Read Apatani JON 11 Bible Online

JON 11 - Apatani bible

JON 11

¹ Siisi miyu kone achih la dotii, Betany daka Lajaras, Mary la mohka ammi Marta ka lemba ho.

² Siikasi Mary tii huna Attoh mi arrḛyartii nii kutu lo ho mohka alih mi mohka adiñdimu lo nyupa tii, huka barrona Lajaras achih la dotiinii.

³Hopa anuami nyi mohmi luliitii, lubiidola, “Attoh, no humina hendunii mo achihla doke.”

⁴ Hojalo Jisu siimi tapa lala mo lutii, “Siika achih niisi shiigii saniiñmake; siikasi Pinii mika assañdiilañ giisa niike, niimpalukoda Pinii ka Oho mi silo assañdiilañ giidu pa.”

⁵Siisi Jisu Marta la mohka anu Mary ho Lajaras mi hentii.

⁶Hopa mo mohmi achih la do hiila tapa lala, mo lonye abuyapa hiika gandaho datii nohna mo datiinii.

⁷Ho hiikahiibaho mo mohka henjeajiñ atañmi hiila lutii, “Kiije hiira Judia ho insa.”

⁸ Henjeajiñ atañ mohmi lutii, “Tonsḛrbo, Jew atañ siisi niimi yalañ kudu pa mela done, ho hiira no hiikoho impa ha?”

⁹ Jisu lusitii, “Allo lohe ho gunta talyañlenye domasa ehna? Hujalopa matiirḛ allo ho inchi, mo liichi make, niimpalukoda mo siika dohadolo ka hutoh mi kapa do.

¹⁰Hojalo hujalopa ayoh ho inchi, mo liichi du, niimpalukoda hutoh hii mohko nyima.”

¹¹ Hiila mo lubiido, ho mo mohlumi lutii, “Ngunuka ajiñ Lajaras imi dokuke, hojalo ngo mohmi imilaka doniimi ahu takiñdo.”

¹²Henjeajiñ atañ mohmi lutii, “Attoh, mo matiirḛ imi dokoda, mo hempyo kendoke.”

¹³Siisi Jisu mohka shiiniiñ mi lutii, hojalo mohlu hentii mo hemmo laka imila doniiñ mi ludo hiila.

¹⁴Ho Jisu tadḛrpa mohlumi lukotii, “Lajaras shiido kuke;

¹⁵ho nunu kiipa ngo hempyodo niimpalukoda ngo hiiko dama, niimpalukoda nunumi henje kiine dupa. Hojalo kiije mohko insa.”

¹⁶ Tomas, bupyuñ siiniiñ luniibo, mohka henjeajiñ ahiñ mi lutii, “Kiije ngunu miilañ insa, niimpalukoda ngunu miilañ mo agiñho shiibo dupa.”

¹⁷Siisi Jisu ahbii kiile, mo chimpabiido Lajaras byuh ho allo lope dotiiku hiila.

¹⁸Betany Jerusalem ka aruñho dotii, nyatu ponye hepa adhotii,

¹⁹ho abuje Jew atañ Mary la Marta nyika ude ho ahtola datii mo anye mi aroh robyuñ hala mo anye ka barro kiipa.

²⁰Marta Jisu ahla do hiila tapa lala, mo intii ho mohmi kappatii, Mary ude ho dusu tii.

²¹Marta Jisu mi lutii, “Attoh, no matiirḛ so datii koda, ngiika barro shiidiima.

²²Ho siisi jalo ngo chindo niijalo no Pinii kokii kuchi, Pinii niimi bikiñdo.”

²³Jisu mohmi lutii, “Niika barro hiira turku kendoke.”

²⁴ Marta mohmi lutii, “Ngo chindo mo hiira turku kendo kami allo hoka turiturku lyikuho.”

²⁵ Jisu mohmi lutii, “Ngo turiturku kunii la sango ke; huna ngiimi henje talyi nii, mo shiijalo, hojalo mo sankiñdo,

²⁶ ho hujalopa sando ho ngiimi henjedo hii iche hetrḛ shiikiñma. Nunu siimi taje doha?”

²⁷ Mo mohmi lutii, “ḛh, Attoh; ngo henjedo no Kristo hiila, Pinii ka Oho, mo huna siika dohadolo so ahkiñ neniiñ.”

²⁸Mo siimi lula la, mo ura ahtii ho mohka anu Mary mi gyobiido, chomyo pa lubiidola, “Tonsḛrbo si dake ho niimi gyodo ke.”

²⁹Ho mo siimi tapa lala, mo nyibya loda gurila ho mohko lintii.

³⁰Siisi Jisu lemba ho ahma tiirañ, hojalo hiira hiika lengo ho datii nohna Marta mohmi kapa tiinii.

³¹Jew atañ hutiina mo agiñho ude ho dutiinii, mohmi aroh robyuñla, Mary mi nyibya loda guri la ago hoka innii mi kapa biido, mohlu mohmi imbo montii, hiilahela mo byuh ho ila hiiko khedupa miido.

