Read Apatani JON 4 Bible Online

JON 4 - Apatani bible

JON 4

¹ Siisi Attoh Parisi atañ Jisu Jon mi abuyapa baptisma ho henjeajiñ miibiido hiila tapabiido hiila chila lala

²(biniiñ hii Jisu mo loda baptisma bimasii, hojalo mohka henjeajiñ atañ sii),

³mo Judia mi apatela ho hiira Galili ho impa intii.

⁵Hopa mo Samaria citi ho ahtii, Saichar luniiñ ho, Jakob ka mohka oho Josep mika aji biniiñ aruñho.

⁶Jakob ka sukuñ ho dotii, ho Jisu tiirḛ ho datii, rengetiiku niimpalukoda mo myodi bola dotii, sukuñ ka aruñho dutii. Hiika hii alloka gunta talyañlenye hepa lyitiiku.

⁷Hiiko Samaria annii akha kone lintii yasie haliñpa. Jisu mohmi lutii, “Ngiimi yasie gonge tanke nempe.”

⁸Niimpalukoda mohka henjeajiñ atañ citi ho diigo riite pa intii.

⁹ Samarita annii akha mohmi lutii, “Niihtañ pa si, no Jew, ngiiko hokii yasie tandu pa kudunii, Samaria annii akha kokii?” Niimpalukoda Jew atañ la Samaritan atañ hang bihii bikhe siima.

¹⁰ Jisu mohmi lutii, No matiirḛ Pinii ka ahmiñayiñ mi chintii koda, ho huna si niimi lula donii hiila, ngiimi yasie gonge bipe, no ya mohmi kududo, ho mo niimi turnii yasie bitiido

¹¹Annii akha mohmi lutii, Tonsḛrbo, no hang hana naniiñ biimapa, ho sukuñ si urañdo; nohkii no hiika turnii yasie mi hakiñdo?

¹²No ngunuka aba Jakob mi kahe ya ehna, huna ngunumi sukuñ bitiinii, ho mo attoh tiirḛ sokii tantii, ho mohka oho atañ tiirḛ, ho mohka siihsubu miilañ hii?

¹³Jisu mohmi lutii, “Kone abi huna siika yasie sokii tandonii hiira hangḛr kendo,

¹⁴hojalo hujalopa ngiika yasie biniiñ hokii tanchi hii ronge hetḛr hangḛr keñku ma, ngiika yasie biniiñ hii mohko shoo huliñnii yasie pa lyikiñdo santḛrlamanii sango pa huliñla dokiñdo.”

¹⁵ Annii akha mohmi lutii, “Tonsḛrbo, ngiimi siika yasie mi bipe, ngiimi hangḛr kuma dopa, malo sotrḛ yasie ha kuma dopa.”

¹⁶Jisu mohmi lutii, “Ingeku, niika millo mi gyobii, ho so ahgii.”

¹⁷Annii akha mohmi lusitii, “Ngiikii millo nyima.” Jisu mohmi lutii, “No ludiko ludo, ‘ngiikii millo nyima hiila’;

¹⁸niimpalukoda niikii millo yangohe dutii, ho hii huka agiñho no siisi du hii niika millo ma; siika niika luniiñ jijeloda.”

¹⁹Annii akha mohmi lutii, “Tonsḛrbo, ngo chimbiido no nyibuhenii hiila.

²⁰ Ngunu ka aba atañ siika putoo ho heriitii; ho no luda Jerusalem sike lengo nohna miyuatañ heriikendo nii hiila.”

²¹ Jisu mohmi lutii, “Annii akha, ngiimi henjeto, myodu ahlyidiike niidana siika putoo malo Jerusalem hotiirḛ nunu Aba mi herii keñkumanii.

²² Nunu heriida nii mina nunu chima nii; ngunu heriidu nii mina ngunu chindonii, niimpalukoda sangopyako hii Jew atañ kokii siike.

²³Hojalo myodu hii ahlyi ke, ho siisi ke, niidana jije heriinii atañ herii kendonii Aba mi yajiyallo ho jije lo, niimpalukoda Aba sitañ mohmika heriiniike medonii.

²⁴ Pinii hii yajiyallo ke, ho huna mohmi herii donii, yajiyallo ho jije lo herii kendo lodake.”

²⁵Annii akha mohmi lutii, “Ngo chindo Masiah ahkiñdo hiila (humi na Kristo hiila gyokiñ donii); mohka ahlyi ho, mo hikha drih atañmi ngunumi kakiñ kendo.”

²⁶ Jisu mohmi lutii, “Ngo niimika lurii bo ngo hiinyañ.”

