Read Apatani LUK 8 Bible Online

LUK 8 - Apatani bible

LUK 8

¹ Hiikahiiba nyibyaloda mo citi atañ la lemba atañ ho intii, tonsḛrkhenyo ho Pinii ka raddeganda ka aya puyu mi babitii. Ho alyañlenye mo agiñho dabo montii,

²ho annii akha atañ miilañ hutiimina diimmah yajiyallo ho achih-ahe hokii miipya tiinii: Mary, Magdalen luniiñbo, hukohokiina kanuhe igii limpa tiikunii,

³ho Joanna, Chuza ka mihie, Herod kiimi ka kabiibo, ho Susanna, ho khiibe abujeta, siika atañsi mohluka injomiijo hokii mohlumi bitiiketii.

⁴ Ho hempḛr miyuabuje tongepa ahkele ho miyuatañ taun kone abi hokii mohko ahtii, mo lutiñnaniiñ lo lutii

⁵Lilonii kone kormo lilo tapa intii; ho mo lilo kiile, tange siiliñ ho chohitii, ho alih nyorpi biido, ho yapuñ hoka piita atañ pado biido hiimi.

⁶Ho tange yalañ ho chohatii; ho hii sancha kiile, hii sempatii, niimpalukoda hiiko siimḛr nyimatii.

⁷Ho tange tareapya ho chohatii; ho tare atañ sanchatii ho hiika hiimi halotii.

⁸ Ho tange aya kiiddi ho chohatii ho sanchatii, ho amoo giiliñtii lange. Mo siimi lula lala, mo gyotii, “Hukiina yaroo giidonii tadupa, hiimi take nento.”

⁹ Ho mohka henjeajiñ atañ mohmi takatii siika lutiñnaniiñ si nii hiisa niimi,

¹⁰mo lutii, Nunumi Pinii ka raddeganda khiibe chimma niimi chindopa bitola do; hojalo niimpalukoda khiibe atañmi lutiñnaniiñ hoke, hopa kasujalo mohlumi kachiñ madopa, ho tasujalo mohlumi tachiñ madopa.

¹¹ Siisi siika lutiñnaniiñ si hiilake: Kormo si Pinii aguñke.

¹²Siiliñ hoka chohido luniiñsi hutiina tapa nyatiinii; hiikahiibaho igii ahla ho mohluka ahha hoka aguñ giiniiñmi lara biitii, mohlumi henje madopa ho lyangur komadopa.

¹³Ho yalañ hoka chohanii atañ hiika atañke, mohlu aguñ mika tapa lyiho, hempyo biidola tage nyadu; hojalo hii liima giima, mohlu ichuche henje henka lala ho tenkalarka ahlyiho giihi dadu.

¹⁴Ho tareapya hoka chohi do luniiñsi, hiika atañke hutiina tadonii, hojalo mohluka lembo hoka ilyi kuho hena ho mingo ho sango ka hempyo hii lara biidu, ho mohluka ahee hii sanbyañ lama.

¹⁵Ho hiika aya kiiddi hoka chohinii atañ pakoda, hiika atañke, aguñmi tala lala, hiimi aya lodapa ho ahha aya ho tage giidu, ho pigii biidola ahee hiliñ giidu.

¹⁶ “Kone hetḛr muru mi tige lala piichañ lo lapiñma, malo dotananii ka ura ho atiima, hojalo hiimi ahii kosu atii siidunii, hujalo ahchi hutoh mi kappa dopa.

¹⁷ Niimpalukoda kone hetḛr achuñ tola dola kema hiimi kakiñ mapa, malo hang chimanii chimpa mapa nyikiñma ho hutoh ho ahkiñdo.

¹⁸ Hendi tolya nunuka talyi ho, niimpalukoda hukiina donii hiimi abuyapa bikiñdo, ho hukiina nyimanii, hokii niihna mo do hiila hensu donii hiimi tiirḛ lara biikiñdo.”

