Read Apatani JON 10 Bible Online

JON 10 - Apatani bible

JON 10

¹“Jijeloda, jijeloda, ngo nunumi lukoso, huna subuñdako ho alyeh pa amapa hojalo lembo byahe yapa giiha donii, hiika miyu hii diipyonii ho ronii;

² hojalo huna alyeh pa ahdonii hii subuñ mika sorniibo.

³Hiipa alyeh kalyabo miiko bikiñdo; subuñ mohka aguñmi tapa kendo, ho mo mohka attoh subuñ mi armyañ gyobiidola gyokiñdo ho mohlumi agoho lingii kendo.

⁴Niida mo hikha mohkiimi agoho lingii talyi, mo mohluka hataho inkiñdo, ho subuñ mo kiiliñ ho imbo kendo, niimpalukoda mohlu mohka aguñmi talado.

⁵Kachiñmanii mi mohlu imbo kema, hojalo mohlu mohkokii hargii kendo, niimpalukoda mohlu kachiñmanii atañka aguñmi tala ma.”

⁶ Siika lujju mi Jisu mohlumi luta nantii, hojalo mohlu tachiñ matii mo mohlumi nii hiila ludo hiila.

⁷Hopa Jisu hiira mohlumi lutii, “Jijeloda, jijeloda, ngo nunumi lukoso, ngo subuñ ka hagya ke.

⁸Hikha huna ngiimi kapyo yapa ahtiinii diipyonii ho ronii atañke; hojalo subuñ atañ mohlumi tage matii.

⁹Ngo hagya ke; hujalo matiirḛ ngiiko hopa ahchi, mo lyangur kokiñdo, ho ahkiñdo ho linkiñdo ho hiisañhiima diiko kapa kendo.

¹⁰Diipyonii ahdu diipyo pa kontiisii ho mempa ho pyadu lopasii; ngo ahdu niimpalukoda mohlumi sango kapa kiine dupa, ho hiimi poteje giike nendupa.

¹¹ Ngo denki subuñsornii ke. Denki subuñsornii mohka sango mi hempa siibidu subuñ atañpa.

¹²Humina ajho tiinii ho subuñsornii manii, huka subuñ na mo atoh kiimanii, siipya mi ahla dopa kapa lala ho subuñ mi apatela ho hargii du; ho siipya mohlumi chibiidu ho mohlumi mompya monsa du.

¹³Mo hargiidu niimpalukoda mo ajho konii ho subuñ atañpa hang hena giima.

¹⁴Ngo denki subuñsornii ke; ngo ngiikii attoh kiimi chindu ho ngiikii ngiimi chindu,

¹⁵ niihtañpa Aba ngiimi chindu ho ngo Aba mi chindu; ho ngo ngiika sango mi subuñ atañpa hempa bidu.

¹⁶ Ho ngiikii ponge ya subuñ da, hiika atañhii siika giiri hokiima; ngo mohlumi tiirḛ ahgii kendo, ho mohlu ngiika aguñmi tage kendo. Hopa hiikaho subuñ tonge, subuñsornii konesii dakiñ siidonii,.

¹⁷Siika piigopa Aba ngiimi hendo, niimpalukoda ngo ngiika sango mi hempa bitii, hiimi ngo hiira laku dukupa.

¹⁸ Kone hetḛr hiimi ngiiko hokii labii lakiñma, hojalo ngo ngiika henko ho hiimi hempa bikiñdo. Ngiiko hiimi hempa bina naniipa harchichike giido, ho ngiiko hiimi ka lakur nanii patḛr harchichike giido; siika miisaniimi ngo ngiika Aba kokii labii.”

¹⁹ Hiiko hiira Jew atañka punkoho tache ritii siika aguñ atañpa.

²⁰ Abuje mohlu lutii, “Mohko igii giido, ho mo rundo ke; niimpa mohka luniiñ tadu?”

²¹ Tange lutii, “Siika kolobiisie si igii poha koto laka luniiñ pa tama. Igii amee micha niimi kapa dopa miila kendo ha?”

²²Siikasi Tiiliibiniiñ ka dituñ tii Jerusalem ho;

²³ hii dorii piilo tii, ho Jisu piniiude ho ila dotii, Solomon ka hagya ho.

²⁴Hopa Jew atañ mohmi dakḛr pabiilala ho mohmi lutii, “Nii dahepa no ngunumi hendḛr lama dopa atiipa? No matiirḛ Kristo milo, didḛrpa ngunumi lukope.”

²⁵ Jisu mohlumi lusitii, “Ngo nunumi lukoto, ho nunu tajema. Siika miigo si ngo ngiika Aba ka armyañ pa miidu, hiikahii ngiimi haki bido;

²⁶ hojalo nunu henje nyama, niimpalukoda nunu ngiika subuñ hokiima.

²⁷Ngiika subuñ ngiika aguñmi tadu, ho ngo mohlumi chindu, ho mohlu ngiimi imbo du;

²⁸ho ngo mohlumi santḛrlamanii sango bidu, ho mohlu iche hetḛr lyukiñma, ho kone hetḛr mohlumi ngiika alah hokii robii lakiñma.

²⁹Ngiika Aba, huna ngiimi mohlumi bitiinii, miilañrumi kaheja, ho kone hetḛr mohlumi Aba ka alah hokii robii lakiñma.

³⁰ Ngo la ho Aba nyi konesii.”

³¹ Jew atañ hiira yalañ tubiinyatii mohmi ridu pa.

³²Jisu mohlumi lusitii, “Ngo nunumi abuje aya miigo atañmi kakiñtii Aba kokii; hiika atañ kiipa nunu ngiimi yalañ kupa miidunii?”

³³ Jew atañ mohmi lusitii, “Siikasi ngunu niimi aya miigo miiko hopa yalañ kumake hojalo nipakopa ke; niimpalukoda no, miyu sii, no attohmi Pinii pa miisudo.”

³⁴ Jisu mohlumi lusitii, “Hiila nunuka dapo ho ketola domasa, ‘Ngo ludu, nunu pinii ke’?

³⁵Mo matiirḛ mohlumi pinii hiila gyodo koda, hukohona Pinii ka aguñ hii ahtiinii (ho piniipota mi tache lakiñma),

³⁶nunu mohmiha ludu nii Aba ka dariimiila lala ho dohadolo hoka kiiniñ niimi, No nipadake, niimpalukoda ngo lutii, Ngo Pinii ka Oho hiila?”

³⁷Ngo matiirḛ ngiika Aba ka miigo atañmi miima milo, hokoda ngiimi henje yo;

³⁸hojalo ngo matiirḛ hiimi miido milo, nunu ngiimi henje majalo, miigomiiniiñ mi henje to, niimpalukoda nunu chindupa ho chila kendoke Aba ngiiko du ho ngo Aba ko du hiila.

³⁹ Hiira mohlu mohmi latupa miitii, hojalo mo mohluka alah ho ahma tii.

⁴⁰ Mo hiira Jordan ka pache dalyiho botii nohna Jon kapyopa baptisma bitiinii, ho hiiko mo dutii.

⁴¹Ho abuje mohko ahtii; ho mohlu lutii, “Jon hang kagiñnanii miima ne, hojalo kapane Jon siika miyu ka piigo mika luniiñ hii jije.”

⁴² Ho abuje mohmi henje nyatii hiikoho.