²⁷Hojaho mohka henjeajiñ atañ ahtiiku. Mohlu hemur nyatii annii akha mika mohka lurii laka daniimi, hojalo konetiirḛ hang lumatii, “Nii hiila no hendo?” malo, “Niimpa no mohmi lurii du hiila?”

²⁸Hopa annii akha mohka yasie pinta mi apatii, ho citi ho intiiku, ho miyu atañmi lutii,

²⁹ “Ahto, kato miyu kone, ngiika hikha miiniiñ mika luko bomi. Si Kristo kendo peha?”

³⁰Mohlu citi ka agoho lintii ho mohko ahnyatii.

³¹Hiikamyodu ho henjeajiñ atañ mohmi yartii, lubiidola, “Tonsḛrbo, diito.”

³² Hojalo mo mohlumi lutii, “Ngiiko diigo diidu pa doke nii mina nunu chimanii.”

³³Hopa henjeajiñ atañ kone anyañ mi lusu nyatii, “Mi mohmi diigo biilii bitii yuha?”

³⁴ Jisu mohlumi lutii, Ngiika diigo hii mohka heniiñ mika miiniiñ ke huna ngiimi kiiniñ tiinii, ho mohka miigo mika miipe binii.

³⁵ Nunu lumasa ehna, Piilo barpe dorañ hiila, ho amoo pidu ahkiñ do hiila? Ngo nunumi lukoso, nunuka amee kachato, ho kato niihtañpa aji atañsi puloo nyado ku amoo pidu kupa.

³⁶Hii huna pidonii ajho injomi larii kendo, ho santḛrlamanii sango ka ahee mi tukuñ biikiñdo, niimpalukoda liloniila ho pinii nyi hempyo hehiñdupa hiila.

³⁷Niimpalukoda nitiñ tindiko tintii, “Kone lilodu ho koneya pidu.

³⁸Ngo nunumi kiiniñ biilyi piniipa nii mina nunu miimanii; khiibe miitii, ho nunu mohluka miiko hoke ahdonii.”

³⁹Abuje citi hoka Samaritan atañ mohmi henje nyatii annii akha ka pyako kopa, “Mo ngiimi lukone hikha ngiika miiniiñmi.”

⁴⁰Hopa Samaritan atañ mohko ahkele, mohlu mohmi mohluka agiñho duto lubiido; ho mo hiiko allo lonye dutii.

⁴¹Ho hempḛr abuje henje nyatii mohka luniiñ kiipa.

⁴² Mohlu annii akha mi lutii, “Siikasi niika luko hopa kontii ngunu henje make, niimpalukoda ngunu miilañ attohpa tapatii, ho ngunu chindo siikasi jijeloda dohadolo mika Lyangur nii hiila.”

⁴³Allo lonye dala la mo Galili ho impa intii.

⁴⁴ Niimpalukoda Jisu mo attoh tiirḛ lusutii nyibuhenii mi attoh gandaho khiima hiila.

⁴⁵Hopa mo Galili ho ahchi biikele, Galili atañ mohmi karii katañtii, Jerusalem butii apiñ diiko hoka hikha miiniiñmi kappa tiinii, niimpalukoda mohlutrḛ butiiapiñ diikoho intii.

⁴⁶ Hopa mo hiira Galili daka Kana ho ahtii, nohna mo yasie mi roalha pa miitiinii. Ho Keparnam ho sabii kone dutii huka oho na achihtiinii.

⁴⁷Mo Jisu Galili hokii Judia ho ahdo hiila tapa lala, mo intii ho mohmi yarbiido ahla ho mohka oho mi miipya tope hiila, niimpalukoda mo shiipa miila dotiiku.

⁴⁸ Hopa Jisu mohmi lutii, “Nii dahepa nunu kagiñnanii la kahotamo kappa tama nunu henje kemake.”

⁴⁹Sabii mohmi lutii, “Tonsḛrbo, ngiika oho ka shiima rampa ahto.”

⁵⁰Jisu mohmi lutii, “Inge; niika oho sankiñ doke.” Hiika miyu Jisu ka mohmika luniiñmi henjetii ho mohka lembo ho intiiku.

⁵¹Mo tola doku kiile, mohka miira atañ mohmi kappa lala ho mohmi lukotii niika oho hempyo doku hiila.

⁵²Hopa mo mohlumi takatii nii myodu hona hempyo rinenii, ho mohlu mohmi lutii, biilyo alyiñdalyi ka gunta tahe niiho mohka doli achih hempyo neku.

⁵³ Aba chintii hiija hiika gunta hii Jisu ka mohmika luniiñ, “Niika oho sankiñ doke hiila”; ho mo henjetii, ho hikha mohka ude uru atañ.

⁵⁴ Siikasi ronye niipa Jisu ka kagiñnanii miiniiñ mohka Judia hokiila Galili hoka ahlyi ho.