Read Apatani MAK 7 Bible Online

MAK 7 - Apatani bible

MAK 7

¹ Siika myodu so Parisi atañ mo agiñho dakuñ dapatii, pagenii tonge ka agiñho hutiina Jerusalem hokii ahnya tiinii,

²mohlu kappatii mohka henjeajiñ tange ka alah kacho laka diiniiñmi, hiika hii, mohluka alah mi yasii mapa.

³(Niimpalukoda Parisi, la hikha Jew atañ pakoda, nii dahepa mohluka alah mi yasii tama mohlu diima tama, amiabañ atañka miiju-lujju mi miila;

⁴ ho mohlu biijḛr hokii ka ahlyi kuho, mohlu hang diima tama nii dahepa mohlu hasu-yasu tama, ho abuje pongelya miiju-lujju tiirḛ mohlu miinyatii, turla mika asenii ho piichañ miilañ ho bitiepaka miilañmi.)

⁵ Ho Parisi la pagenii atañ mohmi takatii, “Niimpape niika henjeajiñ atañ amiabañ atañka miiju-lujju hiilyañ pa sanya-gyanya manii, hiila mapa alah kacho lo diida tanda nii?”

⁶Ho mo mohlumi lutii, Aijaya miyu kadiko katii nunu apukahi, hiila ketola do, Siika miyu atañsi ngiimi mohluka nyachu lasu khiisu donii, hojalo mohluka ahha hii ngiiko hokii hempḛr adho hosu dosu donii;

⁷piigo giima pasu mohlu ngiimi herii-siida nii, miyu ka khenyo niimi dapo ke hiila luda.

⁸Nunu Pinii ka lujubiniiñ miya apa lala la ho miyu ka muju-lujju miya gabii tola biinyada.

⁹Ho mo mohlumi lutii, “Nunuko hempḛr aya loda Pinii ka miitolya hiila luniiñmi lupya siina nanii giidoke, miyu ka muju-lujju miya atii dupa hiila!

¹⁰Niimpalukoda Mose lutii, ‘Niika annii-aba mi khiito’; ho, ‘Hu jalopa annii-aba mi ayamapa luchi, hiika hiimi siike nento loda.’

¹¹hojalo nunu luda, ‘hujalo annii-aba mi matiirḛ luko talyi, ngiika niinyi mika biniiñsi Korban ke’ (hiika hii, Pinii mika biku niimi)

¹²hopa nunu mohmi hang miike nema mohka annii-aba pa,

¹³hii chulipa Pinii ka aguñmi piigo amapa miipa biido nunuka miiju-lujju mi miisi miijo niisi. Ho nunu abuje sichulipa miinyada.”

¹⁴Ho hiira mo miyu atañmi mohko gyoliitii, ho mohlumi lutii, “Ngiimi tage nyato, miilañru, ho tala nyato:

¹⁵ago hokii ka miyu ka diilii giinii hangja miibḛr lakiñ make mohmi; hojalo nii drih na ura hokii lindo nii hiike miibḛr giida nii mohmi.”

¹⁶“Huka miyu kii matiirḛ yaroo giido, mohmi take nento.”

¹⁷ Ho Mo miyu atañmi apa tekula ho ude ura ho ahku kiile, mohka henjeajiñ atañ mohmi hiika lutiñnaniiñ ka piigomi takatii.

¹⁸ Ho Mo mohlumi lutii, Ho nunu tiirḛ tachiñ nyamapo? Nunu kappa nyama niijalo miyu diilii giichi hii mohmi miibḛr giima,

¹⁹hiikahii uraho ahjalo, ahha homa hojalo erre hosu, ho hii chuli pasu limpa siidu nii? (Hiila lubii dola mo kapane diigo hii dariike hiila lutii.)

²⁰ Ho mo lutii, “Niihna miyu ka ura hokii lindonii hiike miyu mi kacho miipa donii.

²¹Niimpalukoda ura hokiike, miyu ka ahha hokii, diimmah henju, datuapu, diipyoniisi, miyumeniiñ, ipfyonii,

²² chahi, demma, gollu, ayamapa miichi hiila henii, kariñ, nipasiiniiñ, hentii, piicha.

²³Hikha siika diimmah drih si ura hokii ke lindonii, ho hii miyu mi miibḛr do.”

²⁴ Ho hiiko hokii Jisu guri kula ho Tayer la Sidon ganda siiko dalyi intii. Mo ude pinge ho ahtii, ho mihlo chingko namatii, hojalopa mo achu giila matii.

²⁵Hojalo nyibya loda annii akha kone huka nyimii atu wiinga mina kacho yajiyallo giitola dotiinii, Jisu mi tapa lala, ho ahla ho mohka alih ho chuha datii.

²⁶Siika annii akha Grik hokiitii, Sairoponi hoka bukonii. Ho mo mohka nyimii wiinga koka igii mi mohmi mompa tope hiila lubiido.

²⁷Ho Mo mohmi lutii, “Kapyo pa himme mi diigo diike nento rañ, niimpalukoda siikasi aya make himme ka diigo mi labiila ho akie atañ mika kubi niisi.”

²⁸Hojalo mo mohmi lusitii, “Ḛh, Atoh, akie tiirḛ diitananii ura hoka himme ka diibi niimi diidu.”

²⁹Ho mo mohmi lutii, “siika luniiñ kiipa no niika lembo ho ingeku; igii inne kuke niika nyimii wiinga kokii.”

³⁰Ho mo ude ho intiiku, ho himme mi imiko ho giila dopa kappa biido, ho igii intiiku.

³¹ Ho mo Tayer ka ganda hokii ahkur tiiku, ho Sidon hopa ila Galili ka Siimie dalyiho intii, Lemba polyañhe ka ganda siiko dalyi hopa.

³² Ho mohlu rubi nii kone mi mohko ahgii bitii ho lulyi ho mo aguñ iche luhiitii; ho mohlu mohka alah mi mohka ayoho tencha bitope hiila lubiido.

³³ Ho mohmi insila miyuapur hokii iehi giila, ho mohka lahchi mi hiika miyu ka yaroo ho tengatii, ho mo chukḛr chula la ho mohka allyo ho tenne biido;

³⁴ho yapuñ ho kacha lala, mo kaditii, ho mohmi lutii, “Ephphatha,” hiika hii, “miiko bito.”

³⁵Ho mohka yaroo hii tapa tiiku, mohka allyo tiipya tiiku, ho mo ayapa lula tiiku.

³⁶ Ho mo mohlumi kone mitrḛ lukoyo hiila lubii do; hojalo niimkane lukoyo hiila mohlumi lutii, hiimi uro yapaya mohlu gyukotii.

³⁷Ho mohlu luko hetḛr luko siila mapa hemur nyatii, lunyatii, “Mo kappane miidi ko miibiine; mo rubi mi tapa dopa ho luha mi lula dopa miibiine.”