³² Ho Mary, nohna Jisu danii ho ahtii ho mohmi kappatii, mohka alih ho chuhatii, mohmi lubiido, “Attoh, no matiirḛ so datii koda, ngiika barro shiidii ma.”

³³Jisu mohmi khedo pa kapa lala, ho Jew atañka kheniiñ mitrḛ hutiina mo agiñho ahbo tiinii, mo uropa yajiyallo ho duritii ho henga henkhatii;

³⁴ho mo lutii, “No nunu mohmi alietii?” Mohlu mohmi lutii, “Attoh, ahla ho kakato.”

³⁵ Jisu khetii.

³⁶Hopa Jew atañ lutii, Kato niimkane mo mohmi hentii!

³⁷ Hojalo tange lutii, “Mo micha miyu mi mida dopa miinii bo siika miyu mi shiisa nii hokii atiñ lama yuha?”

³⁸ Ho Jisu, hiira hempḛr heru biidola, byuh ho ahtii; hii lampii tii, ho hiika agoho yalañ giipiñ tola dotii.

³⁹Jisu lutii, “Yalañ mi giipa to.” Marta, shiiniiñ boka barmii hii, mohmi lutii, “Attoh, siika myodu so naru kendo kuke, niimpalukoda mohka shiikunii allo lope duku.”

⁴⁰Jisu mohmi lutii, “Ngo luma siito ha no matiirḛ henje dokoda no Pinii ka tatu katu mi kapa kendoke hiila?”

⁴¹ Hopa mohlu yalañ mi giipa biido. Ho Jisu mohka amee mi kadu chalala ho lutii, “Aba, ngo niimi payapacho ludu niika ngiimika tage kopa.

⁴² Ngo chindo no kiirañ ngiimi tage du hiila, hojalo ngo siimi ludo siika miyu danii atañpa, niimpalukoda mohlumi henje kiine dupa no ngiimi kiiniñtii hiila.”

⁴³Mo siimi lula lala, mo goropa gyutii, “Lajaras, ago linto.”

⁴⁴ Miyu shiinii bo ago lintii, mohka alih la alah nyi jihiñ lo puto dotii, ho mohka nyimo hii pulye lo aputii. Jisu mohlumi lutii, “Mohmi tapya to, ho mohmi inke nento.”

⁴⁵Hopa abuje Jew atañ, hutiina Mary agiñho ahbo montii nii ho kappatii niihna mo miitiinii, mohmi henje tii;

⁴⁶hojalo tange hii Parisi ko intii ho mohlumi lukotii niihna Jisu miitiinii.

⁴⁷Hopa nyibu burii atañ la Parisi atañ bulyañ mi gyokuñ lala, ho lutii, “Niihpe ngunu miichi nii? Siika miyu si abuje kagiñnanii miibiido.

⁴⁸Mohmi matiirḛ sichuli pa miikañ kiine dokoda, kone abi mohmi henje kendo, ho Rom atañ ahla ho ngunuka darii lengo la ngunu ganda nyimi pyadu lokiñ do.”

⁴⁹ Hojalo mohluko hokii kone, Kaipas, hiika anyañ hoka bukuñ nyibu, mohlumi lutii, “Nunu hang chima lodake;

⁵⁰nunu chima pake, hiilaya aya yakiñdo nunupa miyu koneka shiipa biniiñ miyu atañpa, ho hikha ganda mi lyuke nensa byolo”

⁵¹Mo siikasi mo attoh pa lumatii, hojalo hiika anyañ hoka bukuñ nyibu pa lyilyinii mo nyibuhentii Jisu ganda pa siibi kendo hiila,

⁵² ho ganda kontii pamapa, hojalo Pinii ka oho atañmi gyokuñ dukupa hutiina adhoganda ho gyapya gyasa nyatiinii.

⁵³Hopa hiika allo hokiija mohlu takasiitii niihtañ pape mohmi mendu pa miichi nii hiila.

⁵⁴Jisu hopa kado pa Jew atañka punkoho inku matii, hojalo hiiko hokii ganda ka aruñare daka jabyo ho intii, Ephraim hiila taun luniiñ ho; ho hiiko mo henjeajiñ atañ agiñho dutii.

⁵⁵ Siisi Jew atañ Impobiiniiñ dituñ tunii tiiku, ho abuje mohluka ganda hokii Jerusalem ho intii Impobiiniiñ dituñ ka kapyo yaho, mohlu attoh mi darii miisu dupa.

⁵⁶ Mohlu Jisu mi mela dotii ho kone anyañ lusutii mohlu piniiude ho dala, “Nii hiila nunu hendo? Mo dituñ soko so ahdiima hendoha?”

⁵⁷Siisi nyibu burii atañ la Parisi atañ luliñtii hu kone jalo pa mo noh da chindo milo, mohlumi hiimi chinke nempe, niimpalukoda mohlu mohmi latu dupa.