Read Apatani JON 3 Bible Online

JON 3 - Apatani bible

JON 3

¹ Siisi hiiko Parisi atañ hokii miyu kone dutii, Nikodemas hiila, Jew atañ mika sangiinii.

² Siika miyu si Jisu ko ahtii ayoh ho mohmi lutii, “Tonsḛrbo, ngunu chindo no tonsḛrbo, Pinii kokii ahnii hiila; niimpalukoda kone hetḛr niika kagiñnanii miiniiñ hiilyañ miila kema, nii dahepa Pinii mo agiñho dabo montema.”

³ Jisu mohmi lusitii, “Jijeloda, jijeloda, ngo niimi lukoso, nii dahepa konehii buti kotema, mo Pinii ka raddeganda mi kappa kema.”

⁴Nikodemas mohmi lutii, “Niihtañpa miyu hii buti kola kendo mo akha dokula? Mo ronye niipa annii ka erre ho ahla kendo ha ho buti kodupa?

⁵ Jisu lusitii, Jijeloda, jijeloda, ngo niimi lukoso, nii dahepa kone yasie la yajiyallo lo buko tama, mo Pinii ka raddeganda ho ahla kema.

⁶ Niihna asiialyo lo buko tiinii hii asiialyo ke, ho niihna yajiyallo lo buko tiinii hii yajiyallo ke.

⁷Ngiika niimi ka luniiñmi kapuñtale yo, ‘No nitipa buti kokiñdo lodake.’

⁸Allyi noh henañdo ho hedu, ho no hiika allyi hekurniimi tapadu, hojalo no chima hii nohkii hehado malo noh hekiñdo hiila; hii chulipa siikasi koneabi ka agiñho lyikiñdo huna yajiyallo lo bukotiinii.”

⁹Nikodemas mohmi lutii, “Niihtañ pa si lyila kendo?”

¹⁰Jisu lusitii mohmi, “No Isrel ka tonsḛrbo siiha, hojalo no siimi tachiñ ma ha?

¹¹ Jijeloda, jijeloda, ngo niimi lukoso, ngunu ludu niihmi ngunu chindo, ho hakipa dudu niihmi ngunu kappatii; hojalo no ngunuka pyakoniimi taliima.

¹²Ngo matiirḛ niimi kiiddiapiñ ka drih atañmi lukotii ho no tajema, niihtañpa no taje talyi ngo matiirḛ niimi dariiganda ka drih atañmi luko dokoda?

¹³ Kone hetḛr dariiganda ho chama hojalo mo kontiisii huna dariiganda hokii totiinii, miyu ka Oho.

¹⁴ Ho niihtañpa Mose tabumi zabyo ho lyuchatii, hiichuli pa miyu ka Oho mitrḛ lyucha kendo,

¹⁵niimpalukoda hujalo henje talyi hiimi santḛrlamanii sango bidupa.”

¹⁶ Niimpalukoda Pinii dohadolo mi ano hela mohka Oho konekontii mi bitii, hujalopa mohmi henje talyi hii lyukiñma hojalo santḛrlamanii sango giikiñdo.

¹⁷Niimpalukoda Pinii Oho mi dohadolo ho kiiniñtii, dohadolo mi khiipa dupa ma, hojalo dohadolo mi lyangur dupa mo kiilo.

¹⁸Huna henje talyinii hiimi khiipa kema; huna henje manii hiimi khiipa tola doku, niimpalukoda mo henje matii Pinii ka Oho kone kontii ka armyañ mi.

¹⁹ Ho siika sike ayakacho kaniiñ, hutoh hii dohadolo so ahtii, ho miyuatañ kamo miya hembyo nyada hutoh mi hentola, niimpalukoda mohluka miiniiñ atañ hii diimmah tii.

²⁰Niimpalukoda kone abi huna diimmah mi miidonii hii hutoh mi kana madu, ho hutoh ho linyama, hiila makoda mohluka miiniiñ atañmi kapa kendola hiila.

²¹ Hojalo huna jijemi miinya danii hii hutoh ho lindu, niimpalukoda hiimi darii loda kadḛr dopa mohka miiniiñ atañ hii Pinii ka muju ho miido hiila.

²² Siikahiiba ho Jisu la mohka henjeajiñ atañ Judia gandaho intii; hiiko mo mohluka agiñho dutii ho baptisma bikotii.

²³Jon tiirḛ Salim aruñ daka Aenon ho baptisma bitii, niimpalukoda hiiko yasie abuje dotii; ho miyuatañ ahtii ho baptisma bikotii.

²⁴ Niimpalukoda Jon mi siisi pattiih ho tuma tiirañ.

²⁵Siisi taka risutii Jon ka henjeajiñ la Jew nyika punkoho dariimiiniiñ piigo mi.

²⁶ Ho mohlu Jon ko ahtii, ho mohmi lutii, “Tonsḛrbo, niika agiñ hoka Jordan pache dalyi hoka daniibo, hupana no haki bine nii, sike mo, baptisma bila, ho miilañru mo agiñho ilyi.”

²⁷ Jon lusitii, “Kone hetḛr hang pala kema niihna mohmi dariiganda hokii bitiinii hiimi apalala.

²⁸ Nunu atoh atoh ngiipa haki pa dula lala, hiila ngo luto, ngo Kristo make, hojalo ngiimi mohmi kapyo yapa kiiniñtii.

²⁹ Hii hukiina mihie dunii hiike millo; millo ka ajiñ, huna dabo dunii ho mohmi tapa donii, hempḛr hempyodu milo ka aguñmi tapa lyiho; hopa siika ngiika hempyo hii siisi pote dokuke.

³⁰Mo kahe yaya kendo, hojalo ngo atu yaya kendo.”

³¹ Hii huna ayoh hokii ahdonii hii miilañ jami ayoh jake; hii huna kiiddiapiñ hokiinii hii kiiddiapiñ kiisuke, ho mo kiiddiapiñ kiimi sii lusudunii; hii huna dariiganda hokii ahdonii miilañjami ayoh jake.

³² Mo hakipa du nii mina mo kappa tiinii ho tapa tiinii, hojalo kone hetḛr mohka pyakoniimi talii matii;

³³huna mohka pyakoniimi talii donii mohko hiimi miiho tola doku, Pinii jije hiila.

³⁴Niimpalukoda humina Pinii kiiniñ tiinii Pinii aguñ luliñla doku, niimpalukoda khuka biidola mo yajiyallo mi bimake;

³⁵Aba hii Oho mi hendo, ho kapane drih mi mohka alah ho bitii.

³⁶ Hii huna Oho mi henje donii hiiko santḛrlamanii sango hii doku; hii huna Oho ka luniiñmi tamanii hii sango mi kappa kema, hojalo Pinii ka hadii hii mohko dokañ doku.