Read Apatani LUK 12 Bible Online

LUK 12 - Apatani bible

LUK 12

¹ Hiika myodu jaho, abuje miyuatañ tongepa dakuñla doho mohlu kone anyañ mi nenje nenge siibiido, mo lurido mohka henjeajiñ atañmi kapyopa, Hendi nyatolya Parisi atañ kokii ka miibḛr kosa niimi, hiika apukahi miiniiñ hokii.

² Hangkone tiirḛ aputola dokiñ make kakiñ mapa, malo achuñtola michimapa.

³Hopa niijalo nunu kamo ho lutii hiikahiimi hutoh ho tapa kendoke, ho niihna nunu lusila chidiibako ho lutiinii hiimi udemantu atañ hokiila gyuko kendoke.

⁴ “Ngo nunumi lukoso, ngiika ajiñatañ, biisolyayo huna apomi mendanii, ho hiika hiiba ho mohlu hang miila kemake.

⁵ Hojalo ngo nunumi lukoso humina biiso kendonii: hiimi biisoto, huna mo menku lala latrḛ, harchichike giidonii yamuganda ho jopalola dopa; ḛh, Ngo nunumi lukoso, mohmi biisoto!

⁶Paripiita lyangohemi posa penye pa pyuma siipeha? Ho hiikohokii kone mitrḛ Pinii ka kata ho helyumake.

⁷ Niimpa, niika dinta daka dimmu lohepa hikha khiito la doke. Biisoyo; nunu abuje paripiita atañmi khiiniiñ yapa lyidoke.

⁸“Ho Ngo nunumi lukoso, koneabi huna ngiimi miyu ka hata lukotalyinii, miyu ka Oho tiirḛ Pinii ka miidopopi atañka hataho luko kendo

⁹ hojalo hu ngiimi miyu ka hataho chima luchi hiimi Pinii ka miidopopi atañka hataho chima luchi.

¹⁰ Ho koneabi huna miyu ka Oho mi chekhola ludonii hiimi hello bikiñdo; hojalo hu Darii Yajiyallo mi nipala ludo hiimi hello bikiñma

¹¹ Ho niida nunumi mohlu sinagog atañ ho ahgii talyi ho sangiinii atañ la otority atañ ko, hena yayo niihtañ pape malo nii hiilape nunu lusitalyinii hiila malo niihyu nunu luchinii hiila;

¹²niimpalukoda Darii Yajiyallo nunumi tonsḛr kendoke hiika myodu ho nunuka lusa niimi.”

¹³Miyu apur hokii kone mohmi lutii, “Tonsḛrbo, ngiika anubarmii mi ngiika agiñho peniiñ mi tache siito lutope.”

¹⁴Hojalo mo mohmi lutii, “Miyu, hu ngiimi nunu punko hoka ayakacho kaniipa miitii ho nunumika tache biniipa?”

¹⁵ Ho mo mohlumi lutii, “Hendi nyato, ho helyihembyo saniiñmi hendi tolya; niimpalukoda miyu sango hii niimkane mohkii gandanencha do hiiko giita make.”

¹⁶Ho mo mohlumi lutiñ nambiidola lukotii, lubiidola, “Mingo miyu ka aji-balu hii abuje amoo lingiitii;

¹⁷ho mo atohmi hensutii, Niihpe ngo miichinii, niimpalukoda ngiikii atiiko nyikuma ngiika amoo atañmi?

¹⁸Ho mo lutii, ‘Ngo hiila miichi: Ngo ngiika nesu mi pyalo talyi ho peroyapa penge penchi; ho hiiko ngo ngiika amoo la ngiika drihpachi atañmi atii talyi.

¹⁹Ho ngo ngiika yallo mi luchi, Yallo, niikii abuje drihpachi atiitola doke abuje anyañpa; niikii henadopa lyimake, diito, tanto, hempyo soto.’

²⁰ Hojalo Pinii mohmi lutii, ‘Piicha! Siho ayoh so niika yallo mi anna dokuke lukoda; ho drihpachi niika miimyo niimi, hupape hii dokiñ dokunii?’

