Read Apatani JON 18 Bible Online

JON 18 - Apatani bible

JON 18

¹ Jisu siika aguñ atañmi luku lala, mo henjeajiñ atañ agiñho Kidron Pabupako pache dalyiho bodo, nohna balu ngohe dotiinii, hiiko mo la mohka henjeajiñ atañ ahtii.

²Siisi Judas, mohmika talubalobo, motrḛ chintii ganda mi; niimpalukoda hiikoho Jisu mi kiirañ mohka henjeajiñ atañ agiñho kappatii.

³ Hopa Judas sipahi tarotange yargiitii ho sabii tange nyibu burii atañ kokii ho Parisi atañ, yamu ho muru ho dankho panyi bitola intii.

⁴ Ho Jisu, hikha mohkoka lyisa niimi chimbii tola, lingila ho mohlumi lutii, “Humi nunu medu?”

⁵Mohlu mohmi lusitii, “Nazaret daka Jisu mi.” Jisu mohlumi lutii, “Ngoke hii.” Judas, mohmika talubalobo, mohluka agiñho dabo montii.

⁶Mo mohlumi, “Ngoke hii,” hiila lukele, mohlu kiiliñ sonkur linku lala ho kiiddi ho giiyitii.

⁷Hiira mo mohlumi tahiibiido, “Humi nunu medu?” Ho mohlu lutii, “Nazaret daka Jisu mi.”

⁸Jisu lusitii, “Ngo nunumi lukotii ngoke hii hiila; hopa, nunu matiirḛ ngiimi medu milo, siika miyu atañmi inke nento ku.”

⁹ Siikasi mohka aguñ luniiñmi lyipe kiine dupa lyitii, “Niika binii hokii kone mitrḛ ngo alyu make.”

¹⁰Ho Saimon Pitar, ilyo giisu lyinii, hiimi seliñ lala ho bukuñ nyibu ka miira mi patii ho mohka rubi yaroo mi papa lintii. Miira ka armyañ Malkas hiila.

¹¹ Jisu Pitar mi lutii, “Niika ilyo mi hiika hubyu ho hiilii giito ku; ngo ngiika Aba ka turla biniiñ mi takiñma ehna?”

¹² Hopa sipahi atañ la mohlumika dagiibo ho Jew atañka sabii atañ Jisu mi latutii ho mohmi ratii.

¹³Kappyopa mohlu mohmi Annas ko ahgiitii; niimpalukoda mo Kaipas ka attobotii, hiika anyañ ho mo bukuñ nyibu pa dutii.

¹⁴ Hiika hii Kaipas tii Jew atañ mika tonsḛrbo, hiilaya aya yakiñdo miyu koneka shiiniiñ hii hikha miyu mi hentola.

¹⁵ Saimon Pitar Jisu mi imbo montii, ho hiichulipa khiibe henjeajiñ tiirḛ. Siika henjeajiñ bukuñ nyibu mika chinsu lyiniiñ, mo bukuñ nyibu ka lengo ho ahbomontii Jisu ka agiñho,

¹⁶Pitar alyeh ka ago datii. Khiibe henjeajiñ hiitiirḛ, huna bukuñ nyibu kala tiinii, agoho lintii ho nyimii miira mi luriitii alyeh hoka kalya bomi, ho Pitar mi ura ho ahgiitii.

¹⁷ Nyimii miira alyeh mika kalya biiniibo Pitar mi lutii, “Notiirḛ siika miyu ka henjeajiñ atañ hokii kone masu ha ehna?” Mo lutii, “ngo hiila ma.”

¹⁸Siisi miira atañ la sabii atañ yamu pabitii, niimpalukoda hiikaho lakhiitii, ho mohlu dala ho mohlu atohmi yamu higyu siitii; Pitar tiirḛ mohluka agiñho dabo montii, dala ho mo atohmi higyu siitii.

¹⁹ Bukuñ nyibu Jisu mi mohka henjeajiñ atañ la mohka tonsḛr niika piigo mi takatii.

²⁰Jisu mohmi lusitii, “Ngo dohadolo mi tapa dopa luto; ngo kiirañ sinagog la piniiude ho tonsḛrto, nohna hikha Jew atañ ahkuñ nyadu nii; ngo lusila hang luma.

