Read Apatani JON 15 Bible Online

JON 15 - Apatani bible

JON 15

¹ Ngo jije rosannii ke, ho ngiika Aba rosannii mika miini niike.

²Halloh buhe abi ngiiko hoka giinii ahee hima koda, mo papa du, ho halloh buhe abi ahee hiniiñ mi mo miini du, niimpalukoda hiimi ahee abu yapa hike nendupa.

³ Nunumi darii miito kula dokuke ngiika nunumika aguñ luniiñlo.

⁴ Ngiiko giigela duto, ho ngo nunuko. Niihtañ pa halloh hii attohpa ahee hisu lama, nii dahepa hii rosannii ho giigela dutema, nunu tiirḛ hiila kema, nii dahepa nunu ngiiko giigela dutema.

⁵Ngo rosannii ke, nunu halloh atañ ke. Hu ngiiko giigela du, ho ngo mohko, hiika hii mo ahee abuje hikiñdo, niimpalukoda ngiiko hokii giisa tola nunu hang miila kemake.

⁶Miyu matiirḛ ngiiko giige makoda, mohmi halloh mika pachañ ho papadu ho sendu; ho halloh atañmi tukuñ lala, yamu ho gopa liidu ho hompa du.

⁷ Nunu matiirḛ ngiiko giige dokoda, ho ngiika aguñ nunuko giido koda, kuto niijalo nunuka heniiñmi, ho hiimi nunupa miibi kendoke.

⁸ Siika silo ngiika Aba assañkodu, nunuka abuje ahee hiniiñlo, ho ngiika henjeajiñ hiila kakiñ siito.

⁹Niihtañpa ngiika Aba ngiimi hendu, hiichuli ngo nunumi hendu; ngiika hennii ho giige tola duto.

¹⁰ Nunu matiirḛ ngiika lujubiniiñ mi atii dokoda, nunu ngiika heniiñ ho giigela dokiñdo, niihtañpa ngo ngiika Aba ka lujubiniiñ mi atii biidu ho mohka heniiñ ho giigedu.

¹¹Siika drih atañmi ngo nunumi luko biilyi ke, niimpalukoda ngiika hempyo hii nunuko doke nendupa, ho nunuka hempyo hii poteje dopa.

¹² “Siika sike ngiika lujubiniiñ, nunu kone anyañ mi hensu to ngiika nunu mika henchañho.

¹³ Simi kayeya miyu hennii nyikiñma, miyu attoh ka sango mi mohka ajiñ atañ paka hempa biniiñ.

¹⁴ Nunu ngiika ajiñ atañ ke nunu ngiika nunumika luniiñmi miido koda.

¹⁵Ngo nunumi miira hiila gyote kuma, niimpalukoda miira hii chima mohka atoh nii miido hiila; hojalo ngo nunumi ngiika ajiñ hiila gyodu, niimpalukoda hikha ngo niihna ngiika Aba kokii tapa tiinii hiimi nunumi chindopa miitii.

¹⁶ Nunu ngiimi kahe make, hojalo ngoke nunumi kahe tiinii ho bibiilyinii ingela ho ahee hidopa ho nunuka ahee mi giigela dopa; niimpalukoda niijalo nunu Aba mi ngiika armyañ pa kuchi, mohmi nunumi bike nendupa.

¹⁷Siika sike ngo nunumi lubii lyiniiñ, kone anyañmi hensu tolya.

¹⁸ “Dohadolo matiirḛ nunumi kanamapa miilyi milo, chintolya hii ngiimike kanamapa miidonii nunu mika miima rampa.

¹⁹Nunu matiirḛ dohadolo kiikoda, dohadolo hii henkiñdo mo attoh kiimi; hojalo nunu dohadolo kiima, ngo nunumi kahe tiiku dohadolo hokii, hopa dohadolo hii nunumi kanamapa miido.

²⁰ Henge giitolya dohadolo mi ngiika nunumika luko niimi, ‘Miira hii atoh mi kahe yama ke.’ Mohlu matiirḛ ngiimi miihimiire dokoda, mohlu nunumi miihimiire kendo; mohlu matiirḛ ngiika aguñmi atii biido koda, mohlu nunuka aguñ mitrḛ atii biikiñ doke.

²¹Hojalo hikha siika atañ siimi mohlu ngiika piigo pake nunumi miikiñ donii, niimpalukoda mohlu mohmi chima huna ngiimi kiiniñ tiinii.

²² Ngo matiirḛ ahma tiikoda ho mohlumi luma tiikoda, mohlu ingyamiigya diimmah; siisi mohlu mohluka ingyamiigya mi legii ko nyikuma.

²³Huna ngiimi kanamadonii ngiika Aba mitrḛ kanamapa miido.

²⁴Ngo matiirḛ mohluka punkoho mih kone katrḛ miimanii miigomi miima tiikoda, mohlu ingyamiigya diimmah; hojalo siisi mohlu kapa biineku ho ngiimi ho ngiika Aba ngiinyimi kanañ mapa miido.

²⁵Siikasi mohluka dapo hoka keto laka doniimi miipe kiine dupa, ‘Mohlu ngiimi hang miimapa kahu nyada.’

²⁶ Hojalo niidana Hembyuñnii ahchinii, humina ngo nunuko Aba kokii kiiniñ talyinii, jije ka Yajiyallo mitrḛ, huna Aba kokii lindonii, mo ngiipa haki lyibi kendo;

²⁷ ho nunu tiirḛ haki lyibi kendo, niimpalukoda nunu lotu jaho hokii ngiika agiñho da.