Read Apatani MAK 8 Bible Online

MAK 8 - Apatani bible

MAK 8

¹ Hiika myodu ho, hiira hempḛr miyuabuje datii, ho mohluko hang diisa nyimatii, mo mohka henjeajiñ atañmi gyola lala, ho mohlumi lutii,

²“Ngo miyu atañmi aroh do, niimpalukoda mohlu ngiika agiñho allo lohiñ lyiku dabo monkunii, ho hang diisa nyima;

³ho ngo matiirḛ mohlumi haya dopa ude ho kiiniñ doku koda, mohlu lembo ho ajju nyanedo; ho tange ada hempḛr adho hokii ahnya da.”

⁴Ho mohka henjeajiñ atañ lusitii, “Niihtañpa ngunu siika miyu atañmi yatañ hola talyi siika zabyo ho?”

⁵Ho mo mohlumi tahii biido, “Nunu ko yatañ penne do?” Mohlu lutii, “Pekkanuhe”

⁶Ho mo miyu atañmi lengo ho duha tote hiila lubiido; ho mo yatañ pekkanuhemi lala la, ho payapacho lula la mo petutii ho hiimi henjeajiñ atañmi bitii miyu atañmi bito hiila; ho mohlu hiimi miyu atañmi bitii.

⁷Ho mohluka agiñho ngiiyyi miilañ iche dotii; ho hiimi payapacho lulala, mo lubiido siika siimi miilañ mohlumi bito.

⁸Ho mohlu diitii, ho diide giinyatii; ho mohlu diile tale mi tukuñ tupa tuku, yagii giikkanuhe poteje.

⁹Hiiko ho miyu harje jarpe pahe datii.

¹⁰Ho mo mohlumi kiiniñ nempatii; ho nyibya loda mo huluho chatii mohka henjeajiñ atañka agiñho, ho Dalmanutha ka gandachie ho inyatii.

¹¹ Parisi atañ ahtii ho mohmi cherii ritii, mohmi dariiganda hokii kagiñnanii kakiñpe hiila lutii, mohmi tenkala.

¹²Ho mo mohka Yajiyallo ura ho uropa samo lala, ho lutii, “Niimpape siika santuñ si kagiñnanii medonii? Jijeloda, ngo nunumi lukoso, hang kagiñnanii kakiñ kemake siika santuñ mi.”

¹³ Ho mo mohlumi opa tela intiiku, ho hiira huluho dacha kula mo pache dalyiho botii.

¹⁴Siisi mohlu yatañ bagii sanii mi ahha ahii tii; ho mohluka agiñho yatañ pere kontii huluho dotii.

¹⁵ Ho mo mohlumi hendi tote lutii, lubiidola, “hendi nyato, hendi nyatii ka ha Parisi atañka ipo hokiila Herod ka ipo nyi hokii.”

¹⁶Ho mohlu kone anya taka siinyatii, lubiidola, “ngunuko yatañ nyima.”

¹⁷ Ho hiimi chimpa lala, Jisu mohlumi lutii, “Niimpa nunu yatañ nyima hiila lusu nyada? Siisi lohepa nunu henchiñ ma malo tala nyama rampo? Nunuka ahha alḛr nyado kupo?

¹⁸Amee gusudo hojalo nunu kappa nyama, ho yaroo giisudo nunu tapa nyama ha? Ho nunu henge giimapo?

¹⁹ Ngiika yatañ pengo hemi ka jarngo hepa ka petu lyiho, yagii giine poteje petu pepo niimi nunu tukuñ tupato?” Mohlu mohmi lutii, “Giilyañlenye.”

²⁰ “Ho pekkanu hemi ka jarpepa, yagii giine poteje petu pepo niimi nunu tukuñ toku?” Ho mohlu mohmi lutii, “Giikkanuhe.”

²¹Ho mo mohlumi lutii, “Siisi lohepa nunu tala nyama rañ ha?”

²² Ho mohlu Betsaida ho ahtii. Ho miyu tange micha miyu kone mi mohko ahgiitii, ho yartii mohmi tenka tope hiila mohmi.

²³ Ho mo micha miyu mi alah lo seritii, ho lemba ka agoho lingiitii; ho mohka amee ho chukḛr tima lala ho mohka alah micha miyu ka hahoho tembiitii, mo tahiitii mohmi, “Siisi no hang kappa doha?”

²⁴Ho mo ayoh kacha lala ho lutii, “Ngo miyu atañmi kappa do, hojalo mohlu sannii chuli, ila do.”

²⁵Ho hiira mo mohka alah mi micha miyu ka amee ho tengatii; ho mo hempḛr kaniila kaditii ho kappa ritii ku, ho kappane kadḛr tiiku.

²⁶Ho mo mohmi mohka ude ho inke nentii ku, lubiido, “Lemba ura hotiirḛ ahlyayo.”

²⁷ Ho Jisu mohka henjeajiñ atañka agiñho intii, Kaesarea Pilipi ka lemba ho; ho lembo ho ila dola mo mohka henjeajiñ atañmi takatii, “Ngiimi miyuatañ nii hiila luda?”

²⁸ Ho mohlu lukotii mohmi, “Jon Baptisma binii bo; ho tange ludo, Elija; ho hiira tange, nyibu hennii kone.”

²⁹Ho mo takatii mohlumi, “Hokoda nunu ngiimi hu hiila ludu?” Pitar lukotii mohmi, “No Masiah”

³⁰ Ho mo lutiñ biido mohlumi kone mitrḛ luko yayo hiila mo piigomi.

³¹ Ho mo tonsḛr ritii mohlumi Miyuka Oho hempḛr heru myanka henkiñdo, ho amiabañ atañlo khiipa kokiñdo ho nyibu burii ho pagenii atañlo, ho menko kendo, ho allo lohiñ niika hiiba ho hiira turku rikiñdo.

³²Ho mo siimi didḛr lodapa lutii. Ho Pitar mohmi aruñho ahhi giitii, ho mohmi garitii.

³³ Hojalo mohiibiila ho mohka henjeajiñ atañmi kadi lala, mo Pitar mi gatii, ho lutii, “Ngiika kiiliñ so dasato, Saitan! Niimpalukoda no Pinii dalyiho damake, hojalo miyu kii dalyike danii.”

³⁴ Ho mo miyu abujemi mohka henjeajiñ atañka agiñho gyola lala, ho mohlumi lutii, “Huna ngiika kiiliñ ho matiirḛ imbo talyinii, atoh mi hempa siike nento ho mohka pogyañ mi jobiila ho ngiimi imbo monto.

³⁵ Niimpalukoda huna atoh ka sango mi lyangur siina donii hii hiimi alyu siikiñdo, ho huna ngiika piigopa ho aya puyu ka piigopa mohluka sango mi alyu siitiinii hii lyangur siida.

³⁶Niimpalukoda hiika miyu pa nii injo dokiñdo, hikha supuñ mi biisu dojalopa ho mohka sango miya alyu siido koda?

³⁷Niimpalukoda mohka sango pa mo nii billi siila kendo?

³⁸ Huna ngiimi ho ngiika aguñpa hiinyañ talyi nii siika gollu misu ho ingyamiigya santuñ so, mohlumi Miyu ka Oho tiirḛ hiinyañ nyansi kendo niidana mo huda khada mohka Aba ko ahchi nii darii miidopopi agiñho.”