Read Apatani MAK 9 Bible Online

MAK 9 - Apatani bible

MAK 9

¹ Ho mo mohlumi lutii, “Jijeloda, Ngo nunumi ludu, so tonge danyada mohlu nii dahepa Pinii ka raddeganda ka harchichike giito laka ahniiñmi kappa tama mohlu shiikiñma”.

² Ho allo lokhe ka hiiba Jisu mo agiñho Pitar ho Jems ho Jon mi ingiitii, ho mohlumi insa giila putoo ho chagiitii; ho mo lyilutii mohluka kadopa,

³ ho mohka abi-tarii hii kanyañ ritii, hempḛr puloo, hiitañpa pulootii kiiddi apiñ ho kone tiirḛ hiimi puloo yadopa miila kemmatii.

⁴Ho hiiko mohluka agiñho Elija la Mose nyi lintii, ho mo anye Jisu mi luriitii.

⁵Ho Pitar lutii Jisu mi, “Atoh, si ayado ngunu so da; kiije tabyo ude pehiñhe pensa, niipa penge ho Mose pa penge ho Elija pa penge.”

⁶Mo nii hiilape luchinii hiila hendḛr lamapa lyitii, niimpalukoda mohlu hempḛr uro biiso nyatii.

⁷ Ho mohlumi jomii harpu habiitii, ho jomii hokii aguñgonge luliñtii, “Si ngiika heniiñja Oho ke; mo luniiñ tato.”

⁸Ho aluñpada mohlu kahikasotii, kone hetḛr mohluka aruñho kappa kumatii, hojalo Jisu kontii misu.

⁹ Ho mohlu putoo hokii tola dokula, mo lubiido mo anyemi niinyi nii kappatii hiimi kone mitrḛ lukoyo, nii dahepa Miyu ka Oho shiiniiñ hokii turiturku tama.

¹⁰Hopa mohlu siika drih mi mohluka pungko ho doke nentii, taka siinyatii shiiniiñ hokiika turiturku kuniisi nii hiisa niimiyu.

¹¹ Ho mohlu takatii mohmi, “Niimpa pagenii atañ kappyo pa Elija ahpyo kendoke hiila luhii?”

¹² Ho mo mohlumi lutii, “Elija ahpyo kendo kappa ne drih mi miiti dupa; ho niihtañpa ketii Miyu ka Oho ka piigomi, mo hempḛr abuje heru myanka kendo ho kahikare latrḛ miiko kendo hiila?

¹³Hojalo Ngo nunumi lukoso ahniiñ hii Elija ahhii, ho mohlu nii miinañdo mohmi miitii mohluka hempyo pa, mo paka keniiñ chitañpa.”

¹⁴ Mohlu henjeajiñ atañ agiñho ahbii kiile, mohlu hempḛr miyuabuje mohlumi dakḛr biidopa kappatii, ho pagenii atañ mohlumi cherii nyala domi.

¹⁵Ho nyibyaloda hikha miyuatañ, Jisu mi kappa lala, mohlu hemur nyatii, ho mohlu mohka aruñho haratii ho mohmi ayahelyi lutii.

¹⁶Ho mo tahii biido mohlumi, “Nunu niihna mohluka agiñho taka siinya dunii?”

¹⁷Ho apur hoka danii kone luko biido mohmi, “Tonsḛrbo, Ngo ngiika oho mi niiko ahgiidu, niimpalukoda mohko luhanii yajiyallo giido;

¹⁸ho mohmi jarpiñ hadalyi, mohmi hitiñ lodado; ho mo sappu riibe ho mohka aih mi nyensu da ho hempḛr alḛr ridu; ho ngo niika henjeajiñ atañmi siimi mompa tope hiila lubiidu, hojalo mohlu mompa lama.”

¹⁹Ho mo mohlumi lukobiido, “Nunu henje giimanii santuñ atañ, nii dahepa Ngo nunu agiñho dabo talyi? Nii dahepa ngo nunu agiñho hembo mola dachi? Mohmi ngiiko ahgii.”

²⁰Ho mohlu milobo himme mi mohko ahgii bitii. Ho mohmi yajiyallo kappa lala, nyibya loda himme mi ritiñ lotii, ho mo kiiddi ho giihitii ho bahii bakhe miitii, aguñho sarpu purliñtii.

²¹Ho Jisu mohka aba mi takatii, “Niidukii mo sitañpa lyihala miine?” Ho mo lutii, “himme ajañ jaho hokii.

²²Ho si kiirañ mohmi yamu ho yasie hotiirḛ tupa liila miidu, mohmi mudu lodupa; hojalo no hang ako miila kendo milo, ngunumi aroh-aya pe ho hembyuñ pe.”

²³ Ho Jisu mohmi lutii, “No miila kendo koda! Kapane drih miila kendo huna henje nyadonii.”

²⁴Nyibyaloda himme ka aba gyuritii ho lutii, “Ngo henje duke; hembyuñ pe ngiika henjemanii mi!”

