Read Apatani LUK 10 Bible Online

LUK 10 - Apatani bible

LUK 10

¹ Hiika hiibapa Attoh kanukhange tongelya kahebiido, ho mohlumi mohmi kapyo yapa kiiniñtii, anye anye, hikha taun la gandaho nohna mo ahdupa miitiinii.

² Ho mo mohlumi lutii, Amoo lasa abuje do, hojalo amoolanii ichesii dasu danii; kuto amoo Attoh mi amoo lanii atañmi mohka amoo lasako ho kiiniñ tote hiila.

³ Nunuka lemboho inge; kato, Ngo nunumi subuñ hiilyañpa kiiniñ biilyi ke siipya atañka apurho.

⁴Chiru bagii lyayo, lera tiirḛ, nyota nanii tiirḛ; ho lemboho kone mitrḛ lurii lyayo.

⁵Huka ude hojalo ahchi, kapyopa luto, Siika ude so chimie dotope!

⁶Ho chimie heminii matiirḛ hiiko dukoda, nunuka chimie hii mohko dobo kendo; hojalo hiilamatrḛ nyima koda, hii nunuko ahkur kendo kuke.

⁷ Ho hiika ude duko jaho dutolya, diito tantolya mohlu nii bichi, niimpalukoda miinii atañmi mohluka miijomi bikiñ doke; ude penge abi ilyayo.

⁸Nohjalo nunu taun ho ahchi ho mohlu nunumi karii lyimilo, diitolya niihna nunuka hataho atii bitii nii;

⁹miipya tolya hoka achih doniimi ho mohlumi luto, Pinii ka raddeganda hii nunuko aruñho ahdo kuke.

¹⁰Hojalo niida nunu taunho ahchi ho mohlu nunumi larii malyi milo, hiika lembo hopa intolya ho luto,

¹¹ Nunuka taun hoka dimḛr lohepa ngunu alih hoka giiniimi, ngunu pija siibii lyike nunumi chekhola; pema nunu simi chilyayo, Pinii ka raddeganda hii aruñho ahdoku hiila.

¹² Ngo nunumi lukoso, siikasi Sodom ya pigiilaya kendo hiika allo ho siika taun mi hentola.

¹³ Aiya hiila nunumi hembido, Korajin! Aiya hiila nunumi hembido, Betsaida! Niimpalukoda siika kaye miigo nunu koka miiniiñ simi Tyre la Sidon nyiho hoya miitii koda, mohlu ayuho henkur nyatii kudo, niirepulye la miibu piipu giitola dula.

¹⁴Hojalo ayakacho kalyi kuho Tyre la Sidon nyiya pigiilaya kendo nunumi hentola.

¹⁵Ho nunu, Keparnam, nunumi dariiganda ho chagii lyido hendoha? Nunumi nelimyoko ho togiikendo.

¹⁶ Huna nunuka luniiñmi tadonii ngiimi tado, ho huna nunumi khiipa donii hii ngiimi khiipado, ho huna ngiimi khiipa donii hii hiimi tiirḛ khiipado huna ngiimi kiiniñ tiinii.

¹⁷Kanukhange hii ahkur tiiku hempyo biidola, lubiidola, “Attoh, igii atañ miilañmi ngunu mompa lato niika armyañ pa!”

¹⁸ Ho mo mohlumi lutii, “Ngo Saitan mi yapuñ hokii yamu chitañ byohi dopa kapato.

¹⁹Kato, ngo nunumi otority bibii lyike tabu atañ la tarji atañmi nyorpi ladopa, ho ahha banii boka hikha harchichike mi kaye yadopa; ho hang kone hetḛr nunumi heru miipa lakiñ make.

²⁰ Hojalo hempyo nyayo siika sipa, yajiyallo atañ nunuka luniiñ tado hiila; hojalo hempyo nyato nunuka armyañ hii dariiganda ho ketiiku hiila.”

²¹ Hiika myodu jaho mo Darii Yajiyallo ho hempyotii ho lutii, “Ngo niimi payapacho ludu, Aba, dariiganda la kiiddiapiñ nyika Attoh, no siika drih atañmi chila ho talanii atañ kokii achuñtii ho himme atañ miya kakiñtii; ḛh, Aba, niimpalukoda siikasi niika aroh-aya henju.

