Read Apatani MAK 11 Bible Online

MAK 11 - Apatani bible

MAK 11

¹ Ho mohlu Jerusalem ahchi talyi kula, Betpage la Betany ho, Olives putoo ho, mo mohka henjeajiñ anye mi kiiniñ biido,

²ho mohlumi lutii, Nunuka lemba pache dalyiho inge, ho nunu ahchi dalyi, nunu gadoh dore mimika baka banii, rañtola dopa kappa kendoke, hiimi tapyabii ho seliibii.

³Nunumi matiirḛ mi lulyi milo, Niimpa nunu sitañpa miidu? lutolya, Attoh siimi anna do ho ohepada siimi ngunu nengku liichi kuke.

⁴ Ho mohlu intiiku, ho gadoh dore mi lyego ho ahchi dakele lengo ho rañtola dapa kappa biido, ho mohlu hiimi tapyatii.

⁵Ho hoka baritola danii atañ mohlumi lutii, “Nunu niihna miidunii, gadoh mi tapya lamasa donii?”

⁶Mohlu lusitii Jisu ka mohlumi lunge luniiñ jaho, ho miyuatañ mohlumi inke nentiiku.

⁷ Ho mohlu gadoh mi Jisu ko bolii bitii, ho mohluka pulye-tarii mi hiika ayoh ho pyuchatii; ho mo hiika ayoh ho dutii.

⁸Ho abuje mohluka pulye-tarii mi lembo ho apyu bibiido, ho tangenii annii giinii halloh mi pyubi biido mohluka aji hokii ka pato laka atii niimi.

⁹ Ho hoka impyo nii atañ ho kami hoka imbo monii atañ gyunyatii, “Hosana! Hiika miyu hii lyanko kendo huna Pinii armyañ pa ahtiinii!

¹⁰Lyanko kendo ngunuka aba David ka raddeganda ahlyiniisi! ayohjaho ho Hosana!”

¹¹ Ho mo Jerusalem ho ahtii, ho piniiude ura ho ahtii; ho kappa nehemi kahi kaso tela, myodu pahii tiikunii, mo linkula Betany ho intii alyañlenye ka agiñho.

¹² Allo lonye niiho, mohlu Betany hokii ahkur bukula, mo apiñ hayatii.

¹³Ho katula tarro sannii ka annii mi kappa lala, mo ahhila kaka tii hiiko hang diisa kappa tama siiyuha hiila. Mo hiiko ahchi biikele, mo hang kappa matii hojalo annii kontiisii, niimpalukoda tarro ahee hidu myodu matii.

¹⁴Ho mo lutii tarro sannii mi, “Kone tiirḛ niiko hokii hiira ahee diikiñ kumake ayu dahepa”. Ho mohka henjeajiñ atañ hiimi tapatii.

¹⁵ Ho mohlu Jerusalem ho ahtii. Ho mo piniiude ura ho ahtii ho hiiko hoka pyula donii atañmi piipa piiya miiritii ho hoka pyula ho riila ka danii atañ miilañmi, ho mo posa bihii bikhe siila miitaluta nanii miilañmi kuluparji miibiido ho hoka pakoo pyunii ka duta nanii miilañmi;

¹⁶ho mo kone mitrḛ piniiude ura hopa drih pachi johii jokhela miike nematii.

¹⁷Ho mo tonsḛrtii, ho mohlumi lutii, “Hiila ketola doma ehna, ‘Ngiika udesi kuko ude hiila lukiñ doke hikha supuñpa’? Hojalo nunu siimi diipyonii dukuñko miru pa biinya danii.”

¹⁸Ho siimi nyibu burii la pagenii atañ tapatii ho mohlu mohmi mempa dupa lembo metii; niimpalukoda hikha miyuatañ mohka tonsḛr niimi talala aluñ nyatii.

¹⁹ Ho alyiñdalyi ahku hangkele, mohlu ganda ka agoho lintii.

²⁰ Arokonchi ho mohlu impobiikele, mohlu tarro sannii mi liima lohe sela dupa kappatii.

²¹Ho Pitar hempa ritii ho mohmi lutii, “Atoh, kato! Niika tarro sannii mika benniihii sela duku.”

²²Ho Jisu mohlumi lusitii, Pinii mi henjeto.

²³Jije, Ngo nunumi lukoso, hujalopa siika putoo simi luchi, Sokii gusu lila ho siimie ho huha he, ho ahha ho hemmo makoda, hojalo no nii lutii hiila lyikiñdo hiila henje dokoda, hiika hii mohpa miibi kendo.

²⁴ Hopa Ngo nunumi lukoso, nunuka kuniiñ ho niijalo kuto, hiimi patiiku hiila henje dokoda, ho hii nunu kiikuke.

²⁵ “Ho nii dajalo nunu dala kuchi, helloto, nunu matiirḛ mihmi ahha bala lyido milo; niimpalukoda nunuka Aba Darii ganda hoka duniibo nunu mitrḛ nunuka ingyamiigya mi hello bikiñdoke.”[3]

²⁷ Ho hiira mohlu Jerusalem ho ahtii. Ho mo piniiude ho impa ila dokele, nyibu burii la pagenii atañ, ho amiabañ atañ mohko ahtii,

²⁸ho mohlu mohmi lutii, “Nii otority la no siika atañmi miidu, malo Hu niimi siika otority mi miidopa bitola miidu mohlumi?”

²⁹Jisu mohlumi lutii, “Ngo nunumi gonge taka talyi; ngiimi lukope, ho Ngo nunumi luko talyike nii otority la ngo siika drih siimi miidu hiila.

³⁰Jon ka baptisma laniisi darii ganda hokii peha, malo miyu kokiipeha? Lukope ngiimi.”

³¹Ho mohlu cheko chepe chesu nyatii, “Ngunu matiirḛ lukoda, ‘Darii ganda hokii,’ mo lukiñdo, ‘hokoda niimpa nunu mohmi henje nyama?’

³²Hojalopa ngunu hiila luchi peha, ‘Miyu kokii’?” mohlu miyu atañmi biiso nyatii, niimpalukoda miilañru Jon mi jije nyibuhenii hiila khiinyatii.

³³Hopa mohlu Jisu mi lusitii, “Ngunu chimma.” Ho Jisu mohlumi lutii, Hokoda ngotiirḛ nunumi luko tama nii otority la Ngo siika drih atañmi miidu hiila.