Read Apatani JON 1 Bible Online

JON 1 - Apatani bible

JON 1

¹ Kapyojaho aguñ hii dotii, ho aguñ Pinii agiñho dotii, ho aguñ hii Pinii tii.

²Mo kapyo jaho hokii Pinii agiñho dutii;

³ kapane drih hii mohkokiila putii, ho mo nyima pa hang pumatii puto laka donii hiiniiñ heho.

⁴ Mohko sango hii dotii, ho sangohii miyu atañka hutoh.

⁵ Hutoh hii kamomi byohutii, ho kamohii hiimi domiñ lamatii.

⁶ Miyu kone dutii Pinii kokii ka kiiniñnii, hiika armyañ Jon hiila.

⁷Mo pyakodupa ahtii, hutohmi haki bidupa hiila, niimpalukoda miilañjami henje kiine dupa mohkokiila.

⁸Mo hutoh bomatii, hojalo hutohmi haki bidupa hiila ahtii.

⁹ Jijeka hutoh miyu kone abi mika byohu nii hii dohadolo ho ahtii.

¹⁰Mo dohadolo ho dutii, ho dohadolo mi putii mohmi pugi nambiila, hojalo dohadolo hii mohmi chimatii.

¹¹Mo mohka atoh ude ho ahtii, ho mohka atoh miyuatañ mohmi larii nyama tii.

¹² Hojalo hikha hutiina mohmi lariitiinii, hutiina mohka armyañ mi tajetiinii, mo harchichike mi bitii Pinii ka oho pa lyidopa;

¹³ hutiina buko tiinii, ai loma malo asiialyo ka henko homa malo miyu ka henko homa, hojalo Pinii kokiila.

¹⁴ Ho Aguñ hii asiialyo pa lyitii ho ngunuka punkoho duhatii, aroh-aya la jije poteje giitola; ngunu ko mohka tatukatu hii do, hiila ka tatu katu mo Aba ka hiiro kone kontii.

¹⁵ (Jon mohpa haki lyibitii, ho gyutii, “Siikasi hiike humina ngo lutonii, ‘Mo huna ngiika hiiba ho ahdonii ngiimi kaye yake, niimpalukoda mo ngiimi kapyo yatii.’”)

¹⁶ Ho mohka poteje doniiñ hokii ngunu miilañru lariitii, aroh-aya ka hahoho aroh-aya.

¹⁷ Niimpalukoda dapo hii Mose kokiila bitii; aroh-aya la jije hii Jisu Kristo kokiila ahtii.

¹⁸ Kone hetḛr Pinii mi kapama; Oho kontiisii, huna Aba ka harbiilapyo ho dunii, mo mohmi chindopa miitii.

¹⁹ Ho siikasi Jon ka pyakonii, Jew atañka nyibu atañ la Lebait atañ Jerusalem hokii la mohmi taka kiine dupa ka kiiniñ lyiho, “No huyape hiila?”

²⁰ Mo khakotii, mo amuh matii, hojalo khakotii, “Ngo Kristo make.”

²¹ Ho mohlu mohmi takatii, “Hokoda nii? No Elija ha?” “No nyibuhenii ha?” Mo lutii, “Ma ngoma.” “No nyibuhenii ha?” mohlu tahiitii. mo lusitii, “Ma.”

²²Mohlu mohmi lutii hokoda, “Hu no? Ngunumi lukonaniiñ bipe ngunu mika kiiniñbopa. No atoh mi nii hiila lusudu?”

²³ Mo lutii, “Ngo jabyo daka gyula donii kone hiike, Attoh ka lembo mi parda pa miibi to, nyibuhenii Aijaya ka lunii chulipa.”

²⁴Siisi mohlu Parisi atañ kokii kiiniñtii.

²⁵Mohlu mohmi takatii, “Hokoda niimpa no baptisma bidu, no matiirḛ Kristo makoda, malo Elija makoda, malo nyibuhenii makoda?”

²⁶ Jon mohlumi lusitii, “Ngo yasie lo baptisma bidu; hojalo nunuka punkoho kone da humina nunu chimanii,

²⁷hii ngiika hiiba hoka ahsabo, ngo mohka luku rappo nanii mika tapya binii patḛr lyima.”

²⁸ Siikasi Betany ho lyitii Jordan ka pacheho, nohna Jon baptisma bitiinii.

