huna siika otority mi siika miyu mi bitiinii.

⁹ Hiiko hokii Jisu impo biila dokele, mo miyu kone kappatii Methu hiiniiñ bomi, biijokajo ude ho dupa; ho mo mohmi lutii, “Ngiika kiiliñho imboto.” Ho mo guritii ho mohmi imbo montii.

¹⁰Ho mo ude ho diitananiiho dukele, kato, abuje biijokajo myanii atañ ho ingyamiigyanii atañ ahtii ho Jisu la mohka henjeajiñ atañ agiñho dubotii.

¹¹Ho Parisi atañ hiimi kappa lala, mohlu lutii mohka henjeajiñ atañmi, Niimpa nunuka tonsḛrbo biijokajo myanii la ingyamiigya atañ agiñho diibola du?

¹²Hojalo mo hiimi tapa lala, mo lutii, “Huna dasḛr donii hii datḛr mi anna make, hojalo huna achih-ahe donii hiike.

¹³ Inge ho chingii siikasi nii hiisa niimipe, ‘Ngo aroh ke anna donii, ho membi niimi make.’ Niimpalukoda Ngo denki atañmi gyopa ahma ke, hojalo ingyamiigyanii atañ mike.”

¹⁴ Ho Jon ka henjeajiñ atañ mohko ahtii, lubiidola, “Niimpape ngunu la Parisi atañ nyodu, hojalo niika henjeajiñ atañ nyoma nii?”

¹⁵Ho Jisu mohlumi lutii, “mihie millo lasu lyiho hoka nyibo ahnii atañ heru lakiñ dopeha mihie lasabo mohluka agiñho durañ pa? Myodu ahkiñ doke, niidana mihie lasa bomi mohluka agiñ hokii ira giichinii, ho mohlu nyola kendo.

¹⁶Ho kone hetḛr pulye niti mi pulye khu ho palyi liikiñma, palyi liido koda hii sarche linkiñdo, ho uro yapaya ubu kendo.

¹⁷Roalha ajañ mitrḛ dije khu ho hiliima; hilii dokoda, dije mi buche giikiñdo, ho roalha bipa kendo, ho dije tiirḛ ayakema; hojalopa roalha ajañ mi dije niti hosu hilii sudunii, ho anye rumi atii tiikañ lado.”

¹⁸ Hiila mohka mohlumi lula doho, kato, sangiinii kone ahtii ho mohka hataho liibañ khangatii, lubiidola, “Ngiika nyimii wiinga siisida shiihine; hojalo ahla ho niika alah mohmi tenka tope, ho mo turi kendoke.”

¹⁹Ho Jisu guritii ho mohmi imbo montii, mohka henjeajiñ atañ agiñho.

²⁰ Ho kato, annii akha kone achihla, ai aha ila nyalyañ hela nyanye donii mohka kiiliñho ahtii ho mohka pulye nyatañmi tenetii;

²¹niimpalukoda mo atoh atoh lusutii, “Ngo matiirḛ mohka pulye mijalo tene dokoda, Ngiimi hempyo dopa miikiñdo.”

²² Jisu kakutii, ho mohmi kadi lala mo lutii, “Haroto, wiinga; niika henjeke niimi hempyo giinenii.” Ho ohepada annii akha mi hempyo dopa miitii.

²³Ho Jisu sangii niika udeho ahchi biikele, ho ellu bennii atañmi kappatii, ho miyu danii atañka rukha adu-abiñ niimi tapatii,

²⁴mo lutii, “Insato; niimpalukoda nyimiisi shiimake hojalo imilasuke donii.” Ho mohlu mohmi ngarpatii.

²⁵Hojalo miyu danii atañmi agoho nempa lilala, mo ura ahtii ho alah gala lala seritii, ho hiika nyimii guritii.

²⁶Ho siika lyinii siimi hikha hiika gandachie ho tapa tatii patii.

²⁷ Ho Jisu hiiko hokii impo biikele, michanii anye mohmi imbo montii, hempḛr goropa gyutii, “Ngiinyi mi arohpe, David ka Oho.”

²⁸Mo ude ho ahkukiile, micha anye mohko ahtii; ho Jisu lutii mo anyemi, “Niinyi henjeduha Ngo siimi miila kendo hiila?” Mo anye mohmi lutii, “Ḛh, Attoh.”

²⁹Ho mo tenetii mo anyeka ameeho, lubiidola, “Niinyi ka henjenii chulipa lyibi tope niinyipa.”

³⁰Ho mo anyeka amee kappa tiiku. Ho Jisu hempḛr uropa lutiñtii mo anyemi, “tageto kone mitrḛ siimi chinke neyo.”

³¹Hojalo mo anye ago lintiiku ho mohka tatukatu mi hikha gandachie ho lukotii.

³² Mo anye ka ira dane kuho, kato, luha igii jarpiñ konii mohko ahgiitii.

³³Ho igiimi mompa linku kiile, hiika luha miyu luri tiiku; ho miyuatañ hemur nyatii, lunyado, “Ronge hetḛr sichuli Isrel ho kappa kakama.”

³⁴Hojalo Parisi atañ lutii, “Mo igii atañmi igii rato losu mompa limbii siinenii.”

³⁵ Ho Jisu hikha citi ho lembaho intii, tonsḛrla mohluka sinagog ho, ho raddeganda ka ayapuyumi tonsḛr khenyotii, ho kapane achih-ahe ho herumyanka mi miipya bitii.

³⁶ Mo miyu abujemi kappa lala, mo mohlupa aroh giitii, niimpalukoda mohlu henga henkha la arohkapatii, subuñ ka subuñsornii nyima niihtañ.

³⁷ Ho mo lutii mohka henjeajiñ atañmi, “Amoo lasanii abudo, hojalo amoo pinii ichesii;

³⁸hopa kuto Attoh mi amoolanii abuje kiiniñ kiine dupa mohka amoo lasako.”