Read Apatani LUK 2 Bible Online

LUK 2 - Apatani bible

LUK 2

¹ Hiika biloallo ho Kesar Augustas kokii pota tahe lintii hikha Rom miyu atañmi armyañ kelii tote hiila.

²Siikasi ketu japa armyañ ketii, Quirinius ka Sairia ho govonor paka duho.

³Ho miilañru intii armyañ kelii dupa, mohluka atoh citi ho.

⁴ Ho Josep tiirḛ Galili hokii intii, Nazaret citi hokii, Judia lohepa, David ka citi ho, Betlehem luniiñho, niimpalukoda mo David ka halugiira hokiitii,

⁵Mary agiñho kelii kodupa hiila, mohka mihie, huna wiinga giitiinii.

⁶Ho mohluka hoka daho, Mary pa wiinga budu pa myodu lyitii.

⁷Ho Mary mohka butu wiinga milobo oho mi butii ho mohmi pulye ho apu tola atiitii, ho durgu ho gotola atiitii, niimpalukoda hiiko mo anye pa duko nyimatii.

⁸Ho hiika ganda ka agoho subuñsornii tonge dutii aji ho, mohluka subuñ mi ayoh ho kahlyala.

⁹ Ho Attoh ka miidopopi mohluko ahtii, ho Attoh huda khada mohluka punkoho byokiñ lintii, ho mohlu biiso nyatii.

¹⁰Ho miidopopi mohlumi lutii, “Biiso nyayo; tageto, ngo nunupa hempḛr hempyo aya puyu ke balii giidunii hikha miyu atañpa;

¹¹ nunupa siilo allo so David ka citi ho lyangur bomi bubi tiike, hii Kristo Attoh ke.

¹²Ho si ke nunu paka kagiñnanii; nunu wiinga mi pulye bolyo bere ho apu tola durgu ho gotola dopa kappa kendoke.”

¹³Ho aluñpada hiiko miidopopi agiñho hempḛr taropa yapuñ hahoho Pinii mi assañ nyatii ho lubiidola,

¹⁴ “Pinii mi uro japa assañto, ho kiiddiapiñ so Chimie hii miyu ko dokiñ doke humina mo hempyo biidunii!”

¹⁵Ho miidopopi mohluka agiñ hokii dariiganda ho chaku kiile, siibuñsornii atañ lusu nyatii ako anya mi, “Kiije ngunu Betlehem ho insa ho siika drih lyinii siimi kaka tasa, nii mina Attoh ngunumi chindopa miitiinii.”

¹⁶Ho mohlu hempḛr nyibyapa intii, ho Mary la Josep nyimi kappatii, ho wiinga mi durgu ho gotola dopa.

¹⁷Ho hiimi mohlu kappa lala mohlu chindopa miitii niihna mohlumi luko tiinii siika wiinga ka piigomi;

¹⁸ho hikha hutiina hiimi tapa nyatiinii hemur nyatii niihna miidopopi mohlumi luko tiinii.

¹⁹ Hojalo Mary hikha siika atañmi atiibiitii, mohka ahha uraho siimi hendi biidola.

²⁰Ho subuñsornii atañ inkur tiiku, Pinii mi assañ sanjo biikula hikha mohluka tapa niimila ho kapaniimi, niihtañpa mohlumi lukotii.

²¹ Ho lopinye nii allo ho, mohmika mitupipa lyiho, mohmi Jisu hiila myantii, miidopopi ka mohmika akhii ho giima rampa ka armyañ myaniiñ mi.

²²Ho darii miidu kupa myodu ahlyi kunii mohlupa Mose ka dapo hoka luniiñ chulipa, mohlu mohmi Jerusalem ho ahgiitii mohmi Attoh mi bidupa hiila

²³(hiila keto lake donii Attoh ka dapo ho, “Butu milobo oho kone abimi Attoh ko darii hiila lukiñdo”)

²⁴ho niihtañpa Attoh ka dapo ho lutii hii chulipa membi la lyikiñdo, “Pakoo kunye jalo, malo pakoo atu kunye jalo.”

²⁵ Siisi Jerusalem ho miyu kone dutii, hiika armyañ Simeon hiila, ho siika miyu si denki ho Pinii kii dalyi henga niitii, Isrel mika myanii mi kahlya la, ho Darii Yajiyallo mo ayoh ho dabo montii.