¹⁹ Ho mohka annii la mohka anuabañ atañ mohko ahtii, hojalo mohlu mohko ahchi lamatii niimpalukoda miyuabuje dako hopa.

²⁰Ho mohmi lukotii, “Niika annii la niika anuabañ atañ agosi da, niimi kappa nalha.”

²¹ Hojalo mo mohlumi lutii, “Ngiika annii la ngiika anuabañ atañ hiike huna Pinii aguñmi tadonii ho hiimi miidonii.”

²² Allo lohe mo huluho chatii mohka henjeajiñ atañ agiñho, ho mo mohlumi lutii, “Kiije ngunu siimie ka pache dalyiho bosa.” Hopa mohlu botii,

²³ho mohlu bola dokele mo imitii. Ho allyiaro miila siimie ho allyi hetii, ho mohlumi yasie poteje hipu chabiitii, ho ahiare ho dotii.

²⁴ Ho mohlu intii ho mohmi ahutii, lubiidola, “Atoh, Atoh, ngunu lyulyi ke ah!” Ho mo guritii ho allyi la lando poniiñmi gatii; ho hiika hii yanu ritiiku; ho hiiko hempḛr chimie tiiku.

²⁵Mo mohlumi lutii, “No nunuka henje?” Ho mohlu biiso nyatii, ho mohlu hemur nyatii, kone anyañ mi lubiidola, “Hupe hokoda siikasi, allyiaro la yasie mi lohepa galuñ ladonii, ho mohlu mohmi talii danii?”

²⁶ Ho mohlu Gerasene ka gandaho bochi tiiku, hiikahii Galili ka pache dalyiho dotii.

²⁷Ho mo kiiddi ho dahi dakele, hiiko miyu kone mi kappa biido citi hokii huko hona igii abuje giitiinii; hempḛr myodu abuje mo abitarii giimatii, ho mo ude ho dumatii hojalo byuh byuhkhiiñ atañ ho dutii.

²⁸ Mo Jisu mi kappa lala, mo gyuritii ho mohka hataho giihitii, ho lutii hempḛr goropa, “Nii miipa no ngiimi, Jisu, Hempḛr kaye Pinii ka Oho? Ngo niimi lyarlyike, ngiimi henga henkha miipayo.”

²⁹Niimpalukoda mo kacho yajiyallo mi miyu kokii linto kute hiila lutii. (Niimpalukoda hempḛr abuje mohmi ratii; mohmi dagur biitii, ho dachañ ranyi la dachañ tapḛr lo rato la atiitii, hojalo mo hiimi dure giila igii lo zabyo ho lingii kotii.)

³⁰Jisu ho mohmi tahiitii, “Niika armyañ nii hiila?” Ho mo lutii, “Legion”; niimpalukoda abuje igii mohko ahtii.

³¹Ho mohlu mohmi yartii mohlumi takhubiidañ ho tonge hiila luyo hiila.

³²Siisi putoo puko dalyi hempḛr taropa alyee mi ohho la dotii; ho mohlu yartii mohmi mohlumi hiika atañka uraho neliipe hiila. Hopa mo mohlumi apabitiiku.

³³Ho igii atañ miyu kokii lintiiku ho alyee atañko ahtii, ho alyee atañ bulu-biila dado hala siimie ka siilyo biilyo ho haratii ho hiiko chubañ hanyatii.

³⁴Ho alyee sornii hiika lyiniiñmi kappa lala, mohlu hargii nyatii, ho hiika hiimi citi la ganda nyiho luko nyatii.

³⁵Ho miyuatañ kate nyatii niihna lyitiinii, ho mohlu Jisu ko ahtii, ho huka miyu kokiina igii lintii kunii hiimi kappa biido, Jisu ka liipiñ aruñho dupa, pulye tarii giito kula ho hendḛr kula dupa; ho mohlu biiso nyatii.

