Read Apatani LUK 7 Bible Online

LUK 7 - Apatani bible

LUK 7

¹ Mohka hikha kolobiisie mi luja kulala miyu tala danii atañ kokii mo Keparnam ho ahtii.

²Siisi sipahi sabii ko mohka heniiñ miira ako dutii, hii achihla ho shiipa miitiiku.

³Mo Jisu mi tapa lala, mo Jew hokii amiabañ atañmi mohko kiiniñtii, mohmi ahla ho mohka miira mi miipya tope lungepe hiila.

⁴Ho mohlu Jisu ko ahbiila, mohlu hempḛr uropa yarbiido, lubiidola, “Mo khiiniiñpa lyidoke nohlo siimi mohpa miiko dupa,

⁵ niimpalukoda mo ngunu ganda mi hendo, ho mo ngunuka sinagog mi pembi.”

⁶Ho Jisu mohluka agiñho imbo montii. Mo ude hokiila ano adho kumatii, sipahi sabii mohka ajiñmi mohko kiiniñtii, mohmi lubiidola, “Attoh, no atohmi renge miipa siiyo, niimpalukoda ngo nohlo ngiika ude ho ako dupa khiiniiñpa lyimake;

⁷hopa ngotiirḛ niiko ahdo pa khiiniiñpa lyima. Hojalo aguñpa ludatope, ho ngiika miira mi miipya kenda doke.

⁸Niimpalukoda ngotiirḛ ngiimika otority yako dadu, ngiika ura ho sipahi mi dagiila: ho ngo kone mi ludu, ‘Inge,’ ho mo indu; ho koneyami, ‘ahto,’ ho mo ahdu; ho ngiika miirami, siimi miito, ho mo hiimi miidu.”

⁹Siimi Jisu tapa lala mo mohmi hemurtii, ho mokur biila mohmika imbo monii miyu atañmi lutii, “Ngo nunumi lukoso, Isrel hotiirḛ ngo sitañ henjenii kapama.”

¹⁰Ho hiika mohkoka kiiniñ konii atañ ude ho ahbii kukele, mohlu miira mi hempyo dokupa kappa biidoku.

¹¹ Nyibyaloda hiikahiiba ho mo Nain luniiñ citi ho intii, ho mohka henjeajiñ atañ la hempḛr miyu taro mo agiñho imbotii.

¹²Mo citi ka hagya aruñho ahchi kiile, kato, miyu koneka shiima mi joliñ biitii, mo annii ka hiiro kone kontii tii, ho mo hiimie kone; ho citi hoka hempḛr miyu taro mo agiñho dabotii.

¹³ Ho Attoh mohmi kappa lala, mo mohmi aroh ritii ho mohmi lutii, “Kheyo.”

¹⁴Ho mo ahtii ho jobiinanii mi tennetii, ho jobiibo atañ adu mapa datii. Ho mo lutii, “Yapa atu, Ngo niimi ludu, gurito.”

¹⁵Ho shiinii miyu hii guritii, ho lurii ritii. Ho mo mohmi mohka annii mi bitiiku.

¹⁶ Miilañru biiso nyatii; ho mohlu Pinii mi assañtii, lubiidola, “Hempḛr kaye nyibuhenii kone ngunu agiñho ahdo!” ho “Pinii mohka miyu atañmi kahatii!”

¹⁷Ho siika mo piigo mika lukoniiñ hii hikha Judia ho aruñare daka gandaho tapatatii patii.

¹⁸ Jon ka henjeajiñ atañ mohmi hikha siika drih atañmi lukotii.

¹⁹Ho Jon, mohka henjeajiñ anye mi gyotii, mo anye mi Attoh ko kiiniñtii, lubiidola, “No peha hiika ahsabo, malo ngunu koneyami kalya talyi peha?”

²⁰Ho miyuatañ mohko ahchibiila, mohlu lutii, “Jon Baptisma biniibo ngiinyi mi niiko kiiniñtii, lubiidola, ‘No peha hiika ahsabo, malo ngunu koneyami kalya talyi peha?’”

²¹ Hiika myodu jaho abuje achih-ahe ho doli achihnii atañmi ho diimmah yajiyallo atañmi mo miipya biido, ho abuje micha mitrḛ kappa dopa miitii.

²² Ho mo lusitii mo anye mi, “Inge ho lukohe Jon mi niinyi nii kappatii ho nii tapatii: micha kappa nyada ku, liicha indaku, tahikoya atañmi asetiiku, ho rubi tapa nyadoku, shiiniiñ turi nyadoku, arro atañmi aya puyu tonsḛr khenyotii.

²³Ho lyanko kendo huna ngiimi cherii nyamanii.”

²⁴Jon ka puyubakobo atañ inkukiile, mo miyu atañmi lurii ritii Jon ka piigomi: Niihmi nunu katepa siikhiisuru gandaho innyate? Pemu mika allyi heku niimiha?

²⁵Hokoda nunu niihmi katepa intehe? Miyu koneka pulye bolyo giiniiñ miha? Kato, huna anokapyo abitarii giidonii ho pepolelo pa sanda nii hiika atañ radde ude hoke dudunii.