²⁹ Allo lohe yaho mo Jisu mi mohkii dalyi ahla dopa kappatii, ho lutii, kato, Pinii ka subuñ atu, huna dohadolo ka ingyamiigya niimi bapa bidonii!

³⁰ Siikasi hiike humina ngo lutonii, Ngiika hiiba ho miyu kone ahkiñdo ngiimika kaye yanii, niimpalukoda mo ngiimika kapyo yanii.

³¹Ngotiirḛ ya mohmi kachiñma; hojalo ngo sipa ahdu yasie lo baptisma bidupa hiila, niimpalukoda mohmi Isrel mi kakiñ kiine dupa.

³² Ho Jon haki pa lyibitii, “Ngo Yajiyallo mi yapuñ hokii pakoo chuli todo pa kapato, ho hiikahii mohko duhane.

³³Ngotiirḛ mohmi chima; hojalo mo huna ngiimi kiiniñ tiinii yasie lo baptisma binii pa ngiimi lune, ‘Huko hona no Yajiyallo mi todopa kappa talyinii ho duhadopa, hiike Darii Yajiyallo lo baptisma bikiñ donii.’

³⁴Ho ngo kappatii ho haki pa lyilyi siikasi Pinii ka Oho ke hiila.”

³⁵ Allo lohe yaho hiira Jon mohka henjeajiñ anye ka agiñho datii;

³⁶ho mo Jisu mi kaditii mo ila dokele, ho lutii, “Kato, Pinii ka subuñ atu!”

³⁷Henjeajiñ anye mohka siika luniiñ siimi tapatii, ho mo anye Jisu mi imbo montii.

³⁸Jisu mokurtii, ho mo anye mi imbo mondo pa kappatii, ho mo anye mi lutii, “Niinyi nii miidu?” Ho mo anye mohmi lutii, “Tonsḛrbo”, “No no dudu?”

³⁹Mo mohlumi lutii, “Ahto ho kakato.” Mohlu ahtii ho kappatii nohna mo dutiinii; ho mohlu hiika allo ho mo agiñho dubo montii, niimpalukoda hiika hii alyiñdalyi ka gunta tahepa lyitii.

⁴⁰ Hiika anye Jon ka luniiñ mika tapabo konehii, ho mohmika imbo moniibo, Andrew tii, Saimon Pitar ka anu.

⁴¹ Mo kapyopa mohka anu Saimon mi kappatii, ho mohmi lutii, “Ngunu Masiah mi kappa tiike” (siika luniiñsi Kristo mi).

⁴² Mo mohmi Jisu ko ahgii bitii. Jisu mohmi kaditii, ho lutii, “No Saimon, Jon ka oho ah? Niimi Cepas hiila myakiñ doke”

⁴³ Allo lohe yaho Jisu Galili ho inchi hiila hentii. Ho mo Pilip mi kappatii ho mohmi lutii, “Ngiimi imbo monto.”

⁴⁴Siisi Pilip Betsaida hokiitii, Andrew la Pitar nyika citi hokii.

⁴⁵ Pilip Natanel mi kappatii, ho mohmi lutii, “Ngunu mohmi kappatii humina Mose ketiinii dapo ka khetaho ho nyibuhenii tiirḛ ketiinii, Nazaret daka Jisu, Josep ka oho.”

⁴⁶ Natanel mohmi lutii, “Nazaret hokii hang aya drih lila kendo peha?” Pilip mohmi lutii, “Ahto ho kakato.”

⁴⁷Jisu Natanel mi mohko ahla dopa kappatii, ho mohmi lutii, “Kato, jije Isrel miyu kone, hukohona gollumisu giimanii!”

⁴⁸Natanel mohmi lutii, “Niihtañ pa no ngiimi kala du?” Jisu mohmi lusitii, “Philip ka niimi gyoma rampa, niika taro sannii aruñhoka daho ho, Ngo niimi kapato.”

⁴⁹ Natanel mohmi lusitii, “Tonsḛrbo, no Pinii ka Oho! No Isrel ka Radde!”

⁵⁰ Jisu mohmi lusitii, “Niimpa ngo niimi lutii, Ngo niimi taro sannii ka aruñho kapato hiila, no taje doha? No siika siimi kayeya drih atañmi kappa kendoke.”

⁵¹Ho mo mohmi lutii, “Jijeloda, jijeloda, ngo niimi lukoso, no dariiganda mi yako dopa kappa kendoke, ho Pinii ka miidopopi mi tola ho chala miyu ka Oho ka hahoho.”