Read Apatani LUK 24 Bible Online

LUK 24 - Apatani bible

LUK 24

¹ Hojalo kanualo ka lotu allo jaho, jimijama dorañpa, mohlu byuhkhiiñ ho intii, mohluka miimyonii poh neliisanii mi biila.

²Ho mohlu yalañ mi byuhkhiiñ hokii giipa tola dopa kappa biido,

³hojalo mohlu ura ho ahtii mohlu apo mi kappa matii.

⁴Mohlu siimi hendḛr lamapa dakele, kato, miyu anye mohluka aruñho datii puloo pulye giitola;

⁵ho mohlu biisola ho mohluka nyimo mi kiiddi ho chuki tola datii, mo anye mohlumi lutii, “Niimpa nunu turnii mi shiinii ka apurho medu?

⁶ Hendḛr nyato nii hiila mo nunumi lukone, mohka Galili hoka darañ ho,

⁷miyu ka Oho mi ingyamiigyanii miyuatañ agiñho nembi kendo loda, ho ledala menkiñdo, ho allo lohiñ niiho turi kendo.”

⁸Ho mohlu hendḛr ritii mohka luniiñ atañmi,

⁹ho byuhkhiiñ hokii ahkur bukula mohlu hikha siika siimi alyañlenkuñ hemi ho hikha khiibe atañmi lukotii.

¹⁰ Siisi Mary Magdalen ho Joanna ho Jems ka annii Mary ho khiibe annii akha atañ mohluka agiñ hoka dabo monii atañ kiiniñ koniiñ atañmi siimi lukotii;

¹¹hojalo siika luniiñ atañsi mohlupa taje dopa lyimatii, ho mohlu taje matii mohlumi.

¹²Hojalo Pitar gurila ho byuh ho haratii; nyangala ho kakatii, mo apunaniiñ pulye mi kontii kappatii; ho mo ude ho intiiku hemur biidola lyiniiñ atañmi

¹³Hiika allo jaho mohluko hokii anye Imas luniiñ lemba ho ila dotii, Jerusalem hokii nyatu polyañlekuñ hepa adhotii,

¹⁴ho mo anye lurii lujo siibiila hikha hiika lyiniiñ piigomi.

¹⁵Mo anye lujo siibii la ho anyeru takasiila do ho, Jisu mo aruñ ahla ho mo anye agiñho imbo montii.

¹⁶ Hojalo mo anye ka amee mohmi kala matii.

¹⁷Ho mo mohlumi lutii, “Niinyi koke siibiitola iladola nii mina si lusudunii?” Ho mo anye damotii, heru biisupala.

¹⁸Ho mo anye kokii kone, Kleopas hiila armyañ, mohmi lusitii, “No kontii siima siipeha Jerusalem hoka soha la ahnii chimanii siilo biilyo ka drih lyila doniimi?”

¹⁹ Ho mo mo anye mi lutii, “Nii drih atañmi?” Ho mo anye mohmi lutii, Nazaret ka Jisu ka piigo micho, nyibuhenii, tamo miiniiñ luniiñ Pinii la hikha miyu atañka hataho,

²⁰ho niihtañpa ngunuka nyibu burii atañ la sangii nii atañ mohmi shiidopa lohe khiipa liibiine, ho mohmi ledabiine.

²¹Hojalo ngunu hentiñ to mohsii Isrel atañ mika tupya saniibo hiila. Ḛh, ho hikha siika atañ sokiila, siilo allo lohiñ duku siika lyiniiñsi.

²²Hiika hahoho, annii akha tonge ngunu agiñ hokii ngunumi hemur dopa miitii. Mohlu byuh ho datii arokonchiho

²³ho mohka apomi kappa matii; ho mohlu ahkur ku lujo habiila mohlu miidopopi atañmi mihu kapate hiila, huna lutiinii mo turla dake hiila.

²⁴ Ngunu agiñ hoka danii tonge byuh ho inne, ho annii akha atañka lunii chulipa kappatii; hojalo mohmi mohlu kappa matii.

²⁵Ho mo mo anye mi lutii, “Piicha anyesi, ho haso paka ahha henjebo hikha nyibuhenii atañka luniiñmi!

²⁶Hiila lyidopa lyimaneha Kristo siika drih atañmi heru hela la ho mohka tatukatu ho ahdupa?”

