Read Apatani MIINIIÑ 1 Bible Online

MIINIIÑ 1 - Apatani bible

MIINIIÑ 1

¹ Kapyo daka kheta ho, O Tihopilus, ngo hikha Jisu ka miigo miiri biiniiñmi ho tonsḛr ribii niimi keto,

²mohmika chagii lyiku allo lohepa, mo Darii Yajiyallo loka lujubiniiñ mi kiiniñkonii atañmi bikulala humina mo kahe tiinii.

³Mohlumi mo attohmi turdopa kakiñ siitii mo shiitii hekula abuje kakiñ kengiñ naniiñlo, mohluka agiñho allo loalyañpiilye dabotii, ho Pinii ka raddeganda mi lukotii.

⁴ Ho mohluka agiñho dabodala mo mohlumi lutii Jerusalem hokii ingu lyayo, hojalo Aba ka hemme biniiñ mi kalya tolya, nii mina, mo lutii nii, “nunu ngiiko hokii tapa tiinii,

⁵Jon yasie lo baptisma bitii, hojalo allo abu loma rampa nunu Darii Yajiyallo lo baptisma biko kendoke.”

⁶Hopa mohlu tongepa ahkuñ biila, mohlu mohmi takatii, “Attoh, no siika myodu so Isrel ka raddeganda mi penti talyiha?”

⁷Mo mohlumi lutii, “Siikasi nunupa chindopa lyimake myodu myolo mi nii mina Aba mohka otority lo miimyo tiinii.

⁸ Hojalo nunu harchichike mi larii kendoke Darii Yajiyallo ka nunukoka ahlyi ho; ho nunu ngiika haki pa dukiñdo Jerusalem ho, hikha Judia ho, ho Samaria ho, ho hikha kiiddi dotḛrso.”

⁹ Ho mo siimi luku lala, mohluka kala dorañpa, mohmi chagii tiiku, ho jomii mohmi hipu biitii mohluka kadopa.

¹⁰Ho mohlu yapuñ ho kala dotiirañ mo ila dorañpa, kato, miyu anye puloo pulye giitola mohluka aruñho daritii,

¹¹ho lutii, “Galili daka miyuatañ, niimpa nunu dala yapuñ ho kala da? Siika Jisu, humina nunukokii dariiganda ho chagii nekunii, ahkur kendo si chulipa niihtañpa nunu mohmi dariiganda ho chadopa kappatii.”

¹²Ho mohlu Jerusalem ho ahkur tiiku Olivet luniiñ putoo hokii, niihna Jerusalem aruñho dotiinii, dumoalo ka myodi boniiñ kane adho;

¹³ ho mohlu ahbiikula, mohlu chidii ayoho chatii, hiikoho mohlu dutii, Pitar ho Jon ho Andrew, Pilip ho Tomas, Bartolomiu ho Methu, Alpayas ka oho Jems la Zealot daka Saimon ho Jems ka oho Judas.

¹⁴Hikha siika atañ tongepa miilañru kuniiñ ho hengatii, annii akha atañ agiñho ho Jisu ka annii Mary agiñho, ho mohka anubarmii agiñho.

¹⁵Hiika myodu ho Pitar mohluka apurho guritii (hoka miyu dukuñnii hii lange la nyikhañ hepa dutii), ho lutii,

¹⁶ Anubarmii atañ, piniipota mi lyipe kiine kendoke, nii mina Darii Yajiyallo bilo lutiinii David ka aguñ lo, Judas ka piigo mi huna Jisu mi latu kiine dupa lembo pagii tiinii.

¹⁷Niimpalukoda mohmi ngunuka punkoho khiitola doku, ho mohpanii mi tache tola doku siika miigoso.

¹⁸(Siisi siika miyu si aji ngohe riitii mohka diimmah miijolo; ho chuku nyarila shiitii mo liipa jaho buchetii ho hikha mohka akhii erre bute lintii.

¹⁹Ho hiimi hikha Jerusalem daka dunii atañ chintiiku, hopa aji mi mohluka aguñpa Akeldama lutii, hiika hii, Ai ka Aji.)

²⁰Hiila ketola do Assañbiisie ka kheta ho, Mohka duko mi jirara doke nento, ho hiikaho kone mitrḛ sanke neyo; ho Mohka duko mi mih kone yami dusi kiineto .

²¹Hopa miyu kone huna ngunu agiñho kiirañ dabo montiinii Attoh Jisu ka ahlyiho ho lilyi ho ngunu agiñho,

²²lotujaho hokii Jon ka baptisma bilyi hokii khiiri biila mohmika ngunu apur hokiika chagii menda hemi, ngunu punko hokii siika miyu mi ngunu agiñho dagii kendo mohka turiturku kuniiñ mi haki binii pa.

²³Ho mohlu anye mi hataho leliñtii, Josep Barsabbas luniiñ bomi, humina Justus hiila myangiñ tiinii, ho Matthias.

²⁴Ho mohlu kutii ho lutii, “Attoh, hikha miyu ka ahha mika chiniiñ, kakiñpe siika anye sokii humina no kahe tiinii

²⁵siika miigo siimi ka miisi niipa ho Judas ka inkur kuko kiiniñ nensi dupa, mohluka attoh gandaho inniipa.”

²⁶Ho mohlu mo anyepa pota tuka siitii, ho Matthias pa pota tucha tii; ho mohmi alyañlenkuñhe kiiniñkonii atañ agiñho keliitii.