Read Apatani JON 14 Bible Online

JON 14 - Apatani bible

JON 14

¹“Nunu ahha heru yo; Pinii mi henjeto, ngiimi miilañ henjeto.

² Ngiika aba ka ude ho abuje chidii doke; ho matiirḛ nyima lyimilo, ngo nunumi luko matoha ngo nunupa duko miimyo dupa ilyi ke hiila?

³Ho ngo ila ho nunupa duko miimyo tela, Ngo hiira ahkur talyi ho ngo nunumi ingii talyi, niimpalukoda noh ngo da ho nunu miilañmi dagii dupa.

⁴Ho nunu chindo lembomi ngo noh ilyi hiila.”

⁵ Tomas mohmi lutii, “Attoh, ngunu chima no noh ilyi hiila; niihtañpa ngunu chila kendo lembomi?”

⁶ Jisu mohmi lutii, “Ngoke lembo, ho jije, ho sango; kone hetḛr Aba ko ahla kema, hojalo ngiiko hopasii.

⁷No matiirḛ ngiimi chintii koda, no ngiika Aba mitrḛ chintii do; siisikiila no mohmi chindo ho mohmi kapa tiiku.”

⁸Pilip mohmi lutii, “Attoh, ngunumi Aba mi kakiñpe, ho ngunumi hembyañ biidopa.”

⁹ Jisu mohmi lutii, “Hiimkane diirii ngo nunu agiñho dabii lyiku, ho siisi lohepa no ngiimi chima rañ, Pilip? Huna ngiimi kapa tiinii hii Aba mi kappatii; niihtañpa no ludu, ‘Ngunumi Aba mi kakiñpe hiila’?

¹⁰No hiila henjema ha Ngo Aba ko da ho Aba Ngiiko da hiila? Ngiika aguñ niimi ka lurii niisi ngo ngiika atoh otority lo luma; hojalo Aba ngiika ura hoka duniibo mo mohka miigo atañmi miido.

¹¹ Henjeto ngiimi Ngo Aba ko da hiila ho Aba ngiiko da hiila; malo hojalo ngiimi henjeto niimpalukoda miigo miiniiñ atañpa.

¹²“Jijeloda, jijeloda, ngo nunumi lukoso, huna ngiimi henje talyinii hiitiirḛ ngiika miiniiñ chulipa miigo atañmi miikiñdo; ho siika atañ mitrḛ kayeya miigo miikiñdo, niimpalukoda ngo Aba ko ilyiku.

¹³ Niijalo nunu ngiika armyañ pa kuchi, Ngo hiimi miibi talyi, niimpalukoda Aba mi Oho ko assañ kiinedupa;

¹⁴niijalopa nunu ngiika armyañ pa kuchi, ngo hiimi miibi talyi.

¹⁵ “Nunu matiirḛ ngiimi hendo koda, nunu ngiika lujubiniiñ atañmi atii kendo.

¹⁶ Ho ngo Aba mi kuchi, ho mo nunumi Hembyuñnii koneya bikiñdo, nunuka agiñho ayu dahepa dabo niipa,

¹⁷jijeka Yajiyallo tiirḛ, humina dohadolo si larii lamanii, niimpalukoda mohmi kapa lama malo mohmi chinya ma; nunu mohmi chindo, niimpalukoda mo nunuka agiñho da, ho nunuko giikiñdo.

¹⁸“Ngo nunumi kapa tama ke; ngo nunuko ahchike.

¹⁹ Hojalo ichuche dahidamo lala, ho dohadolo atañ ngiimi kapa keñku ma, hojalo nunu ngiimi kapa kendo; niimpalukoda ngo turla dakiñdo, ho nunu tiirḛ turla dakiñdo.

²⁰Hiika allo ho nunu chinkiñdo ngo Aba ko da hiila, ho nunu ngiiko, ho ngo nunuko da hiila.

²¹Hii huko hona ngiika lujubiniiñ donii ho hiimi atii biido nii, hiike huna ngiimi hendo nii; ho hii huna ngiimi hendo nii ngiika Aba lo henko kendo, ho mohmi henchi ho ngo atohmi kakiñ siichi mohmi.”

²² Judas (Iskariot mapa) mohmi lutii, “Attoh, niihtañpa hii no atohmi ngunumi kakiñ siikiñ do, ho dohadolo mima pa?”

²³ Jisu mohmi lusitii, Miyu matiirḛ ngiimi hendo koda, mo ngiika aguñmi atii biikiñdo, ho ngiika Aba mohmi henkiñdo, ho ngunu mohko ahkiñdo ho ngunuka ude mi mohko penkiñdo.

²⁴Hii huna ngiimi hema nii ngiika aguñ atañ mitrḛ atiima; ho nunuka aguñ tapa niisi ngiikii make hojalo Aba kii huna ngiimi kiiniñ tiinii.

²⁵Siika drih atañmi ngo nunumi lubii lyike, ngiika nunu agiñho darañso.

²⁶Hojalo hembyuñnii, Darii Yajiyallo, humina Aba ngiika armyañ pa kiiniñ tiinii, mo nunumi hikha drih atañmi tonsḛr kendoke, ho nunumi hempa dopa miilyi diike hikha ngiika nunu mika luniiñmi.

²⁷Chimie mi ngo nunuko atii bibii lyike; ngiika chimie mi nunumi bibii lyike; dohadolo ka bichañ ho ngo nunumi bima lyike. Nunuka ahha heru yo, malo hiimi biiso kiine yo.

²⁸Nunu ngiika nunumika luniiñmi tapa biilyi, Ngo ilyi kuke, ho ngo nunuko ahchi ke. Nunu matiirḛ ngiimi hendo koda, nunu hempyo kendoke, niimpalukoda ngo Aba ko ilyi ke; niimpalukoda Aba ngiimi kahe yake.

²⁹ Ho siisi ngo nunumi lyima rampa luko lumyo biilyi ke, niimpalukoda niidana hiila lyichinii, nunumi henje kiine dupa.

³⁰ Ngo nunumi ano lurii lukañ takuñ make, niimpalukoda siika dohadolo mika sangiinii ahla do. Mo ngiimi harchichike giimiñ lakiñ make;

³¹ hojalo Aba ngiimi nii miito ludo hiimi siike ngo miisu dunii, niimpalukoda dohadolo mi chinke nendupa ngo Aba mi hendo hiila. Gurito, kiije ngunu insa.