Read Apatani LUK 21 Bible Online

LUK 21 - Apatani bible

LUK 21

¹ Mo kachatii ho mingo miyu ka tiicko atii koka mohka ahmiñayiñ alii niimi kappatii;

²ho mo arro hiimie koneka rupu posa penye alii niimi kappatii.

³Ho mo lutii, “Jijeloda ngo nunumi lukoso, siika arro hiimie si mohlu miilañ rumi abu yapa alii biine;

⁴niimpalukoda mohlu miilañru mohluka abuje donii hokiisii alii biisu nenii, hojalo mo arro siido tiirḛ mohka sana nansa niimi hikha bitii.”

⁵ Ho tonge piniiude mi lutii, niimkane kapyo do khiiniiñ yalañ adiñ ho biniiñ atañsi, mo lutii,

⁶ “Nunuka siika kapa nii drih atañsi, allo loliñ kendo siikaso yalañ puhe tiirḛ yalañ ayoh ho dokiñ make hiimi giipa lomapa.”

⁷ Ho mohlu mohmi takatii, “Tonsḛrbo, si niida lyikiñdo, ho nii kagiñnanii dokiñdo siika atañka lyisa niisi?”

⁸ Ho mo lutii, Hendi tolya nunu ngogii kote mapa; niimpalukoda abuje ngiika armyañ pa ahkiñ doke, lubiidola, “Ngoke hii! ho, ‘myodu tunii dokuke!’ Mohluka kiiliñ ho ilya yo.

⁹Ho niida nunu gyambo pasuniiñ ho chesuresu nii tapa talyi, biiso lyayo; niimpalukoda siikasi lyipyo kendoke, hojalo kamikalo hii ahma ranke.”

¹⁰Ho mo mohlumi lutii, Ganda hii ganda mi chekho rikiñdo, ho raddeganda hii raddeganda mi;

¹¹hempḛr uropa myobu hukiñdo, ho abuje gandasiiko ho diime ho dolisariñ dokiñdo; ho biiso nyakiñdo ho hempḛr kagiñnanii atañ dariiganda hokii ahkiñdo.

¹² Hojalo hikha siika atañka lyima rampa mohlu nunumi latu kendo ho miihimiire kendo, nunumi sinagog atañ ho la patiihude atañ ho bikiñdo, ho nunumi radde atañ la govonor atañ ko ahgii bikiñdo ngiika armyañ kiipa.

¹³ Siikasi nunupa pyako dupa ka myodu pa lyikiñ doke.

¹⁴ Nunuka ahha ho siimi henge giitolya, hemmyo lyayo nii hiila pe luchinii hiila;

¹⁵niimpalukoda ngo nunumi aguñ ho chila bichi ke, nii mina nunuka ahha banii chekhola dala kemanii malo cherii lakiñ manii.

¹⁶ Nunumi nunuka annii-aba ho anuabañ ho henii-myanii ho ajiñ-apii lohepa hempa kendokuke, ho nunu kokii tonge mi shiido pa lohe miikiñ doke;

¹⁷ nunu kone abilo kana mapa miiko kendo ngiika armyañ kiipa.

¹⁸ Hojalo nunuka dimmu sohe hetḛr lyukiñ make.

¹⁹ Nunuka pigii niilo nunu nunuka sango mi kappa kendo.

²⁰ Hojalo niida nunu Jerusalem mi armi atañmi dakḛr pabii dopa kappa talyi, ho chintolya biisokacho hii aruñ ahdoku hiila.

²¹Ho Judia hoka dunii atañmi putoo ho harcha giike nento, ho hutiina citi ka ura ho dunii hiimi agoho linke nento, ho hutiina ganda ka agoho danii hiimi ura ahke nelyayo;

²²niimpalukoda siika allo atañsi miikhiiñ miidu allo ke, hikha keto laka doniimi lyipe kiine dupa.

²³ Ho aiya hiila hembido wiinga giinii atañ pa ho himme aso laka dunii atañpa hiika allo ho! Niimpalukoda hempḛr hengahenkha kiiddiapiñ so ahkiñ do ho hadii siika miyu atañko;

²⁴ mohlu ilyo ka nyatañ ho huha kendo, ho dornya kendo hikha ganda atañ; ho Jerusalem hii Midomiyu atañlo nyorpi loko kendo, nii dahepa Midomiyu atañka myodu hii lyipetama.

²⁵ “Ho danyiho ho piiloho ho takḛr atañ ho kagiñnanii giikiñ doke, ho kiiddiapiñ so ganda ka hengahenkha hii hendḛr lama pa lyikiñdo siimie ka adu-abiñ ho lando poniiñlo,

²⁶miyuatañ heru biidola biiso nyakiñdo ho ahsanii allo mi hempa biitola dohadolo hoka ahniiñmi; niimpalukoda dariiganda ka tamo atañ hii abyu rikiñdo.

²⁷ Ho mohlu miyu ka Oho mi harchichike ho tatu katu ka agiñho jomii ho ahla dopa kappa kendo.

²⁸ Siisi niida siika drih atañ lyiri talyi, kacha tolya ho nunuka adiñ mi nyancha tolya, niimpalukoda nunu mika tupyabiniiñ hii aruñ ahdo kuke.”

²⁹Ho mo mohlumi lutiñnaniiñ lukotii: Tarro sannii mi kato, ho hikha sannii atañmi;

³⁰mohlu annii giiliñ dalyi, nunu attoh kala la ho chindo daru hii aruñ doku hiila.

³¹Hii chulipa, niida nunu siika drih atañmi lyido pa kappa talyi, nunu chintolya Pinii ka Raddeganda hii aruñ doku hiila.

³² Jijeloda, ngo nunumi lukoso, siika santuñ atañ lyukiñ make hikha siika atañ lyima rampa.

³³ Dariiganda la kiiddiapiñ nyi lyukiñdo, hojalo ngiika aguñ atañ lyukiñma.

³⁴ “Hojalo nunu attoh pa henditolya, hiila makoda nunuka ahha atañ hame rikiñ doke diigo la tango ho siika sango mika henaho, ho hiika allo hii nunuko aluñpada ke ahkiñ donii;

³⁵niimpalukoda siikasi hikha kiiddiapiñ haho hoka dunii miilañruko ahkiñdo.

³⁶ Hojalo hikha myodu mi katolya, kula dotolya nunuko alḛr dopa hikha siika drih lyiniiñ atañ hokii impo biila dopa, ho miyu ka Oho ka hataho dala dopa.”

³⁷ Ho allo karmyañmi mo piniiude ho tonsḛrtii, hojalo ayoh ho mo intii ho Olivet hiila luniiñ putoo ho imitii.

³⁸Ho aro konchiho hikha miyuatañ mohko ahtii piniiude ho mohka luniiñmi tadupa.