Read Apatani JON 9 Bible Online

JON 9 - Apatani bible

JON 9

¹Mo impo biikele, bulyi hokiija micha nii miyu kone mi mo kapa biido.

² Ho mohka henjeajiñ atañ mohmi tahii biido, “Tonsḛrbo, hu ingyamiigya tii, siika miyu siha malo mohka annii-aba ha? Mo micha dopa buko niisi.”

³ Jisu lusitii, “Siikasi siika miyu ingyamiigya tii hiilama, malo mohka annii-aba, hojalo Pinii ka miigomi mohkokiila kakiñ kengiñ naniipa.

⁴ Ngunu mohka miigomi miikiñdo huna ngiimi kiiniñ tiinii, allo dorañpa; ayoh hii ahlyi, kone hetḛr miigo miila ma.

⁵ Nii dahe pa ngo dohadolo so dachi, ngo dohadolo ka hutoh ke.”

⁶ Mo hiila siimi lula la, mo kiiddi ho chukḛr chutii ho dekiñ nyimi hoyo lala ho miyu ka amee ho neliitii dekiñ agiñho,

⁷ mohmi lubiido, Inge, Siloam (Kiiniñto lusa niimi) ka siipḛr ho hasu he. Hopa mo intii ho hasu tela ho kapa kula ahkur tiiku.

⁸Ariapii atañ la mohmika kapyo hoka myado laka dupa kapa nii atañ, lutii, “Siika miyu si soka dunii ho myado boma siiha ehna?”

⁹Tange lutii, “Siikasi mo”; tange lutii, “Ma, hojalo mo hii chulido.” Mo lutii, “Ngo hiika miyu ke.”

¹⁰Mohlu mohmi lutii, “Hokoda niihtañpa niika amee kapa doku?”

¹¹Mo lusitii, “Jisu hiila miyu kone dekiñ mi hoyolala ho ngiika amee ho nelii ho ngiimi luhii, ‘Siloam ho ingela ho hasuhe’; hopa ngo ila ho hasute ho ngiika amee kapa doku.”

¹²Mohlu mohmi lutii, “No mo da?” Mo lutii, “Ngo chima.”

¹³Mohlu Parisi atañ ko miyu mi ahgii bitii kapyo hoka micha bomi.

¹⁴Siisi hiika hii dumoalo tii Jisu ka dekiñ mi hoyo lala ho mohka amee mika mida dopa miilyiho.

¹⁵Parisi atañ hiira mohmi tahii biido niihtañpa no niika amee kapa toku. Ho mo mohlumi lutii, “Mo dekiñ mi ngiika amee ho nelii, ho ngo hasuto, ho ngo kapaku.”

¹⁶ Parisi tonge lutii, “Siika miyu si Pinii kokii make, niimpalukoda mo dumoalo mi khiima.” Hojalo tange lutii, “Niitañpa miyu huna ingyamiigya danii sitañ kagiñnanii miila kendo?” Mohluka punkoho tache risutii.

¹⁷Hopa hiira mohlu micha miyu mi lutii, “No nii hiila mohka piigo mi ludu? niimpalukoda mo niika amee mi mida dopa miitii.” Mo lutii, “Mo nyibuhenii kone.”

¹⁸Jew atañ taje matii mo micha hiila ho mohka kapa kuniiñ mi, nii dahepa mohlu hiika miyu ka annii-aba mi gyolii tama huka amee na kapa tiiku nii,

¹⁹ho mohlumi tahiitii, “Siikasi niika oho ha? humina nunu bulyi hokii micha luda nii, Niihtañpa hokoda mo siisi kapa doku?”

²⁰Mohka annii-aba lusitii, “Ngunu chindo siikasi ngiinyi ka oho hiila, ho mohmi micha dopa bii;

²¹hojalo niihtañpa mo siisi kapa doku ngiinyi chima, malo hiila tiirḛ chima hu mohka amee mi mida dopa miitii hiila. Mohmi tahiito; mo akha siido kuke, mo attohpa luko siila kendo kuke.”

²² Mohka annii-aba siimi lutii niimpalukoda mo anye Jew atañmi biisotii, niimpalukoda Jew atañ hiila taliisiitola dotii hujalopa matiirḛ mohmi Kristo hiila khako talyi, mohmi sinagog hokiila agoho nempa linkiñdo.

²³Hopa mohka annii-aba lutii, “Mo akha dokuke, mohmi tahii he.”

²⁴Hopa ronye niipa mohlu hiika miyu mi gyotii huna micha nenii, ho mohmi lutii, “Pinii mi assañto; ngunu chindo siika miyu si ingyamiigyanii hiila.”

²⁵Mo lusitii, “Mo ingyamiigyaniiha, ngo chima; drih kone ngo chindo, ngo michato, siisi ngo kapa doku.”

²⁶Mohlu mohmi lutii, Nii mii mo niimi? Niihtañpa mo niika amee mi mida dopa miibiine?

²⁷Mo mohlumi lusitii, Ngo nunumi luko toku, ho nunu tage mane. Niimpa nunu hiira siimi tana do? Nunu tiirḛ mohka henjeajiñ pa lyinañ dopo?

²⁸ Ho mohlu mohmi nyapakoyatii, lubiidola, “No mohka henjeajiñ, hojalo ngunu Mose ka henjeajiñ atañ.

²⁹Ngunu chindo Pinii Mose mi luriitii hiila, hojalo siika miyu pa, ngunu chima mo nohkii ahdo hiila.”

³⁰Hiika miyu lusitii, “Niimpa, siikasi kapuñtale do! Nunu chima mo nohkii ahdo hiila, ho hojalo mo ngiika amee mi mida dopa miitii.

³¹Ngunu chindo Pinii ingyamiigyanii atañ kiimi tagema hiila, hojalo hujalo pa matiirḛ Pinii mi herii talyi ho mohka heniiñmi miidu, Pinii mohmi tage du.

³²Dohadolo ka doribii jaho hokii hiila tapa ma mi kone amee micha dopaka bukonii miyu mi mida dopa miitii hiila.

³³Siika miyu si matiirḛ Pinii kokii makoda, mo hang miila diima.”

³⁴Mohlu mohmi lusitii, “No hempḛr uro ingyamiigya niiho buko lala, ho no ngunu miya tonsḛr pa miidunii?” Ho mohlu mohmi mompa biido.

³⁵Jisu tapatii mohlu mohmi mompa biine hiila, ho mohmi kapa lala mo lutii, “No henje duha miyu ka Oho mi?”

³⁶Mo lusitii, “Ho hu mo, tonsḛrbo, ngo mohmi henje talyi?”

³⁷Jisu mohmi lutii, “No mohmi kapa biine, ho hiika hii mo niimi ka lurii laka danii bo.”

³⁸ Mo lutii, “Attoh, Ngo henjedo”; ho mo mohmi heriitii.

³⁹ Jisu lutii, “Ngo ayakacho mi kadu pa dohadolo so ahdu, niimpalukoda huna kapa nyama nii kapa kiine dupa, ho hutiina kapa nyadonii hiimi micha kiine dupa.”

⁴⁰Parisi tonge mohka aruñhoka danii siimi tapa biido, ho mohlu mohmi lutii, “Ngunu miilañ micha doha?”

⁴¹ Jisu mohlumi lutii, “Nunu matiirḛ micha tiikoda, nunu hang miigya diima; hojalo nunu siisi luda, ‘Ngunu kapado,’ nunuka miigya nii dokañ do.