²² Hikha drih atañmi ngiika Aba ngiimi bitii; ho kone hetḛr chima hu Oho hiila Aba kontiisii, malo hu Aba hiila Oho kontiisii ho hutii mina Oho kahe tiinii mohmi kakiñ dupa.”

²³ Ho henjeajiñ atañ kii dalyi mobo biila mo lutii lusila, “Lyanko niike amee atañ hutiina kappa nyadonii nunuka kaniiñmi!

²⁴Niimpalukoda ngo nunumi lukoso abuje nyibuhenii atañ la radde atañ nunuka kaniiñmi kappa nala hene, ho hiimi kappa mane, ho tanañne niihna nunu tadonii, ho hiimi tapa mane.”

²⁵ Ho kato, dapochenii kone guritii mohmi tenka dupa, lubiidola, “Tonsḛrbo, ngo niihpe miichinii santḛrlamanii sango kappa dupa?”

²⁶Mo mohmi lutii, “Nii hiila dapo ho ketola do? Niihtañpa no ridu?”

²⁷ Ho mo lusitii, “No hento Attoh niika Pinii mi hikha niika ahha lo, ho hikha niika yallo lo, ho hikha niika tamo lo, ho hikha niika punyulo, ho niika ariapii mi atoh mika hensu henchañho.”

²⁸ Ho mo mohmi lutii, “No ludiko jaho lukodo; siimi miito, ho no sankiñ doke.”

²⁹Hojalo mo, atohmi lupya sudupa hiila, Jisu mi lutii, “Ho hu ngiika ariapii?”

³⁰Jisu lusitii, “Miyu kone Jerusalem hokii Jeriko topa totii, ho mo diipyo niika alah ho ahtii, hiika atañ mohmi hitii ho mohmi miinetii, ho intiiku, mohmi shiikusiilya dopa apatela.

³¹Siisi matiirḛ nyibu kone hiika lembo ho totii; ho mo mohmi kappa lala lembo byahe yapa ingu giitii.

³²Hii chulipa Lebait tiirḛ, mo hiika lengo ho ahbiila ho mohmi kappa lala, lembo byahe yapa impo biitii.

³³ Hojalo Samarita kone, mo myodi innii, ahtii nohna mo dotiinii; ho mo mohmi kappa lala, mo aroh ritii,

³⁴ho mohko ahtii ho mohka une atañmi pubitii, kutu la roalha topubiidola; hiika hiibaho mo mohmi mohka achu-amyo ho gocha lala ho ude ho ahgiitii, ho mohmi kalyañ kadatii.

³⁵Ho allo lohe yaho mo denarii[1] penye laliñ lala ho ude atoh mi bitii, lubiidola, ‘Mohmi kalyañ kada tolya; ho niimkane abu no miilya talyi, ngo bikur talyi kuke ngiika ahkur lyikuho.’

³⁶Siika hinge sokii, humi no hendo, ariapii pa lyido hiila hiika miyu diipyo nii alah hoka ahnii bopa?”

³⁷Mo lutii, “Hii bocho huna mohmi aroh tiinii.” Ho Jisu mohmi lutii, “Inge ho sichuli miinge.”

³⁸ Siisi mohlu mohluka lembo ho ila dokele, mo lemba ho ahtii; ho nyimii kone Marta hiila armyañ mohmi mohka ude ho ahgiitii.

³⁹Ho mohkii anu kone dutii Mary hiila, mo Attoh ka alih aruñho dutii ho mohka tonsḛr niimi tatii.

⁴⁰Hojalo Marta henga henkhatii abuje miiho luho kopa; ho mo mohko ahla ho lutii, “Attoh, no kappa mapo ngiika anu ngiimi kontii miiho dopa apa bitii hiila? Mohmi luto ngiimi hembyuñ tote hiila.”

⁴¹ Hojalo Attoh lusitii mohmi, “Marta, Marta, no abuje drihpa henala ho ahiarela dosudo;

⁴²drih kone annaja dorañke. Mary chidiko chibii doke, hiika hiimi mohkokii lara biila kemake.”