Read Apatani JON 19 Bible Online

JON 19 - Apatani bible

JON 19

¹Ho Pailet Jisu mi selii lala ho mohmi hike nembiido.

² Ho sipahi atañ tare hokii raddebyopa pa miila lala, ho mohka adiñ ho khelii biido, ho niiji pulye agii biido;

³mohlu mohko lohe chatii, lubiidola, “assañlyi, Jew atañka radde mi!” ho mohmi mohluka alah lo pita biido.

⁴ Pailet hiira agoho lintii, ho mohlumi lutii, “Kato, ngo mohmi nunupa lingii biilyi ke, niimpalukoda nunumi chinke nendupa ngo hang miigya nii mohko kapa ma.”

⁵Hopa Jisu agoho lintii, tare byopa la niiji pulye mi giitola. Pailet mohlumi lutii, “Kato siika miyumi!”

⁶Nyibu burii atañ la sabii atañ mohmi kala la, mohlu gyutii, “Ledato mohmi, ledato mohmi!” Pailet mohlumi lutii, “Nunu atohpa mohmi sebii he ho mohmi leda he, niimpalukoda ngo hang mohmi miigya nii kapa ma.”

⁷ Jew atañ mohmi lusitii, “Ngunu ko dapo do, ho hiika dapo kii dalyipa mo shiido pa lyido, niimpalukoda mo atohmi Pinii ka Oho pa miisuda.”

⁸Pailet siika aguñmi tapa lala, mo uro yapa biisotii;

⁹mo raddeduko lengo ho hiira ahkur biila ho Jisu mi lutii, “No nohkii pe?” Hojalo Jisu luko matii.

¹⁰Pailet hopa mohmi lutii, “No ngiimi lurii tama ha?” No chima po ngiiko niimi apadopa jalo harchichike hii do ho ledadopa jalo harchichike hii do hiila?

¹¹ Jisu mohmi lusitii, “Niiko ngiimi miila dopa harchichike hii lyidiima niimi ayoh hokii bima tiikoda; hiiko hopa huna ngiimi niiko nembi tiinii hii uro yapa ingyamiigya dake.”

¹² Siika luniiñ kiipa Pailet mohmi apalindupa hentii, hojalo Jew atañ gyutii, “No matiirḛ mohmi apa lilyi milo, no Kesar ka ajiñ make; kone abi huna atohmi radde pa miisu danii hii Kesar mi chekhoda.”

¹³Pailet siika aguñmi tapa lala, mo Jisu mi agoho lingiitii ho duhatii ayakacho kako duko ho dutii Pavement luniiñ gandaho, ho Hebrew aguñ pa, Gabbatha hiila.

¹⁴ Siisi hiika hii Impobiiniiñ ka Miimyo biniiñ allo pa lyitii; hiika hii gunta talyañlenye pa lyitii. Mo Jew atañmi lutii, “Kato nunuka Radde mi!”

¹⁵Mohlu gyutii, “Mohmi mento, mohmi mento, mohmi ledato!” Pailet mohlumi lutii, “Nunuka Radde mi ngo leda talyiha?” Nyibu burii lusitii, “Ngunukii radde nyimake hojalo Kesar siike.”

¹⁶Ho mo mohmi mohlumi bibiido leda kiine dupa.

¹⁷ Hopa mohlu Jisu mi ingiitii, ho mo intii, mohka atoh pogyañ mi jobii tola, hiika gandaho dinkhu ganda lukoho, nii mina Hebrew ho Golgota lutii nii.

¹⁸Hiiko mohlu mohmi ledatii, ho mo agiñho khiibe anyeta, pache konsa, ho Jisu mo anye ka liipa jaho.

¹⁹Pailet armyañ miilañ ketii ho hiimi pogyañ ho tiiliitii; hiila ketii, “Nazaret daka Jisu, Jew atañka Radde.”

²⁰Abuje Jew atañ siika armyañ keniiñ mi rikatii, niimpalukoda nohna Jisu mi leda tiinii citi hokiila ano adho matii; ho hiikahii Hebrew pa, Latin pa ho Grik pa ketii.

²¹Nyibu burii atañ la Jew atañ ho Pailet mi lutii, “Hiila keyo, ‘Jew atañka Radde hiila,’ hojalo, ‘Siika miyu si lune, Ngo Jew atañka radde hiila.’”

