Read Apatani JON 2 Bible Online

JON 2 - Apatani bible

JON 2

¹ Allo lohiñ niiho mihie millo lasutii Galili daka Kana ho, ho Jisu ka annii hiiko datii;

²Jisu mitrḛ mihie millo lasu koho gyotii, mohka henjeajiñ atañ agiñho.

³ Roalha tanja kukele, Jisu ka annii mohmi lutii, “Mohlukii roalha nyiku mayuke.”

⁴ Ho Jisu mohmi lutii, “Annii akha si, ngiimi niipa nii miitote hiila? Ngiika myodu siisi ahma ranke.”

⁵Mohka annii miira atañmi lutii, “Mo nii hiila luchi hiimi miito.”

⁶ Siisi hiiko yakhañ khañkhe dutii, Jew atañka darii miiju miina naniiñpa, yakhañ khange abi nyikhañhe malo hikhañhe harpo kane ahnii.

⁷Jisu mohlumi lutii, “Yakhañ atañmi yasie hilii to.” Ho mohlu alañ lohepa poteje hiliitii.

⁸Mo mohlumi lutii, “Siisi hokii iche suliñto, ho hiimi butiiapiñ honiiñmika kagii bomi bito.” Hopa mohlu hokii suliñtii.

⁹Butiiapiñ honiiñ mika kagiibo yasie ka roalha lyiku niimi tanka lala, ho mo chimatii si nohkii ahtii hiila (miira yasie suliñbo chinsu tii), butiiapiñ honiiñ mika kagiibo mabo mi gyoliitii

¹⁰ho mohmi lutii, “Miyu kone abi kapyopa aya miya bipyodu; ho miyu atañka tangii lyikuho, ho sarsii roalha mi bidu; hojalo no roalha tampyo yamiya siisi lohepa atii budunii.”

¹¹ Siikasi, mohka miipyoja kagiñnanii miiniiñ, Jisu Galili ka Kana ho miitii, ho mohka tatu katu mi kakiñtii; ho mohka henjeajiñ atañ mohmi henje nyatii.

¹² Siika hiiba ho mo Keparnam ho totii, mohka annii ho mohka anubarmii ho mohka henjeajiñ agiñho; ho hiiko mohlu allo lonye lohiñ hepa dutii.

¹³ Jew atañka impobiiniiñ dituñ tunii tiiku, ho Jisu Jerusalem ho chatii.

¹⁴ Piniiude ho mo siihhiibo ho subuñ ho pakoo atañmi pyula doniimi kappatii, ho tiicko bihii bikhe siiniiñ mi mohluka kiiri miiko ho.

¹⁵Ho lopalo hibii dola, mo hikha rumi mompa limbiido, siibuñ agiñho siihhiibo miilañmi, piniiude ka agoho; ho tiicko bihii bikhe siila donii posa atañmi kumpa tii ho mohluka miitananii atañmi jopatii.

¹⁶ Ho mo hutiina pakoo atañmi pyula dotiinii lukotii, “Siika drih atañmi jopa limbiihe; nunu ngiika Aba ka ude mi kiiri miiko ude pa biila kemake.”

¹⁷Mohka henjeajiñ atañ hempatii hiila ketola done hiila, “Niika ude paka henahii ngiimi lyamu chikañ lyabiilyi.”

¹⁸ Jew atañ ho mohmi lutii, Nii kagi nanii no ngunumi kakiñpa siimi miibii dola?

¹⁹ Jisu mohlumi lusitii, “Pyadu loto siika piniiude mi, ho allo lohiñ heho ngo siimi pencha talyike,”

²⁰Jew atañ ho lutii, Siika piniiude mi pendupa alyañpiilye la nyañkhe anyañ nyane, ho no siimi allo lohiñ heho pencha lakiñdo hiilaha?

²¹ Hojalo mo mohka apoka piniiude mi lutii.

²² Mohka shiiniiñ hokiika turilyikuho, mohka henjeajiñ atañ hempatii mo siika siimi lune hiila; ho mohlu piniipota mi tajetii ho Jisu ka aguñ luniiñ atañmi.

²³Siisi mo Jerusalem ho Impobiiniiñ dituñ butiiapiñ diiko dakele, abuje henje nyatii mohka armyañ mi mohlu kagiñnanii atañ mohka miiniiñmi kappa lala;

²⁴hojalo Jisu mo atohmi mohluka henjeho atii matii,

²⁵ niimpalukoda mo hikha miyu atañmi chintii ho kone mitrḛ miyukii dalyi hokii hakipa anna matii; niimpalukoda mo atoh loda chintii miyu ko nii giido hiila.