Read Apatani MIINIIÑ 11 Bible Online

MIINIIÑ 11 - Apatani bible

MIINIIÑ 11

¹Siisi kiiniñkonii atañ la Judia hoka dunii anubarmii atañ tapatii Midomiyu atañ tiirḛ Pinii ka aguñmi larii nyado hiila.

²Hopa Pitar Jerusalem ho chakele, mitupipakoniiñ atañ mohmi nyapa nyatii,

³lubiidola, “Niimpa no mitupipakomanii miyuatañ agiñho intii he ho mohluka agiñho diibote?”

⁴ Hojalo Pitar luritii ho mohlumi lutiñ biila lukotii:

⁵Ngo Joppa citi ho kula dukele; ho hendḛr lamapa ngo mihu kapato, ngoya kone huhi doniiñ hiilyañpa, hempḛr pulye bero chuli, yapuñ hokii nyetañ tapelo; ho hiikahii ngiiko huhi.

⁶Hiimi kaniiñla kadi kiile ngo kapa biilyi mikele achu-amyo atañ ho achu-amyo mentolaka doniiñ ho tabutiyyo ho yapuñ daka piita atañmi.

⁷Ho ngo aguñ gonge tapato ngiimi ludopa, Gurito, Pitar; mento ho diito.

⁸Hojalo ngo luto, Ma, Attoh; niimpalukoda hang miibḛrnii malo kacho mi ngiika aguñ ho diilii giima.

⁹Hojalo ronye niipa yapuñ hokii aguñ lutiila luko, Niimi Pinii darii miitii no miibḛrnii hiila luyo loda.

¹⁰Siikasi rohiñhe lyine, ho hikha rumi yapuñ ho joku chabii neku.

¹¹Hiika myodu jaho miyu midiñhinge ude ho ahhii nohna ngunu dutonii, Kaesarea hokii ngiimi gyoha la.

¹²Ho Yajiyallo ngiimi mohluka agiñho imbo monge hiila luhii. Hang khiingukhiire mapa. Siika midiñkhe anubarmii atañ ngiika agiñho imbo mong, ho ngunu miyu ka ude ho ahhii.

¹³Ho mo ngunumi lukone niihtañpa miidopopi mohka ude ho dala ho lune, “Joppa ho kiiniñ lala ho Saimon Pitar luniiñ bomi ahgii;

¹⁴mo nunumi puyu luko kendoke nii lona nunumi lyangur kendonii, niimila ho hikha niika uru atañmi.

¹⁵Ngo luri kiile, Darii Yajiyallo mohluko huha ne niihtañpa ngunu ko lotu ho huha.

¹⁶ Ho ngo Attoh ka aguñmi hempa rito, niihtañpa mo lune, ‘Jon yasie la baptisma bido, hojalo nunu Darii Yajiyallo lo baptisma biko kendoke.’

¹⁷Pinii matiirḛ ngunu mika ahmiñayiñ biniiñ mi mohlumi bila dokoda niihtañpa ngunumi bihii ngunuka Attoh Jisu Kristo mika henje lyiho, hu ngo Pinii mika lutiñnii?”

¹⁸Mohlu siimi tapa lala miilañru adu nyama tii. Ho mohlu Pinii mi assañtii, lubiidola, “Hokoda Pinii Midomiyu atañ miilañmi sango paka henkur kunii mi bittii ku.”

¹⁹ Siisi hutiina harpya harsa giinya tiinii niimpalukoda miihimiire miiri laka Stepen ka piigopa lulyiko hopa, hiimkane adho intii Poinisia ho Saiprus ho Antiok lohe innyatii, piniipota mi Jew atañmi lukola.

²⁰Hojalo hiiko tonge datii, miyuatañ Saiprus ho Sairene hokii, hutiina Antiok ho ahtiinii Grik atañ mitrḛ lukotii, Jisu Kristo mi tonsḛr khenyotii.

²¹Ho Attoh ka alah hii mohluka agiñho dobotii, ho hempḛr taropa henjenii atañ Attoh ko ahtii.

²²Siika puyu mi Jerusalem daka gyoliñkonii atañka yaroo ho tapa tii, ho mohlu Barnabas mi Antiok ho kiiniñtii.

²³Mo ahbiila ho Pinii ka aroh mi kappatii, mo hempyotii; ho mo harolupatii hikha miilañrumi lotiipa dutolya Attoh pa rantipa miigolugopa;

²⁴niimpalukoda mo denki miyuke, poteje Darii Yajiyallo ho giinii. Ho hempḛr miyu taro Attoh ko ahbyañtii.

²⁵Ho Barnabas Tarsus ho intii Sol mi kapa dupa;

²⁶ho mo mohmi kapa lala, mo mohmi Antiok ho ahgiitii. Hikha hiika anyañmi mo anye gyoliñkonii atañmi kapa la lyitii, ho hempḛr miyu taro mi tonsḛr la lyitii; ho Antiok ho henjeajiñ atañmi lutu japa Kristan hiila gyotii.

²⁷Siisi siika myodu so nyibuhenii atañ Jerusalem hokii Antiok ho totii.

²⁸Ho hiiko hokii kone Agabas hiila armyañ guritii ho Yajiyallo lo luko lumyo kotii hikha dohadolo ho hempḛr kahe diime ahkiñdo hiila; ho siikasi Klaudius ka myodu ho lyitii.

²⁹Ho henjeajiñ atañ miichiloda hiila hentii, kone abi niimkane mohlu miila kendo, Judia daka dunii anubarmii atañmi bilii talyi hiila;

³⁰ho mohlu hiila miitii, hiimi Barnabas la Sol nyika alah ho amiabañ atañpa biliitii.