²²Pailet lusitii, “Nii ngo ketii ngo ketii kuke.”

²³Sipahi atañ Jisu mika leda lyiho mohlu mohka abitarii atañmi labiitii ho piilye pa dopa miitii, sipahi kone abipa; mohka abi miilañmi. Hojalo abi ho jigañ giimatii, akañ hokiila ayoh lohe pa alah loka chiniiñ;

²⁴hopa mohlu kone anyañ mi lusutii, “Simi ngunu sarche masa, hojalo pota tuka siisa si hupana dokiñ donii.” Siikasi piniipota mi lyipe kiine dupa lyitii, “Mohlu ngiika abitarii mi mohluka punkoho tache siibiine, ho ngiika pulyepa mohlu pota tuka siinyado.”

²⁵ Hopa sipahi atañ simi miitii. Hojalo Jisu ka pogyañ aruñho mohka annii, ho mohka annii ka anuami, Mary Klopas ka mihie, ho Mary Magdalen datii.

²⁶ Jisu mohka annii mi kapa lala, ho henjeajiñ humina hentii nii aruñho dapa kapa lala, mo mohka annii mi lutii, “Annii akha, kato, niika oho mi!”

²⁷Ho mo henjeajiñ mi lutii, “Kato, niika annii mi!” Ho hiika myodu hokiija henjeajiñ mohmi mohka ude ho ingii tiiku.

²⁸ Siika hiibaho Jisu, hikha miijaku hiila chimbii tola, lutii (piniipota mi miipe dupa), “Ngo hangḛrdo.”

²⁹Hiiko ho roalha poteje paka kohe da dotii; hopa mohlu empya lo tajer ho poteje roalha niima lala ho mohka aguñ ho hiimi niima liitii.

³⁰Jisu roalha mi larii lala, mo lutii, “Siikasi hiine kuke”; ho mohka adiñ mi nyanki lala ho mohka yajiyallo mi apabibii doku.

³¹Hiika hii Miimyo biniiñ allo pa lyilyi nii, shiima apo mi pogyañ ho dumoalo ho dokenena mapa (niimpalukoda dumoalo hii hempḛr khiiniiñ pa lyilyi nii), Jew atañ Pailet mi lubiido mohluka alih mi dantrḛ dokoda, ho mohlu jopa biikiñ doku.

³²Hopa sipahi atañ ahtii ho kapyo jaka alih mi dantrḛ biido, ho kone mitrḛ mo agiñ hoka leda lehiñ konii bomi;

³³hojalo mohlu Jisu ka aruñho ahbii kiile ho mohmi shiido ku kala la, mohlu mohka alih mi dantrḛ matii.

³⁴ Hojalo sipahi kone mohka khiike ho adañ niilii tii, ho ohepada hiikohokii ai la yasie nyi biliñtii.

³⁵Huna hiimi kapa tiinii haki bitii, mohka pyakonii hii jije, ho mo chindo ho mo jije mi lukoda niimpalukoda nunu mitrḛ henje kiine dupa.

³⁶Siika drih atañsi lyitii piniipota mi lyipe kiine dupa, “Mohka alloh buhe mitrḛ dantrḛ kema.”

³⁷Ho hiira gongeta piniipota ludo, “Mohlu mohmi kala dakiñdo humina mohlu niilii talyinii.”

³⁸ Siika hiibaho Arimatia daka Josep, Jisu ka henjeajiñ kone, hojalo mi chimapa, Jew atañmi biiso biidola, Pailet mi takatii Jisu ka apo mi jobii talyi kula hiila, ho Pailet mohmi bibiido. Hopa mo ahtii ho mohka apo mi jobii tiiku.

³⁹ Nikodemas tiirḛ, hiika ayoh hoka mo koka ahnii bo, mirr la aloe miiyo nii biiliila ahtii, tiicko lange khiiniiñ hepa.

⁴⁰ Mohlu Jisu ka apo mi jobii tiiku, ho pulye bolyo lo apu tii narunempyo takitero ka agiñho, Jew atañka byuh alie lyiju ho.

⁴¹Siisi mohmika leda ko hiiko balu ngohe dotii, ho balu ho niti byuh kone dotii nohna kone mitrḛ hiiko alie matii rañ.

⁴²Hopa Jew ka Miimyo biniiñ allo kopa, byuh hii aruñho dosu lyiniiñ, mohlu hiiko Jisu mi alietii.