Read Apatani JON 16 Bible Online

JON 16 - Apatani bible

JON 16

¹“Ngo hikha siika simi nunumi ludu niisi nunumi giiyi kiine diila hiila.

² Mohlu nunumi sinagog ka agoho nempa lilyido; jije, myodu hii ahlado hujalopa nunumi menchi mohlu hensu kendo Pinii pasu miidunii hiila.

³Ho mohlu siika simi miikiñdo niimpalukoda mohlu Aba mi chima, malo ngiimi tiirḛ.

⁴Hojalo ngo nunumi siika drih atañmi lubii lyike, niimpalukoda niidana mohluka myodu ahchinii nunumi hempa kiine dupa siika atañmi ngo lukone hiiha. “Ngo siika drih atañ siimi lotu ho luma to, niimpalukoda ngo nunuka agiñho dato.

⁵ Hojalo siisi ngo ilyi ku mohko huna ngiimi kiiniñ tiinii; hojalo kone hetrḛ nunu ngiimi takama, ‘No noh impa?’

⁶Hojalo ngo nunumi siika drih atañmi luko biilyi, heru hii nunuka ahha ho poteje giido.

⁷ Hojalo ngo nunumi jije mi lukoso: siikasi nunuka aya kiipa ke ngo ile lyiniiñ, niimpalukoda ngo matiirḛ ima koda, Hembyuñnii nunuko ahkiñma; hojalo ngo matiirḛ indo koda, ngo mohmi nunuko kiiniñ bichi.

⁸Ho niida mo ahchi, mo dohadolo mi lyarkiñdo ingyamiigya ho denki ho ayakacho kanii ka piigo ho:

⁹ ingyamiigya piigomi, niimpalukoda mohlu ngiimi henje nyama;

¹⁰ denki ka piigomi, niimpalukoda ngo Aba ko ilyi, ho nunu ngiimi kapa keñkuma;

¹¹ ayakacho kaniiñ ka piigomi, niimpalukoda siika dohadolo mika sangiibo halii kotii.

¹²“Ngo abuje drih atañmi nunumi lukiñ dorañ, hojalo nunu hiika atañmi siisi henge giila kemake.

¹³Niida jije ka Yajiyallo ahchi, mo nunumi ingii kendoke hikha jije ho; niimpalukoda mo attoh ka otority lo lukiñ make, hojalo mo niihmi tapado hiimi sii lukiñ siido nii, ho mo nunumi luko kendo drih atañ ahsa niimi.

¹⁴ Mo ngiimi assañdiilañ kendo, niimpalukoda mo niihna ngiikii hiimi labii kendo ho hiimi nunumi luko kendo.

¹⁵Hikha Aba kii hii ngiikii ke; hopa ngo ludu mo niihna ngiikii hiimi labii kendo ho hiimi nunumi luko kendo.

¹⁶ “Ichuche dahi damolala, ho nunu ngiimi kapa keñkuma; hiira ichuche dala la, ho nunu ngiimi kapa kendo.”

¹⁷Mohka henjeajiñ atañ tange kone anya mi lusutii, “Niihpe siikasi mohka ngunumika luniiñsi, ‘Ichuche dahidamo lala, ho nunu ngiimi kapa keñkuma, ho hiira ichuche dala la, ho nunu ngiimi kapa kendo’; ho, ‘niimpalukoda ngo Aba ko ilyi ke’?”

¹⁸Mohlu lutii, “Nii hiila mo lusa niimi pe ‘ichuche dahidamo lala’? Ngunu chima mo nii hiila lusa niimi.”

¹⁹Jisu chintii mohlu mohmi taka nando hiila; hopa mo mohlumi lutii, “Hiila nunuka punkoho taka siinya danii, nii lusa niimi pe ngiika luniiñsi, ‘Ichuche dahi damo lala, ho nunu ngiimi kapa kema, ho hiira ichuche dala la, ho nunu ngiimi kapa kendo’?

²⁰ Jijeloda, jijeloda, ngo nunumi lukoso, nunu khekiñdo ho heru kendo, hojalo dohadolo hempyo kendo; nunu heru kendo, hojalo nunuka heru hii hempyopa lyiguh rikiñdo.

²¹ Annii akha ka hiijañ akhii chilyi ho mo herudu, niimpalukoda mohka myodu hii ahdoku; hojalo mo wiinga mi buku lala, mo achihchiniiñ mi hempa kuma, niimpalukoda wiinga mika dohadolo hoka buniiñ mi hempyo kopa.

²²Hopa nunuko siisi heru hii do, hojalo ngo nunumi hiira kapa talyi ho nunuka ahha hii hempyo kendoke, ho kone hetrḛ nunuka hempyo mi nunu kokii lara biila kema.

²³Hiika allo ho nunu ngiimi hang kukiñ kuma. Jijeloda, jijeloda, ngo nunumi lukoso, nunu matiirḛ niijalo Aba kokii kuchi, mo nunumi hiimi bikiñ doke ngiika armyañ pa.

²⁴ Siisijalo nunu hang kumarañ ngiika armyañ pa; kuto, ho nunu pakiñ doke, nunuka hempyo mi pote kiine dupa.

²⁵ “Ngo nunumi simi lutiñ nambii dola luko biilyi ke; myodu ahkiñ doke niidana ngo nunumi lutiñ nangku mapa hojalo pardapa Aba ka piigo mi luchinii.

²⁶Hiika allo ho nunu ngiika armyañ pa kukiñdo; ho ngo nunumi hiila lutema ngo Aba mi nunupa kutoso;

²⁷niimpalukoda Aba mo loda ya nunumi hendo, niimpalukoda nunu ngiimi hentii ho henjeda ngo Aba kokii ahdo hiila.

²⁸Ngo Aba kokii ahdu ho dohadolo so ahdu; hiira, ngo dohadolo mi apatela inchi ku ho Aba ko inchi.”

²⁹Mohka henjeajiñ atañ lutii, “ḛh, siisi no parda pa ludo, hang lutiñ namapa!

³⁰Siisi ngunu chindo no hikha drih atañmi chindo hiila, ho kone hetrḛ taka dopa lyima; sokii ngunu henjedo no Pinii kokii ahdo hiila.”

³¹Jisu mohlumi lusitii, “Nunu siisi henje dokuha?

³² Myodu ahlyi kuke, jije siisi ahdoku, nunu harpya hasa nyakiñdo, miyu kone abimi mohka ude ho, ho ngiimi kontii apa kendo; hojalo ngo kontii dakiñma, niimpalukoda Aba ngiika agiñho dakiñdo.

³³ Ngo siika simi nunumi lubii lyike, ngiikoho nunupa chimie hii dodopa. Dohadolo so nunuko hentḛrkanyi dolyi diike; hojalo ngarka jilya datolya, ngo dohadolo mi pamiñ tiike.”