Read Apatani JON 6 Bible Online

JON 6 - Apatani bible

JON 6

¹ Siikahiibaho Jisu Galili siimie ka pache dalyiho botii, Tiberias ka siimie ho.

²Ho miyuabuje mohmi imbomontii, niimpalukoda mohlu mohka kagiñnanii miiniiñmi kappatii hutiina achih nyatiinii.

³Jisu putoo ka ayoh ho chatii, ho hiiko mohka henjeajiñ atañ agiñho dutii.

⁴Siisi Impobiiniiñ, Jew atañ dituñ sodu tunii tiiku.

⁵ Mohka amee mi kadu chala la, ho miyuabuje mohko ahla do hiila kappa lala, Jisu Pilip mi lutii, “Niihtañ pape ngunu yatañ riichinii, siika miyu atañmi diike nendupa?”

⁶Siikasi mo mohmi tenka dupa lutii, niimpalukoda mo attoh chinsutii mo niihpe miikiñ doniiñ.

⁷Pilip mohmi lusitii, “Lanye denarii[1] lotrḛ khe dopa yatañ riila kemake koneabi mi chesa khedupa.”

⁸ Mohka henjeajiñ kone, Andrew, Saimon Pitar ka anu, mohmi lutii,

⁹ Inkasi himme koneda hukiina yatañ pyarngohe ho ngiiyyi sonye biidonii; hojalo hiimi niimiichi mohlu hiimkane abu da?

¹⁰Jisu lutii, “Miyu atañmi duha kiineto.” Siisi abuje tammi dotii hiika gandaho; hopa miyuatañ duha nyatii, khiikako jarngo hepa dutii.

¹¹Jisu ho yatañ mi latii, ho payapacho lulala, mo mohlumi bitii duha tola ka dunii atañmi; hiichuli ngiiyyi mitrḛ, niimkane mohlu diinado bitii.

¹²Ho mohlumi mohluka erre ho diide pake nelala, mo mohka henjeajiñ atañmi lubiido, “Tiikuñ toku petupeponii palle mi, niimpalukoda hang dopa madopa.”

¹³Hopa mohlu hiimi tukuñtupa tiiku ho yagii giilyañlenye yatañ petupeponii tukuñtiiku yatañ pyarngohe hokii, mohluka diile kuniiñ.

¹⁴ Miyu atañ mohka kagiñnanii miiniiñmi kappa lala, mohlu lutii, “Siikasi jije nyibuhenii ke huna dohadolo so ahkiñ nenii!”

¹⁵ Chimpa biitola mohlu ahpa miilado ho mohmi chechepa ingiila radde miipa miido hiila, Jisu hiira insa giila putoo ho mo attohpa chagiitii.

¹⁶ Alyiñ kukele, mohka henjeajiñ atañ siimie ho totii,

¹⁷huluho chatii, ho iritii siimie ka pachedalyi Keparnam ho. Siisi kamo tiiku, ho Jisu mohluka agiñho siisi jalo ahma tiirañ.

¹⁸Siimie hii lando poritii niimpalukoda hempḛr uro allyi heritii.

¹⁹Mohlu nyatu pohiñ pope pahe khoku lala, mohlu Jisu mi yasie ho ila dopa kappa biido ho hulu ka aruñho ahdopa. Mohlu biisotii,

²⁰hojalo mo mohlumi lutii, “Si ngoke; biisoyo.”

²¹Ho mohlu hempyo biidola mohmi huluho chagiitii, ho ohepada hulu hii kiiddi ho bochi tiiku nohna mohlu impa intiinii.

²²Allo lohe yaho miyuatañ hutiina siimie ka pache dalyiho datiinii kappatii hiiko hulu tare kontiisii dosunenii, ho Jisu huluho mohka henjeajiñ agiñho chabo matii, hojalo mohka henjeajiñ atañ mohlu kontii intii.

²³Hojalo, Tiberias hokiika hulu hii hiika kiiddi ho ahchi tiiku nohna mohlu yatañ diitiinii Attoh ka payapacho hiila luku lala.

²⁴Ho miyuatañ hiiko Jisu mi kappa malyi nii, malo mohka henjeajiñ atañ mitrḛ, mohlutrḛ huluho chatii ho Keparnam ho intii, Jisu mi metela.

