Read Apatani LUK 22 Bible Online

LUK 22 - Apatani bible

LUK 22

¹ Siisi Ipomiiyo manii Yatañ dituñ sodu tunii tiiku, nii mina Impobiiniiñ lutii nii.

²Ho nyibu burii atañ la pagenii atañ niihtañ pana mohmi siido pa miichinii hiila mela dotii; niimpalukoda mohlu miyu atañmi biisotii.

³Ho Saitan Judas Iskariot hiila lunii boko ahtiiku, alyañlenye hoka dabonii kone;

⁴mo intiiku ho nyibu burii la sabii atañ agiñho lusu lumyo siitii niihtañ pape mo mohmi mohluko ho talubalo talyinii hiila.

⁵ Ho mohlu hempyotii, ho mohmi tiicko bidupa hiila lumyotii.

⁶Hopa mo taliitii, ho mohmi talubalo dupa hiila myodu aya mi mela dotii miyu atañka nyima doho hiila.

⁷ Ho Ipomiiyo manii Yatañ dituñ allo hii ahtii, nii allo hona impobiiniiñ subuñ atu mi membi kendo nii.

⁸ Hopa Jisu Pitar la Jon nyimi kiiniñ biido, lubiidola, “Inge ho miimyo he impobiiniiñ mi ngunupa, ngunu hiimi diidupa.”

⁹Mohlu mohmi lutii, “No ngunumi siimi miimyo hete hiila?”

¹⁰Mo mohlumi lutii, Kato, niida nunu citi ho ahchi, miyu kone yasie pinta jobii tola nunu kappa kendoke; mo kiiliñ ho imbo tolya ude ho nohna mo ahchinii,

¹¹ho ude attoh mi lukoto, “Tonsḛrbo niimi ludoke, Nohna nyibo duko chidii donii, nohna Ngo impobiiniiñ mi ngiika henjeajiñ atañ agiñho diikiñ donii?

¹²Ho mo nunumi ayoh daka hempḛr chidii pero miimyo tola doniimi kakiñ kendoke; hiiko miimyo he.”

¹³Ho mohlu intii, ho mohka mohlumi ka luniiñ chuli kappatii; ho mohlu impobiiniiñ mi miimyotii.

¹⁴ Ho myodu ahku kiile, mo diitananii ho dutii, ho kiiniñkonii atañ hii mo agiñho.

¹⁵ Ho mo mohlumi lutii, “Ngo nunuka agiñho hempḛr diibo nando siika impobiiniiñ mi ngiika heru hema rampa;

¹⁶ niimpalukoda ngo nunumi lukoso Ngo siimi diitema nii dahepa Pinii ka raddeganda ho si lyipe tama.”

¹⁷ Ho mo turla mi jola la, ho payapacho lula la mo lutii, “Siimi lato, nunuka punkoho tache siito;

¹⁸ niimpalukoda ngo nunumi lukoso siisikiija Ngo tantema siika roahee ka alha mi nii dahepa Pinii ka raddeganda ahtema.”

¹⁹ Ho mo yatañ mi tula la, ho mo payapacho lula la mo hiimi petutii ho mohlumi bitii, lubiidola, “Siikasi ngiika apoke nunu paka biniiñ. Siimi miitolya ngiimi hempa hengi naniiñpa.”

²⁰Ho hii chulipa diila lala turla mitrḛ, lubiido, Siika turla si nunu paka bipa limbi niike niti hemmesiiniiñ ngiika ai ho.

²¹Hojalo kato hiika alah mi huna ngiimi talubalo kendo nii hii ngiika agiñho du diitananii ho.

²²Niimpalukoda miyu ka Oho hii lyikiñdo luto laka dokoho; hojalo aiya hiila hembido hiika miyu mi huna mohmi talubalo danii!

²³Ho mohlu kone anyañ mi taka risutii, hupe hiikahii siimi ka miisa niisi.

²⁴ Mohluka punko chesu ritii, humilyape mohluka punkoho kahe japa khiikiñ donii.

²⁵ Ho mo mohlumi lutii, Midomiyu atañka radde hii mohlumi attoh lyigiidu; ho huna mohlupa otority ho dunii hiimi hembyuñ bo hiila ludu.

