Read Apatani JON 20 Bible Online

JON 20 - Apatani bible

JON 20

¹ Siisi kanualo ka kapyo ja allo ho Mary Magdalen arokonchi ho byuh ho ahtii, kamo dorañpa, ho byuh hokii yalañ mi giipa tola dopa kappatii.

²Hopa mo hartii, ho Saimon Pitar ko haratii ho khiibe henjeajiñ kotrḛ, humina Jisu hentiinii, ho mohlumi lutii, “Mohlu Attoh mi byuh hokii jora biitii, ho ngunu chima mohlu mohmi noh atiitii hiila.”

³ Pitar ho henjeajiñ kone agiñho lintii, ho mohlu byuh dalyiho intii.

⁴Mo anye hartii, hojalo henjeajiñ kone bo Pitar mi hargo yatii ho byuh ho harpyo hatii;

⁵ho nyangala kakatii, mo pulye mi hiiko dopa kappatii, hojalo mo ura ho amatii.

⁶Ho Saimon Pitar ahtii, mohmi harbo mola, ho byuh ura ho ahtii; mo pulye mi dopa kappatii,

⁷ho nyupa nanii mila, niihna mohka dinta ho dotiinii, pulye doko dota mapa kartola attohpa doko dosutii.

⁸Ho konebo henjeajiñ, byuh hoka harpyo haniibo, hiitiirḛ ura ho ahtii, ho mo kappatii ho henjetii;

⁹ hojalopa siisi jalo mohlu piniipota mi chimarantii, mo shiite hela turiturku kendo loda hiila.

¹⁰Ho henjeajiñ atañ mohluka ude atañ ho inkur tiiku.

¹¹Hojalo Mary byuh ka agoho khela datii, ho mo khebii dola byuh ka ura ho nyanga la kakatii;

¹² ho mo miidopopi anye mi puloo pa kappatii, Jisu ka shiima joko ho dupa, kone hii adiñ dalyiho kone hii alih dalyiho.

¹³ Mohlu mohmi lutii, “Annii akha, niimpa no khedu?” Mo mohlumi lutii, “Niimpalukoda mohlu ngiika Attoh mi jora biine, ho ngo chima mohlu mohmi noh atiitii hiila.”

¹⁴ hiila lubii dola, mo mokurtii ho Jisu mi dapa kappatii, hojalo mo chimatii si Jisu hiila.

¹⁵Jisu mohmi lutii, “Annii akha, niimpa no khedu? Humi no medu?” Mohmi balu miiniipa hela lala, mo mohmi lutii, “Tonsḛrbo, no matiirḛ mohmi jopa tiimilo, ngiimi lukope no mohmi noh atiitii, ho ngo mohmi jobii talyi kula.”

¹⁶Jisu mohmi lutii, “Mary.” Mo mokur biila mohmi Hibru pa lutii, “Rabboni!” (Tonsḛrbo lusa niimi).

¹⁷ Jisu mohmi lutii, Ngiimi tenneyo, niimpalukoda ngo siisilohepa Aba ko chama ranke; hojalo ngiika anubarmii ko ingela ho mohlumi lunge, ngo chalyi kuke ngiika Aba ho nunuka Aba ko, ngiika Pinii ho nunuka Pinii ko.

¹⁸ Mary Magdalen intii ho henjeajiñ atañmi lutii, “Ngo Attoh mi kapate”; ho mo mohlumi lukotii mo siika drih atañmi mohmi lukone hiila.

¹⁹ Hiika allo ka alyiñho, kanualo ka kapyoja allo ho, alyeh hii giipiñ tola dotii nohna henjeajiñ atañ dutiinii, Jew atañ mika biisomi, Jisu ahtii ho mohluka punkoho datii ho mohlumi lutii, “Chimie nunu agiñho dokiñcho.”

²⁰Mo siimi luku lala, mo mohlumi mohka alah la mohka khiike mi kakiñtii. Ho henjeajiñ atañ hempyotii mohlu Attoh mi kapa lala.

²¹ Jisu hiira mohlumi lutii, “Chimie nunu agiñho dokiñcho. Niihtañpa Aba ngiimi kiiniñtii, hiichulipa ngo nunumi kiiniñ biilyi ke.”

²² Ho mo siimi luku lala, mo mohlumi muhi biido, ho mohlumi lutii, “Darii Yajiyallo mi larii tolya.

²³ Nunu matiirḛ mika ingyamiigya niimi hello bido koda, mohlumi hello tiikuke; nunu matiirḛ mika ingyamiigya niimi hello bima koda, mohlu giikañ kendo.”

²⁴ Siisi Tomas, alyañlenye hokii kone, bupyuñ siiniiñ luniiñbo, dabo matii mohluka agiñho Jisu ahlyi ho.

²⁵Hopa khiibe henjeajiñ atañ mohmi lukotii, “Ngunu Attohmi kapato.” Hojalo mo mohlumi lutii, “Nii dahepa ngo mohka alah daka dachañkuti tiicko mi kapa tama, ho ngiika lahchi mi dachañkuti tiicko ho tenka tama, ho ngiika alah mi mohka khiike ho tenga tama, ngo taje tama.”

²⁶Allo lopinye daku lala, mohka henjeajiñ atañ hiira ude ho dutii, ho Tomas tiirḛ mohluka agiñho dubo montii. Alyeh hii giipiñ tola dotii, hojalo Jisu ahtii ho mohluka agiñho datii, ho lutii, “Chimie nunu agiñho dokiñcho.”

²⁷ Ho mo Tomas mi lutii, “Niika lahchi mi so tenga to, ho ngiika alah mi kato; ho niika alah mi lyuliñ biila, ho ngiika khiike ho tenga to; henjemapa miiyo, hojalo henjeto.”

²⁸Tomas mohmi lusitii, “Ngiika Attoh ho ngiika Pinii!”

²⁹ Jisu mohmi lutii, “No henje dokuha niimpalukoda no ngiimi kapa tiiku? Lyanko kendo hiika atañ hutiina kapa masu hojalo henje nyadonii.”

³⁰ Siisi Jisu abuje kagiñnanii miitii henjeajiñ atañka kadopa, hiimi siika kheta so kematii;

³¹ hojalo siika atañ siimi ka keniiñsi nunumi Jisu hii Kristo hiila henje kiine dupa, Pinii ka Oho, ho henje biidola nunumi sango kapa kiine dupa mohka armyañ pa.