²⁶Hokoda nunu niihmi katepa innyate? Nyibuhenii miya? Ḛh, ngo lukoso nunumi, ho nyibuhenii mi kayeyanii.

²⁷ Siikasi hiike humina ketiinii, Kato, Ngo ngiika puyubakobomi niimi kapyo yapa kiiniñ biilyi ke, mo niika lembo mi miimyo bikiñdo niimi kapyo yapa.

²⁸Ngo nunumi lukoso, nyimii loka wiinga bukonii atañ hokii Jon mi kaye yanii kone hetrḛ nyikiñma; hojalo huna Pinii ka raddeganda ho khiima japa danii hii mohmi kaye yake.

²⁹ (Mohlu siimi tapa lala hikha miyuatañ la biijokajo myanii atañ Pinii mi assañ nyatii, Jon loka baptisma biko nyatiinii;

³⁰hojalo Parisi atañ la dapo mika chiniiñ atañ tanyamatii Pinii nii piigopa mohlupa ahtii, mohlo baptisma biko mapa.)

³¹Siika santuñdaka miyuatañ siimi ngo nii mipe khiitiñ nanchinii, ho mohlu hu chuli dope?

³²Mohlu himme chulido biijḛr lengo hoka dunii hiilyañ ho kone anyañ mi gyosula, Ngunu niipa ellu bembitii, ho no nasu soma; ngunu herula gyutii, ho no khebo moma.

³³ Niimpalukoda Jon Baptisma biniibo ahla yatañ diima ho roalha tama; ho nunu luda, Mohko igii giidoke hiila.

³⁴Miyu ka Oho diila tala ahtii; ho nunu luda, Kato, diiretanche ho owtanga nii, biijokajo myanii atañ la ingyamiigyanii atañka ajiñ!

³⁵Hojalo chiniiñhii ludḛrkendo ke hikha mohka wiinga atañmi.

³⁶ Parisi kone mohmi mo agiñho diibope hiila lubiido, ho mo Parisi ka ude ho intii, ho mo diigo diiko dubotii.

³⁷Ho kato, citi daka nyimii kone, mo ingyamiigyanii kone, mo Parisi ka ude ho Jisu diigo diipa du hiila tapa lala, alabaster pinchu ho kutu biiliitii,

³⁸ho mo kiiliñ ho mohka liipiñ aruñho dala, khetii, mo mohka milabiniiñ hii Jisu ka liipiñ mi juja giitii, ho hiimi mo mohka adiñdimu lo nyupa bitii, ho mohka liipiñ mi mochutii, ho hiimi arrḛyartiiku kutu lo.

³⁹ Siisi Parisi mohmi gyolii bo hiimi kappa lala, mo atoh lusutii, “Siika miyu si matiirḛ nyibuhenii koda, mo chinkiñdo si hu ho niihtañ nyimii hiila huna mohmi tene biidonii, niimpalukoda mo ingyamiigyanii kone.”

⁴⁰Ho Jisu lusila mohmi lutii, “Saimon, Ngo niimi hang ako lusado.” Ho mo lusitii, “Hii nii, Tonsḛrbo?”

⁴¹“Tiicko nalyanii konekii nabiinii anye dutola; kone denarii langohe pagi giitii ho kone hii alyañlyangohe.

⁴² Mo anye bila kuma lyinii, mo anye rumi hello bitii. Siisi huyape uro yapa mohmi henkiñ donii?”

⁴³ Saimon lusitii, “Kone, ngo hendo, humina mo abuyapa hello bitiinii.” Ho mo mohmi lutii, “No ludiko jaho ludo.”

⁴⁴Hiikahiibaho annii akha kii dalyi mobo biila mo Saimon mi lutii, “No siika annii akha mi kappa duha? Ngo niika ude ho ahdu, no ngiimi yasie bima ngiika liipiñ pa, hojalo mo ngiika liipiñ mi mohka mila lo juja dopa miila lala ho hiimi mohka dimmulo nyupa biine.

⁴⁵No ngiimi mochu ma, hojalo ngiika ahda bii jaho hokii mo ngiika liipiñ mi mochu mongoma.

⁴⁶No ngiika dinta ho kutu nema, hojalo mo ngiika liipiñ mi arrḛyartiiku kutu lo.

⁴⁷Hopa ngo lukoso niimi, mohka ingyamiigyanii atañ, hempḛr abu, hiimi hello bitiiku, niimpalukoda mo uroyapa hentii; hojalo huna lamapa hello kotiinii, lama pasu hensu dunii.”

⁴⁸ Ho mo mohmi lutii, “Niika ingyamiigyanii atañmi hellotiikuke.”

⁴⁹Ho hutiina diigo diiko mo agiñho dubo tiinii mohluka punkoho lusu nyatii, “Hupe si, ingyamiigyanii atañ lohe pa hello danii?”

⁵⁰Ho mo lutii annii akha mi, “Niika henje ke niimi lyangur biinenii; chimie pa ingeku.”