²⁶ Hojalo nunuka agiñho hiila lyikiñ make; hiilamapa nunuka punko hoka kahe jahii atu japa dukiñ doke, sangiinii bo miira pake.

²⁷ Niimpalukoda huyape kahelyanii, diitananii hoka duniibopeha, malo huna miiho donii hiipeha? Hu diitananii ho du hiima siipeha? Hojalo Ngo nunuka punkoho hiika miihoniiñ chuli boke.

²⁸ “Nunu hiika atañ ke hutiina ngiimika tenkako agiñho dakañ monkiñ donii;

²⁹ ho Ngo nunumi biso, niihtañpa ngiimi ngiika Aba bitii, raddeganda mi,

³⁰ niimpalukoda nunu ngiika diitananii ho ngiika raddeganda ho diibo tambo kendoke, ho radde duko ho dula Isrel ka halu tolyañ lenye mi kagii kendoke.

³¹“Saimon, Saimon, kato, Saitan niimi biichi hiila lula doke, niimpalukoda mo niimi kapa lindupa amo chitañ,

³² hojalo ngo niipa kubi tiike niika henje mi huhi madopa; ho niida no hiira ahkur talyiku, niika anubarmii atañmi alḛr giiniipa.”

³³ Ho mo mohmi lutii, “Attoh, ngo niika agiñho ho shiidu pajalo ho dordu pajalo imbo dupa hendi duke.”

³⁴Mo lutii, “Ngo lukoso, Pitar, siilo allo so paro khokiñ make, nii dahepa no ngiimi rohiñhe mapah tama ngiimi chima hiila.”

³⁵ Ho mo mohlumi lutii, “Ngiika nunu mika chiru malo lera malo nyotananii bagii mapa ka kiiniñ lyiho, hang henkhii nepeha?” Mohlu lutii, “henkhiimane.”

³⁶ Mo mohlumi lutii, “Hojalo siisi, hukiina chiru donii hiimi biike nento, ho hiichulipa lera miilañmi. Ho hukiina ilyo nyimanii hii attoh ka pulye mi pyula lala ho sohe riibii to.

³⁷Niimpalukoda ngo lukoso nunumi siika piniiaguñsi ngiiko lyipe kendo lodake, ‘Ho mohmi talemiilenii atañ agiñho khiita monkiñdo’; niimpalukoda nii hiila ketola do ngiika piigo mi hiika hiimi lyipe kiinekendo.”

³⁸Ho mohlu lutii, “Kato, Attoh, si ilyo sonye do.” Ho mo mohlumi lutii, “Siikasi khe doke.”

³⁹ Ho mo lintii, ho intii, mohka dumiñ muju lyiniiñ, Olives Putoo ho; ho henjeajiñ atañ mohmi imbo montii.

⁴⁰ Ho mo hiikoho ahchi biila mo mohlumi lutii, “Kuto niimpalukoda nunu tenkalarka ho huhi madopa.”

⁴¹Ho mo mohlukii hokii yalañ kuchi ko lohe adoh insagiitii, ho liibañ khanga la ho kutii,

⁴² “Aba, no miila kendo milo, siika heru siimi ngiiko hokii lapa tope; ngiika henko homapa, hojalo niika henko jaho, doke nento.”

⁴³ho hiikoho mohko dariiganda hokii miidopopi ahtii, mohmi tamogiitii.

⁴⁴Ho herubiidola mo hempḛr uropa kutii; ho mohka hubiñ hii ai chuli kiiddi ho duhitii

⁴⁵Ho mo kuniiñ mi kuja tekula guri kula, mo henjeajiñ atañ ko ahtii ho mohlumi herula imila dopa kappa biido,

⁴⁶ho mo mohlumi lutii, “Niimpa nunu imi la do? Gurito ho kuto nunu tenkalarka ho huhi madopa.”

⁴⁷ Mohka lula dorañpa, hiiko miyuabuje ahtii, ho Judas luniiñ miyu hii, alyañlenye hokii ka kone, mohlumi ingiitii. Mo Jisu ka aruñho ahtii mohmi mochu dupa;

⁴⁸hojalo Jisu mohmi lutii, “Judas, miyu ka Oho mi mochu biidola talubalo biilyinii?”