²⁷ Ho Mose kokii lyiribiila ho hikha nyibuhenii atañ ko lohepa, mo hikha piniipota mi lukolusi mo piigo paka drih lyila doniimi.

²⁸ Hopa mohlu aruñ ahchi tiiku mohluka lemba insa koho. Mo kakele hiimi adho yapa inkiñtii,

²⁹hojalo mo anye mohmi lyartii, lubiidola, “Ngiinyi agiñho dusa, niimpalukoda si kamo talyi kuke ho allo si loja lyikuke.” Hopa mo ahtii mo anye agiñho dubo dupa.

³⁰ Mo mo anye agiñho diitananii ho dukele, mo yatañ mi lala la ho lyantii, ho hiimi petutii, ho mo anye mi bitii.

³¹Ho mo anye ka amee kadḛr ritii ho mo anye mohmi kalatii; ho mo mo anye ka kata hokii lyuhitii.

³²Mo anye kone anyañmi lusutii, “Ngiinyi ahha abañla doma neha mohmika lembo ho luriila dolyiho, mohka ngiinyi paka piniipota mika lukolaka dolyiho?”

³³Ho mo anye hiika myodu jaho gurila ho Jerusalem ho ahkur tiiku; ho mo anye alyañlenkuñ hemi kappatii ho hutii na mohluka agiñho dabo montiinii,

³⁴ hiila lutii, “Jije loda Attoh turidokuke, ho Saimon ka agiñho ahtii!”

³⁵Ho mo anye lukotii niihna lembo ho lyitiinii, ho niihtañpa mo mo anye mi chindopa miitii yatañ mi petu biidola.

³⁶Mohlu siimi lula dokele, Jisu mohluka apurho datii.

³⁷Hojalo mohlu henaritii ho biisotii, ho mohlu yajiyallo mi kapa biido hentii.

³⁸Ho mo mohlumi lutii, “Niimpa nunu ahiare du, ho niimpa nunuka ahha ho taka siinyadu?

³⁹Kato ngiika alah mi ho ngiika alihmi, siikasi ngosuke; ngiimi gakkato, ho kato; niimpalukoda yajiyallo kii ayya la alloh nyi giimake nunu ngiimika kappa niihtañpa.”

⁴⁰Ho mo siimi lulala, mo mohlumi mohka alah la alih nyimi kakiñtii

⁴¹Ho mohluka hempyo niimi la hemurniimi, hemmola dorañpa, mo mohlumi lutii, “Nunuko so hang diisa doha?”

⁴²Mohlu mohmi ngiiyyi peniiñ pere bitii,

⁴³ho mo hiimi latii ho miilañ ruka kado pa diitii.

⁴⁴ Ho mo mohlumi lutii, “Siika aguñ atañsi ngiika luniiñ ke nunumika, ngiika nunu agiñho darañ ho, kapane ngiika piigo mi ketolaka doniiñ mi Mose ka dapo ho, ho nyibuheniiñ atañ ko ho assañbiisie nii atañmi lyipe loda kiine dupa.”

⁴⁵Ho mo mohluka ahiñ mi miiko bitii piniipota mi tala kiine dupa,

⁴⁶ ho mohlumi lutii, “Hiila siikasi ketii, Kristo heru henkiñ doke ho allo lohiñ niiho turikendoku shiiniiñ hokii,

⁴⁷ ho hiika henkur niimi ho ingyamiigyanii atañ hokii ka hello kuniiñ mi hikha ganda atañ ho tonsḛrkhenyo kendo mohka armyañ pa, Jerusalem hokii lukoribiila.

⁴⁸Nunu siika drih atañka hakipa dulyike.

⁴⁹ Ho kato, ngo ngiika Aba ka hemme niimi nunuko kiiniñ biilyi ke; hojalo citi ho dutolya, niidayepa nunumi haho hokii harchichike mi agiitama.”

⁵⁰Ho mo mohlumi ingiitii Betany kane adholohepa, ho mohka alah mi yucha lala mohlumi lyantii.

⁵¹Mohka mohlumi ka lyala doho, mo mohluka agiñ hokii intiiku, ho dariiganda ho chagii kotiiku.

⁵² Ho mohlu Jerusalem ho ahkurtiiku hempḛr hempyo biidola,

⁵³ho piniiude ho dukañ patii Pinii mi assañla.