²¹Si chuli lyikiñdo huna atohpa atii tiikuñ biidonii, ho hii Pinii kii dalyiho mingoma.”

²² Ho mo lutii mohka henjeajiñ atañmi, “Hopa ngo nunumi lukoso, henayo nunuka sango pa, niihyu diichinii, malo niika apopa, niihyu nunu giichinii hiila.”

²³Niimpalukoda sango si diigo mi khiiniiñ yapa lyidoke, ho aposi pulyetarii giiniiñmi.

²⁴ Puha atañmi kato; mohlu alima ho amoo tiirḛ lama, Mohlukii ude atii tiikuñ ko ho nesu tiirḛ nyima, hojalo Pinii mohlumi diigo hobiida. Ho henkato niimkane nunu piita atañmi hentola khiiniiñ yapa lyido!

²⁵Ho hu nunu hena biidola nunuka sango mi ladutuye sambya dopa miila kendo?

²⁶Hopa nunu matiirḛ atudrih kone tiirḛ sichuli miila makoda, niimpa nunu hena nyadu hiika atañpa?

²⁷Apoo atañmi kato, niihtañpa mohlu sanda; mohlu khella nyola tiirḛ miima ho niibyutano tiirḛ miima; hojalo ngo nunumi lukoso, Solomon tiirḛ mohka hikha tatukatu ho siika ako chuli patrḛ giimane.

²⁸Hojalo Pinii matiirḛ aji hoka tammi dunii miya hiimkane hembyuñ do siilo sando ho ardaka piichañ hoka jopa saniiñmi, niimkane uro yapa nunumi mo hembyuñ kendo, nunu henje papo atañ?

²⁹Ho meyo niihpe nunu diichinii ho niihna nunu tanchinii, ahha tiirḛ henayo.

³⁰ Niimpalukoda hikha gandasiiko atañ siika drih atañmi menyada; ho nunuka Aba chindoke nunu hiimi anna do hiila.

³¹Hiilamapa, mohka raddeganda miya meto, ho siika drih atañ tiirḛ nunupa dokiñ doke.

³² “Biisoyo, tonyo paka danii atañ, niimpalukoda siikasi nunuka Aba ka hempyo ke nunu mika raddeganda mi biniiñsi.

³³ Nunuka gandanencha mi pyunge, ho arroatu atañmi bito; no niipa badu lasa manii chiruya meto, dariiganda hoya alḛrdrih mi atii to hiiko lyukiñ make, hiiko diipyo niitrḛ ahla kema ho tagyu tiirḛ nala kema.

³⁴Niimpalukoda no nunuka alḛrdrih do, hiiko nunuka ahha tiirḛ dobo monkiñdo.

³⁵ “Nunuka guju mi giitola duto ho nunuka muru atañmi tila doke nento,

³⁶ho hiika miyuatañ chulipa lyito huna mohluka atoh ka mihie millo lasuko ude hokii ahkur kendoku hiila kalya dunii, niimpalukoda mohlu ohepada alyeh miiko bida dupa hiila mohka ahlyi kuho ho padiñ lyiho.

³⁷ Lyanko kendo hiika miira atañ humina atoh hurola dupa kappa kendonii mohka ahlyi kuho; jijeloda, ngo nunumi lukoso, mo atoh mi giiju giitola ho mohlumi diigo diitananii ho duke nenkiñdo, ho mo ahla ho mohlumi miiho kendo.

³⁸Mo matiirḛ yolyañliipa ho ahdo koda, malo paroliigo ho, ho mohlumi hiila miila dopa kappa dokoda, hiika miira atañ lyanko kendo!

³⁹ Hojalo siimi chinto, ude atoh matiirḛ nii myodu ho diipyonii ahkiñdo hiila chindo koda, mo mohka ude mi dañko kiine dupa hiila ile kema.

⁴⁰Nunu tiirḛ henjula loda duto, niimpalukoda miyu ka Oho ahkiñdo ahlyido hiilaka hema doho.”