²⁶Ho mohmi Darii Yajiyallo hiila kakiñ tola dotii mo shiikiñ make nii dahepa mo Attoh Kristo mi kappa tama.

²⁷Ho Yajiyallo harolupa kotola mo piniiude ho ahtii; ho annii-aba nyi wiinga Jisu mi ura ho golii biikele, mohpa dapo ka muju lujju mi miibi dupa hiila,

²⁸mo Jisu mi mohka lapo ho gola lala ho Pinii mi assañbiido ho lutii,

²⁹“Attoh, siisi yadi niika miira mi Chimie pa inke nenkupe, niika luniiñ chulipa;

³⁰ niimpalukoda ngiika amee si niika sangopyako bomi kappa tiikuke

³¹humina no miimyo bitiinii hikha miyu atañka kadopa,

³²Midomiyu atañ paka hutoh byokhe sanii, ho niika miyu Isrel paka tatukatu giisanii.”

³³Ho mohka aba la mohka annii nyi hemurtii mohmika luniiñmi tala la;

³⁴ho Simeon mohlumi lyalala ho mohka annii Mary mi lutii, “Kato, siika wiinga si Isrel ho abuje miyu mi togii chagii niipake kahe biilyinii, ho kagiñnanii pa dolyi ke chekho niipa

³⁵(ho ilyo hii niika atoh ka yallo mitrḛ niiche siikiñ doke), hiika abuje miyu ka ahha hoka heniiñmi kakiñ nekudo.”

³⁶Ho nyimii nyibuhenii kone dutii, Anna, Phanuel ka oho, Asher ka halu hokii; mo hempḛr akha tiiku, mohka millo agiñho nyañkanuhe sii mohka millo imma raho hokii dubo siitiinii,

³⁷ho hiimie pa mo pinyikhange la nyampe tiiku. Mo piniiude hokii inku matii, nyobiidola allo ayoh dadumi heriila dutii.

³⁸Ho hiika myodu jaho limbiila mo Pinii mi payapacho lubiido, ho mohka piigo mi lubiidola miilañ rumi lukotii hutiina Jerusalem mika tupyabiniiñ mi kala dotiinii.

³⁹Ho mohlu kapane hemi Attoh ka henko jaho miitii hekula, mohlu Galili ho ahkur tiiku, mohluka atoh citi ho,

⁴⁰Ho wiinga hii sanchatii ho hempḛr alḛrtii, hempḛr chilatii; ho Pinii ka hembo nii mohka agiñho dabotii.

⁴¹Siisi mohka annii-aba anya dadumi Jerusalem ho intii impobiiniiñ dituñ sodu ho.

⁴²Ho mo anya nyalyañ lenye kukele, mohlu intii dumiñ muju chulipa;

⁴³ho dituñ soja kukele, mohlu ahkurla dokukiile, wiinga Jisu Jerusalem ho datii. Mohka annii-aba hiimi chimatii,

⁴⁴hojalo mo mohluka agiñho imbo siido hiila hela mohlu allo loteje intiiku, ho mohlu metii mohluka henii myanii la ajiñ apiika punkoho;

⁴⁵ho mohlu mepa malyinii mohmi, mohlu Jerusalem ho chakurtii, mohmi mechala.

⁴⁶Allo lohiñhe daku lala mohlu mohmi piniiude ho kappa biido ku, tonsḛrbo atañka agiñho dupa, mohluka luniiñmi tala ho mohlumi taka tarala dopa;

⁴⁷ho hikha hoka tapa laka dunii atañ hemur nyatii mohka chila ho mohka lukonii atañmi.

⁴⁸ Ho mohlu mohmi kappa lala mohlu hemur nyatii; ho mohka annii mohmi lutii, “Wiinga, niimpa no ngunumi sitañ pa miidu? Kato, niika naba ngiinyi hiimkane hena la meto.”

⁴⁹Ho mo mohlumi lutii, “Niimpa nunu ngiimi medu? Nunu chima topo ngo ngiika Aba ka ude ho dukiñdo hiila?”

⁵⁰Ho mohlu tadḛr lamatii mohlumika mohka luniiñmi.

⁵¹ Ho mo mohluka agiñho tobo montiiku ho Nazaret ho ahtiiku, ho mohluka luniiñmi tatiiku; ho mohka annii hikha siika drih mi ahha ho hengiitii.

⁵² Ho Jisu saritii chiniiñ hotiirḛ ho apo tiirḛ, ho Pinii lotrḛ ho miyu lotrḛ khiikotii.