⁴⁹ Ho hutiina mo agiñho datiinii nii hiikahiiba ho lyitii kappa lala, mohlu lutii, “Attoh, ngunu ilyo la pachi peha?”

⁵⁰Ho mohluko hokii kone bukuñ nyibu ka miira mi patii ho mohka rubi yaroo mi papa lintii.

⁵¹Hojalo Jisu lutii, “Hiika hiiba ho miiba kuyo!” Ho mo mohka yaroo ho tenga biidola ho mohmi miipya bitii.

⁵²Ho Jisu lutii nyibu burii atañ la ho piniiude hoka sabii atañ ho amiabañ atañmi, hutiina mohmi chekho la ahtiinii, Nunu diipyo niimi ka lachañ ho latu pa ahdunii, ilyo adi biitola ho sipahi ingiila?

⁵³ Ngiika nunu agiñho allo karmyañmi piniiude ho daho, nunu ngiimi alah hetḛr tenka ma. Hojalo siikasi nunuka mudu myodu ke, ho kamo ka harchichike lo.

⁵⁴ Ho mohlu mohmi latutii ho mohmi sebiitii, mohmi bukuñ nyibu ka ude ho selii biitii. Pitar adhopa injo montii

⁵⁵ho mohlu yamu tige lala lengo ka liipa jaho ho miilañru tongepa dutii, Pitar tiirḛ dubotii mohluka agiñho.

⁵⁶Ho nyimii miira kone, mohmi hutoh byoko dalyi dunii mi kappa lala ho mohmi kadi lala, lutii “Siika miyu sitrḛ mo agiñho dabo ne.”

⁵⁷Hojalo mo mapa siitii, lubiidola, “Annii akha, Ngo mohmi chimake.”

⁵⁸Ho ichuche dahi damo lala koneya hiira mohmi kappa lala ho lutii, “No tiirḛ mohluka agiñ hoka dabo monii kone.” Hojalo Pitar lutii, “Miyusi, Ngo make.”

⁵⁹Ho gunta tahe dala lala hiira kone luti luti, lubiido, “Jijeloda siika miyusi mo agiñho dabo monii; niimpalukoda mo Galili hokii.”

⁶⁰Hojalo Pitar lutii, “Miyusi, Ngo chima niika luniiñmi.” Ho ohepada, mohka lula dorañpa, paro khoritii.

⁶¹ Ho Attoh mokur biila ho Pitar mi kadi tii. Ho Pitar Attoh ka luniiñmi hempa ritii, niihtañpa mo mohmi lutii, “Siilo paro khoma rampa, no ngiimi rohiñhe mapa kendo.”

⁶²Ho mo ago linkula ho hempḛr uropa khetii.

⁶³ Siisi miyuatañ Jisu mika latu biinii atañ mohmi nyapatii ho mohmi hitii;

⁶⁴mohlu mohmi amee pupyañ lala miilañ takatii, “Nyibuhenkato! Hu si niimi ka pitabo?”

⁶⁵Ho mohlu abuje mohmi nyapala lutii, mohmi haliila.

⁶⁶ Myodu ahku kiile, miyu atañka amiabañ atañ dakuñ siinyatii, nyibu burii atañ la pagenii atañ; ho mohlu mohmi bulyañ lusu ko ahgiitii, ho mohlu lutii,

⁶⁷ “No matiirḛ Kristo koda, ngunumi lukope.” Hojalo mo mohlumi lutii, “Ngo matiirḛ nunumi luko dokoda, nunu taje kemake;

⁶⁸ho ngo matiirḛ nunumi taka dokoda, nunu luko kema.

⁶⁹Hojalo siisi kiija miyu ka Oho Pinii ka harchichike lo lahbi alah dalyiho dukiñ do.”

⁷⁰ Ho mohlu miilañru lutii, “No Pinii ka Oho ha, hokoda?” Ho mo mohlumi lutii, “Nunu luda ngo hiila.”

⁷¹Ho mohlu lutii, “Niitañ pyakonii ho ngunu anna dota? Ngunuloda tapa tii mohka aguñ loka luniiñmi.”