²⁵Mohlu mohmi siimie ka pache dalyiho kappa lala, mohlu mohmi lutii, “Tonsḛrbo, no niido so ahhii?”

²⁶Jisu mohlumi lusitii, “Jijeloda, jijeloda, ngo nunumi lukoso, nunu ngiimi medo, nunu kagiñnanii kappa kopama, niimpalukoda nunu erre khedopa yatañ diibiine hopa.

²⁷Lyusanii diigo pa kontii miigo miiyo, hojalo hiika diigo pa miito santḛrlamanii sango giigii saniimi, nii mina miyu ka Oho nunumi bikiñ donii; niimpalukoda mohmi Pinii Aba mohka miihonaniilo miihotola doku.”

²⁸Ho mohlu mohmi lutii, “Niihpe ngunu miikiñ donii, Pinii ka miigomi miidupa?”

²⁹ Jisu mohlumi lusitii, “Siika sike Pinii ka miigo, nunuka mohmika henjenii hii humina mo kiiniñ tiinii.”

³⁰ Hopa mohlu mohmi lutii, “Hokoda no nii kagiñnanii miikiñtalyi, ngunumi kake nendupa, ho niimi henje dopa? Nii miigo no miichi?

³¹Ngunuka aba atañ jabyo ho manna diitii; hiila ketola do, ‘Mo mohlumi dariiganda hokii yatañ bitii diike nendupa.’”

³²Jisu ho mohlumi lutii, “Jijeloda, jijeloda ngo nunumi lukoso, hii Mose make nunu mika dariiganda hokiika yatañ biniibo; ngiika Aba nunumi jijeka yatañ dariiganda hokii bido.

³³Niimpalukoda Pinii ka yatañ hiike dariiganda hokii todonii, ho sango bido dohadolo mi.”

³⁴ Mohlu mohmi lutii, “Attoh, ngunumi kiirañ siika yatañ mi bipe.”

³⁵ Jisu mohlumi lutii, “Ngo sango ka yatañ ke; huna ngiiko ahdonii hii haya kemake, ho huna ngiimi henje talyinii hii iche tiirḛ hangḛr kema.

³⁶Hojalo ngo nunumi ludu nunu ngiimi kapa siido ho hojalo henje nyama.

³⁷ Hikha Aba ka ngiimika biniiñhii ngiiko ahkiñdo; ho huna ngiiko ahdonii ngo hiimi mompa tama.

³⁸ Niimpalukoda ngo dariiganda hokii todu, ngiika henko miipama, hojalo mohka henko huna ngiimi kiiniñ tiinii;

³⁹ ho siikasi mohka heniiñ huna ngiimi kiiniñ tiinii, ngiimi hang kone mitrḛ hikha mo biniiñ mi alyu mado koda hiila, hojalo kami kalo ho mohmi seri kiine dupa.

⁴⁰ Niimpalukoda siikasi ngiika Aba ka heniiñ, koneabi huna Oho mi kapa lala ho mohmi henje talyi nii hiiko santḛrlamanii sango dopa; ho ngo hiimi kami allo ho seri talyiku.”

⁴¹Ho Jew atañ mohmi budubudu lunyatii, niimpalukoda mo lutii, “Ngo yatañ dariiganda hokiika tonii.”

⁴² Mohlu lutii, “Si Jisu masuha ehna, Josep ka oho, huka annii-aba mina ngunu chindunii? Niihtañpa mo siisi luda, ‘Ngo dariiganda hokiika tonii hiila’?”

⁴³Jisu mohlumi lusitii, “Nunuka punkoho budubudu lusu nyayo.

⁴⁴ Kone hetrḛ ngiiko ahla kemake nii dahepa Aba ngiiko mohmi nelii bitema; ho ngo hiimi kami allo ho seri talyi.

⁴⁵Si nyibuhenii atañ ko ketola do, ‘Ho mohlu Pinii lo tonsḛr kokiñ doke.’ Koneabi huna tapatiinii ho Aba kokii chingiitiinii ngiiko ahdo.