²⁵Ho Jisu miyuabuje tonge paka hara niimi kappa lala, mo kacho yajiyallo mi gabiido, hiimi hiila lubiido, “No luha ho rubi yajiyallo, Ngo niimi luduke, mohkokii agoho lintoku, ho hiira mohko ahku yakuyo!”

²⁶Ho goropa gyulala ho mohmi hempḛr uropa hitiñ lola la, hii agoho lintiiku, ho milobo atu hii shiima chuli lyitii, hopa abuya miyuatañ lutii, “Mo shiido kuke.”

²⁷Hojalo Jisu mohmi alah ho gala lala ho mohmi seritii, ho mo guri tiiku.

²⁸Ho mo ude ura ho ahku hangkele, mohka henjeajiñ atañ mohmi tasiela tahiitii, “Niimpa ngunu siimi mompa lamato?”

²⁹Ho mo mohlumi lutii, “Si chitañ drih hii kapanelo mompa lakiñ make hojalo kuniiñ lo kontii siike.”

³⁰ Mohlu hokii intiiku ho Galili mi impo biitii. Mo kone mitrḛ siimi chingke nena matii;

³¹ hopa mo mohka henjeajiñ atañmi tonsḛrtii, mohlumi lubiidola, “Miyu ka Oho mi miyu atañka alah ho tiilii bikiñdo, ho mohlu mohmi menkiñdo, ho mohmi mengku lala, allo lohiñ niika hiibaho mo turi kendo.”

³² Hojalopa mohlu tadḛrlama tii luniiñmi, ho mohmi taka dupa tiirḛ biiso nyatii.

³³ Ho mohlu Keparnam ho ahtii; ho mohka ude hoka duho mo tahiitii mohlumi, “Niihna nunu lembo ho tahii siitonii?”

³⁴ Hojalo mohlu adu matii, niimpalukoda lembo ho mohlu kone anyañ taka siinyatii hu kaheja hiila.

³⁵ Ho mo duhatii ho alyañlenye mi gyoliitii, ho mo mohlumi lutii, “Huna kapyo japa dana donii, hii miilañ ruka kami jaho dakiñdo loda ho miilañ ruka miirapa lyikiñdo.”

³⁶ Ho mo himme atu kone mi golala, ho mohluka pungkoho atii lala; ho mohka lapoho gobiitii, ho mo mohlumi lutii,

³⁷ “Hujalopa si chitañ himme mi ngiika armyañ pa karii talyi hii ngiimi kariido, ho hujalopa ngiimi karii talyi, hii ngiimi kariima hojalo hu ngiimi kiiniñtii hiimike karii donii.”

³⁸ Jon mohmi lutii, “Tonsḛrbo, ngunu kappa to miyu koneka niika armyañ pa igii mompa niimi, ho ngunu mohmi lutiñto, niimpalukoda mo ngunu agiñ hoka imbo niima.”

³⁹Hojalo Jisu lutii, Mohmi lutiñyo; niimpalukoda kone hetḛr huna ngiika armyañ pa tamochikho giitola miigo miidanii hii piijoda ngiimi ayamapa lukiñ make.

⁴⁰Niimpa huna ngunumi chekho manii hii ngunu pake.

⁴¹ Hopa jijeloda, ngo nunumi ludu, hujalo nunumi yasie ture tandupa bichi niimpalukoda nunu Kristo ka armyañ mi giido, mohka ajunii juko saniimi ichetiirḛ alyu siikiñ make.

⁴² Hujalopa siika atu kone mija lopa ngiimika henje bomi ingyamiigya dopa miipa talyi, hii hiila miiniiñya aya yakiñdo mohka langu ho yalañ puro puhe palii giila ho atoh mika siimie hoka chubañ haniiya.

⁴³Ho nunuka alah matiirḛ nunumi ingyamiigya giido koda, hiimi papa linsu to; nunuka alah buhe giima paka sango kappa niiya aya yakiñ doke alah bunye giito laka ho yamuganda hoka tosa niimi, lyame lama nii yamuho.

⁴⁴[1]

⁴⁵Ho nunuka alih matiirḛ nunumi ingyamiigya giido milo, hiimi papa siito; liicha laka sango kappa niiya aya yakiñ doke nunupa alih bunye giisu lala yamuganda hoka jopa loko saniimi.

⁴⁶[2]

⁴⁷Ho nunuka amee matiirḛ nunumi ingyamiigya giido milo, hiimi hapa linsuto, amee puhe giitolaka Pinii ka raddeganda hoka ahniiñya nunupa aya yakiñ doke amee punye giisu lala ka yamuganda hoka jopa loko saniimi,

⁴⁸nohna mohluka tiho hii siila manii, ho yamu hii lyame lamanii.

⁴⁹ “Niimpalukoda kone abimi yamu lo yaka kendo alho tihi siido ha hiila.

⁵⁰ Alho ayado; hojalo alho tihi hii tikhu doku koda, niihtañpa nunu hiimi tihi dopa miipa? Nunu miilañru atoh atoh ko alho tihi tikañ kiineto, ho miilañru chimiepa duhiñ nyato.”