⁴¹Pitar lutii, Attoh, no siika lutiñnaniiñ siimi ngunu papeha malo miilañ rupa peha luko dunii?

⁴² Ho Atoh lutii, “Huna hokoda hentilasanii ho chiniiñ kalyabinii, humina mohka attoh hikha ude mi kabii tolya hiila bikiñ donii, mohlumi myodu mi kabii dola mohluka diigo mi bidopa?

⁴³Lyanko kendo hiika miira hii humina mohka atoh, ahkur lyikuho miila dopa kappa kendonii.

⁴⁴Jijeloda, ngo nunumi lukoso, mo mohmi hikha mohka ganda nencha atañmi kabii kiine kendo.

⁴⁵Hojalo hiika miira matiirḛ atoh mi lusu dokoda, ‘Ngiika atoh siisi ahkiñ kumarañ,’ ho nyimii miira atañ mila milobo miira atañmi miine rido koda, ho diila tala ho tangii dokukoda,

⁴⁶hiika miira ka atoh hiika allo ho ahkiñ do mohka ahlyi kudo hiila ka hema do jaho ho hiika myodu jaho mohka chima niijaho, ho mohmi miikhiiñ kendo, ho mohmi hentiñlasa manii agiñho atii tiigyo kendo.

⁴⁷ Ho hiika miirahii huna atoh ka heniiñmi chindonii, hojalo henju manii malo mohka henko ho miimanii, hii hempḛr uropa miinekokiñdo.

⁴⁸Hojalo mo huna chimanii, ho hiko dupa niihna miitiinii, hii unyo pa hiiko kendo. Koneabi humina abuje bitiinii, hiikii hokii abupa anna kendo; ho hiiko hokii humina miyuatañ abuje tiilii bitiinii mohlu abuje kukiñ doku.

⁴⁹ “Ngo ahdu kiiddiapiñ so yamu rolii dupa hiila; ho hiika hii rolii tola doku!

⁵⁰ Ngiiko baptisma lasanii hii do baptisma biko dupa; ho ngo henga henkha henkañ kendo nii dahepa siika siimi miipe tama!

⁵¹ Nunu hiila henduha ngo kiiddiapiñ so chimie bipa ahdo hiila? Ma, ngo nunumi lukoso, hojalo tachetahepa;

⁵²niimpalukoda siisi kiija ude penge ho pongohe tache siila dokiñdo, hinge hii anye mi chekhola ho anye hii hinge mi chekhola;

⁵³mohlu tache tahe kendo, aba hii oho mi chekho kendo ho oho hii aba mi, annii hii wiinga mi chekho kendo ho wiinga hii mohka annii mi, ayyobo mohka nyahii mi chekho kendo ho nyahii hii mohka ayyobomi chekho kendo.”

⁵⁴ Mo hiira miyu atañmi lutii, “Nunu jomii mi danyiaggo dalyiho chadopa kapa lyiho, nunu ohepada ludadu, ‘Miido hulyi’; ho hiila lyidadu.

⁵⁵Ho nunu ahha dalyi allyi henii kappa lyiho, nunu ludo, ‘Hempḛr uro gubu nedo’; ho hiila lyidu.

⁵⁶Nunu apukahi atañ! Nunu lulado yapuñ la kiiddi nyimi kalala nii lyikiñdo; hojalo niihtañpa nunu lulama siisi ka myodu myolo mi?

⁵⁷ “Ho niimpa nunu atoh ayakacho kaka siima niihna miidi ko jahii?

⁵⁸Nunumika yalu luliñ boka agiñho diigolugolulyañ boko ila dola, lembo ho lyardiñ sudupa miikato, hiila makoda mo niimi ayakacho kanii ko selii giilyi diike, ho ayakacho kaniibo niimi sipahi sabiiko nembi lyido, ho sipahi sabii niimi patiihude ho atii lyido.

⁵⁹Ngo nunumi lukoso, nunu lila kengku ma lodake nii dahepa nunu bime bija tama rañ.”