⁴⁶Kone hetḛr Aba mi kapama hii kontiisii huna Pinii kokiinii; mo Aba mi kappatii.

⁴⁷Jijeloda, jijeloda, ngo nunumi lukoso, huna henjedonii hiiko santḛrlamanii sango doke.

⁴⁸Ngo sango ka yatañ ke.

⁴⁹Nunuka aba atañ manna diitii zabyo ho, ho mohlu shiitii.

⁵⁰Siika yatañ si dariiganda hokiika toniike, miyu atañmi siimi diike nendupa ho shiima yapa.

⁵¹Ngo turnii yatañke dariiganda hokiika tonii; hujalo siika yatañ siimi matiirḛ diichi, hii ayu dahepa sankiñdo; ho yatañ nii mina ngo bichi nii dohadolo ka sangopa hii ngiika apoke

⁵² Ho Jew atañ mohluka punkoho chesu ritii, lubiidola, “Niihtañpa siika miyu si ngunumi mohka apomi bila kendo diidupa?”

⁵³Hopa Jisu mohlumi lutii, “Jijeloda, jijeloda, ngo nunumi lukoso, nii dahepa nunu miyu ka Oho ka apomi diitema ho mohka ai mi tantema, nunuko sango giimake;

⁵⁴hii huna ngiika apomi diidonii ho ngiika ai mi tandonii hiiko santḛrlamanii sango do, ho ngo mohmi kami allo ho seri talyi.

⁵⁵Niimpalukoda ngiika aposi diigo jijeke, ho ngiika ai si tango jijeke.

⁵⁶ Huna ngiika apomi diidonii ho ngiika ai mi tandonii hii ngiiko da, ho ngo mohko.

⁵⁷Niitañpa turnii Aba ngiimi kiiniñtii, ho ngo turdo niimpalukoda Aba kiipa, hopa huna ngiimi diichinii hii turkiñdo niimpalukoda ngiikiipa

⁵⁸ Siika sike yatañ niihna dariiganda hokii totiinii, aba atañka diila lalaka shiiniiñ chuli ma; huna siika yatañ siimi diichinii ayu dahepa turkiñdo.”

⁵⁹ Siimi mo sinagog ho lutii, Keparnam hoka tonsḛr toncha ho.

⁶⁰Mohka abuje henjeajiñ atañ, mohlu siimi tapa lala, lutii, “Siika luniiñsi alḛrdo; hu siimi tala talyiho?”

⁶¹ Hojalo Jisu, mo chimbii tola mohka henjeajiñ atañ simika budubudu luniiñmi, mohlumi lutii, “Nunu siika siimi takho duha?

⁶² Hokoda nunu matiirḛ miyu ka Oho mi mohka kapyo duko ho chala dopa kappa doko dano?

⁶³ Si yajiyallo ke sango bidonii, asiialyoho piigo amake; ngiika nunu mika aguñ luniiñ hiike yajiyallo la sango nyi.

⁶⁴ Hojalo nunuka punkoho tange henje nyama.” Niimpalukoda Jisu chintii kapyo jaho hokii hutiina henje nyama tiinii, ho huna mohmi talubalo kendonii.

⁶⁵ Ho mo lutii, “Si hopa ngo nunumi lukodu kone hetḛr ngiiko ahla kema nii dahepa Aba hiimi ahdopa bitema.”

⁶⁶Hiikahiibaho abuje mohka henjeajiñ atañ inkur nyatiiku ho mo agiñho imbo kumatii.

⁶⁷Jisu alyañlenye mi lutii, “Nunu tiirḛ inkur nando kuha?”

⁶⁸ Saimon Pitar mohmi lusitii, “Attoh, huko ngunu inchi? Niiko santḛrlamanii sango ka aguñ hii do;

⁶⁹ho ngunu henjedu, ho chindo, no Pinii ka Darii kone hiila.”

⁷⁰ Jisu mohlumi lusitii, “Ngo nunumi kahe masuha ehna?, alyañlenye, ho nunuka punkoho kone igii ke.”

⁷¹ Mo Judas mi lutii Saimon Iskariot ka ohomi, niimpalukoda mo, alyañlenye hokii kone, mohmi talubalo saniibo.