Read Apatani JON 17 Bible Online

JON 17 - Apatani bible

JON 17

¹ Jisu siika aguñ atañmi luku lala, mo mohka amee mi yapuñ hahoho kacha lala ho lutii, “Aba, myodu ahdoku; niika Oho mi assañdupa niimpalukoda Oho niimi assañdupa,

²niimpalukoda no mohmi hikha miyu atañmi diimiñlumiñ ladopa harchichike bitii, santḛrlamanii sango bidopa humina no mohmi bitiinii.

³Ho siikasi santḛrlamanii sango, mohlu hiila chindokoda no kontiisii jije Pinii, ho Jisu Kristo humina no kiiniñ tiinii.

⁴Ngo niimi kiiddiapiñ so assañdiilañ biilyi, miigomi miipe lala niika ngiimika miido paka biniiñ mi;

⁵ ho siisi, Aba, ngiimi no niika agiñho tatukatu kiinepe hiika tatukatu ho nii mina ngo dohadolo mika puma rampa niika agiñho giitonii.

⁶“Ngo niika armyañ mi miyu atañmi chindopa miitii niika ngiimika dohadolo hokiika biniiñmi; mohlu niikii, ho no mohlumi ngiimi bitii, ho mohlu niika aguñmi talii biinyane.

⁷Siisi mohlu chindo amane drih niika ngiimika biniiñ hii niiko hokii hiila;

⁸niimpalukoda ngo mohlumi niika ngiimika aguñ biniiñ mi bitii, ho mohlu hiimi larii biine ho jije mi chindoku ngo niiko hokii ahdo hiila; ho mohlu henjedo no ngiimi kiiniñtii.

⁹ Ngo mohlupa kubidu; ngo dohadolo pa kubima hojalo hiipa humina no ngiimi bitiinii, niimpalukoda mohlu niikii;

¹⁰hikha ngiikii hii niikii ke, ho niikii hii ngiikii, ho ngiimi mohlukoho assañdiilañ da.

¹¹ Ho siisi ngo dohadolo so daku malyike, hojalo mohlu dohadolo so dalyi ke, ho ngo niiko ahlyi kuke. Darii Aba, mohlumi niika armyañ pa atii tokulya, humina no ngiimi bitiinii, niimpalukoda mohlumi konepa lyidopa, ngiinyi ka kone paka lyichañho.

¹² Ngiika mohluka agiñ hoka daho, ngo mohlumi niika armyañ pa atiito, humina no ngiimi bitiinii; ngo mohlumi dagur biito, ho kone hetrḛ lyuma hojalo lyusa boka oho kontii, piniipota mi lyipe kiine dupa.

¹³Hojalo siisi ngo niiko ahlyi kuke; ho siika drih atañmi ngo dohadolo so luko du, niimpalukoda mohluko ngiika hempyo mi mohlupa giitii pake nendupa.

¹⁴ Ngo mohlumi niika aguñmi bibii lyike; ho dohadolo si mohlumi kana malyike niimpalukoda mohlu dohadolo hokiima, niihtañpa ngo tiirḛ dohadolo hokiima.

¹⁵Ngo hiila kuma lyike no mohlumi dohadolo hokii labii heku hiila, hojalo no mohlumi diimmah hokii achuñ tolyape.

¹⁶Mohlu dohadolo hokii make, niihtañpa ngo tiirḛ dohadolo hokii ma.

¹⁷Dariimiito mohlumi jijeho; niika aguñ hii jije.

¹⁸Niihtañpa no ngiimi dohadolo so kiiniñtii, hii chulipa ngo mohlumi dohadolo so kiiniñ biilyi ke.

¹⁹Ho mohlu kiipa ke ngo atohmi tiilii siitiinii, niimpalukoda mohlumi tiirḛ jije ho tiiliisiike nendupa.

²⁰“Ngo siika atañpa kontii kuma lyike, hojalo hiika atañ patrḛ hutiina henje talyi nii mohluka aguñmi tala la,

²¹ mohlu miilañ rumi konepa lyike nendupa; niihtañpa no, Aba, ngiiko do, ho ngo niikii ho, hiichulipa mohlumi tiirḛ ngiinyi ko doke nento, niimpalukoda dohadolo mi henje kiine dupa no ngiimi kiiniñtii hiila.

²²Niika ngiimika tatukatu biniiñ mi ngo mohlumi bibii lyike, niimpalukoda mohlumi konepa lyike nendupa niihtañpa ngiinyi konepa lyidu,

²³Ngo mohluko ho no ngiiko, niimpalukoda mohlumi ayaloda konepa lyike nendupa, niimpalukoda dohadolo mi chinke nendupa no ngiimi kiiniñtii hiila ho mohlumi hento niihtañpa ngiimi no hendu.

²⁴ Aba, ngo hendo mohlutrḛ, humina no ngiimi bitiinii, ngiika agiñho dado koda nohna ngo danii, ngiika tatukatu mi kapa dopa niika ngiimika biniiñmi niika heniiñ ho dohadolo mika pumarampa.

²⁵O denki Aba, dohadolo niimi chima, hojalo ngo niimi chindu; ho siika atañ chindo no ngiimi kiiniñtii hiila.

²⁶Ngo mohlumi niika armyañ mi chindopa miitii, ho ngo siimi chindo miipa talyi, niimpalukoda niika ngiimika heniiñ chulipa mohluko hotiirḛ doke nendupa, ho ngo mohluko ho dodupa.”