³⁶Ho hutiina kappa nyatiinii hiimi mohlumi luko biido niihtañ pana mo igii lo jarpiñ konii mi miipya kotiinii.

³⁷Ho hikha Gerasene aruñare ganda daka miyuatañ mohmi mohluko hokii inge kute hiila lubiido; niimpalukoda mohlu hempḛr biiso nyatii; hopa mo huluho chakula ho inkur tiiku.

³⁸Hiika miyu igii lo jarpiñ kobii tola doniibo mohmi yarbiido mo miilañmi mohka agiñho ingiipe hiila; hojalo mo mohmi nenku biidoku, lubiidola,

³⁹“Niika udeho inkur heku, ho niimkane niipa Pinii miibitii hiimi lukohe.” Ho mo intiiku, hikha citi ho gyukotii niimkanena Jisu mohpa miibi tiinii.

⁴⁰ Siisi Jisu ahkur kukele, miyuatañ mohmi karii katañtii, niimpalukoda mohlu miilañru mohmi kalyala datii.

⁴¹Ho hiiko Jairas hiila miyu kone ahtii, sinagog hoka sangii laka danii; ho Jisu ka alih ho giihitii yarbiido mohmi mohka ude ho ahto hiila,

⁴²niimpalukoda mohkii kone kontiisii wiinga dusu tiinii, nyalyañ lenyepa lyitiiku, ho mo shiipa miila dotii. Mo ila dokele, miyuatañ mohmi nenje nengetii.

⁴³Ho annii akha kone hukiina ai nyalyañ lenye bila dotiinii ho kone lotrḛ miipya kola matiinii,

⁴⁴mohka kiiliñho ahbo montii, ho mohka pulye nyatañ mi tenetii; ho ohepada mohka ai biniiñhii bingo datii.

⁴⁵ Ho Jisu lutii, “Huna ngiimi tene biinenii?” Miilañru hiimi miima hiila lukele, Pitar lutii, “Atoh, niimi miyuatañ dakḛr pabiida ho niimi bumpu biido!”

⁴⁶ Hojalo Jisu lutii, “Kone ngiimi tenne biine; niimpalukoda Ngo hendḛrdo ngiiko hokii harchichike kone linne.”

⁴⁷Ho annii akha mo achuñ giila kema hiila kala lala, mo alye biidola lintii, ho mohka aruñho chuhala hikha miyu atañka tadopa lukotii niimpa mo mohmi tenneto hiila, ho niihtañpa mo ohepada hempyo datii.

⁴⁸ Ho mo mohmi lutii, “Wiinga, niika henje ke niimi hempyo dopa miibii nenii; chimie pa ingeku.”

⁴⁹Mohka lula dorañpa, miyu kone sangii niika ude hokii ahtii ho lutii, “Niika wiinga siido kuke; tonsḛr bomi ho ada ahiare miipa kuyo.”

⁵⁰Hojalo Jisu siimi tapa lala mohmi lusi biido, “Biisoyo; henje kontii henjeto, ho mo aya kendo kuke.”

⁵¹Ho mo ude ho ahbii kiile, mo kone mitrḛ mo agiñho ahbo kiine matii, Pitar ho Jon ho Jems kontii misu, ho himme ka annii-aba nyimi kontiisii.

⁵²Ho miilañru khela ho mohpa heru nyatii; hojalo mo lutii, “Khenyayo; niimpalukoda mo shiimake hojalo imi lasuke donii.”

⁵³Ho mohlu mohmi ngarpatii, mo shiidoku hiila chimbii tola.

⁵⁴Hojalo mohka alah mi gala lala mo gyotii, lubiidola, “Wiinga, gurito.”

⁵⁵Ho mohka yajiyallo ahkur tiiku, ho ohepada mo guri datiiku; ho mo lubiido diigo tango iche bito mohmi diike nendupa.

⁵⁶ Ho mohka annii-aba atañ hemurtii; hojalo mo mohlumi lubiido niihna lyitiinii kone mitrḛ luko lyayo.