²¹Niimpa no ngiimi taka du? Hutiina tapa nenii hiimi ya taka hetiika, niihna ngo mohlumi lukotonii; mohlu chineke ngiika luniiñmi.”

²²Mo hiila siimi lukele, sabii kone hoka danii Jisu mi mohka alah lo pita biido, lubiidola, “sitañpa no bukuñ nyibu mi luko dunii?”

²³ Jisu mohmi lusitii, “Ngo matiirḛ lukha tiimilo, lukha niimi haki bito; hojalo ngo matiirḛ luda tiikoda, niimpa no ngiimi pita du?”

²⁴ Annas ho mohmi Kaipas bukuñ nyibu ko kiiniñtii.

²⁵ Siisi Saimon Pitar dala ho atohmi higyu siila dotii. Mohlu mohmi lutii, “Notiirḛ mohka henjeajiñ hokii kone masuha?” mo hiimi mapah siitii ho lutii, “ngo hiila ma.”

²⁶Bukuñ nyibu ka miira hokii kone, Pitar loka yaroo papa konii boka disho hokii kone, tahiibiido, “Ngo niimi balu ho mohka agiñho kapa masu toha ehna?

²⁷Pitar hiira hiimi mapah siibiido; ho ohepada paro khodatii.

²⁸ Ho mohlu Jisu mi Kaipas ka ude hokii raddeduko lengo ho ahgiitii. Hiika hii arro hotii. Mohlu hiika raddekalengo amatii, niimpalukoda mohlu miibḛr kodiila hiila, impobiiniiñ ka diigo diidupa.

²⁹ Hopa Pailet ago mohluko lintii ho lutii, “Nii hiila nunu siika miyu mi halii budu?”

³⁰Mohlu mohmi lusitii, “Siika miyu si matiirḛ diimmah miinii makoda, ngunu mohmi so ahgii bidiima.”

³¹Pailet mohlumi lutii, “Nunu mohmi sebii heku ho nunuka atoh dapo lo mohmi halii siito.” Jew atañ mohmi lutii, “Siikasi ngunuka mujuma mi miyu mi shiido paka miiniiñsi.”

³² Siikasi Jisu ka aguñ luniiñmi lyipe kiine dupa niihtañ shiigo na mo shiikiñ donii hiila kakiñ dupa.

³³Pailet hiira raddeduko lengo ho ahkur tiiku ho Jisu mi gyobiido, ho mohmi lutii, “No Jew atañka Radde ha?”

³⁴Jisu lusitii, “No siikasi atoh pa ludu nii, malo khiibemiyu niimi ngiika piigo mika luko niiha?”

³⁵Pailet lusitii, “Ngo Jew peha? Niika atoh gandaho nyibu burii atañ sii niimi ngiimi nembi siitii nii; no nii miibi tola?”

³⁶ Jisu lusitii, “Ngiika radde sangii saniiñ siika dohadolo somake; ngiika raddesangii saniiñ matiirḛ siika dohadolo hotii koda, ngiika miira atañ padudo, niimpalukoda ngiimi Jew atañ ko bike nendii ma; hojalo ngiika raddesangii saniiñ siika dohadolo hokii make.”

³⁷ Pailet mohmi lutii, “Hokoda no radde ha?” Jisu lusitii, “No ludo ngo radde hiila. Sipa ngo bukotii, ho sipa ngo siika dohadolo so ahdu, jije mi haki bidu pa hiila. Kone abi huna jije hokii nii hiika hii ngiika aguñmi tadu.”

³⁸ Pailet mohmi lutii, “Jije hii nii?” Siimi mo luku lala, mo hiira Jew atañ agiñho agoho lintii, ho mohlumi lukotii, “Ngo hang miigyanii mohko kapa ma.

³⁹Hojalo nunuko muju dodu miyu kone mi nunupa apa lila Impobiiniiñ dituñ ho; nunu hendoha ngiimi nunupa Jew atañka radde mi apalindo koda hiila?”

⁴⁰Mohlu hiira gyutii, “Siika miyu mima, hojalo Barabas mi!” Barabas diipyo niitii.