Read Apatani MIINIIÑ 2 Bible Online

MIINIIÑ 2 - Apatani bible

MIINIIÑ 2

¹Penticost allo ahku kiile, mohlu hikha duko akoda dukuñ siitii.

²Ho aluñpada yapuñ hokii hempḛr allyi uro heniiñ hiilyañ aduritii, ho hiika hii hikha ude mi pote biitii nohna mohlu dutiinii.

³Ho hiiko mohluko allyo hiilyañ pa yamu tihatii, ho mohluka apurho kone abiko tichetihe hatii.

⁴Ho mohlu miilañru Darii Yajiyallo giinyatii ho pongelya aguñ luri nyatii, Yajiyallo mohlumi ludo paka bibii lyiniiñ.

⁵Siisi Jerusalem ho Jew atañ, henjemiyu atañ hikha ganda abi hokii ahkuñ tola datii.

⁶Ho siika adu-abiñ niimi tala la abuje miyuatañ ahkuñ nyatii, ho mohlu hendḛr lamatii, niimpalukoda kone abi mohlumi mohluka aguñmi ludo pa tapatii.

⁷Ho mohlu hemurla aluñtii, lubiidola, “Hikha siika lunii atañsi Galili miyu masu peha?

⁸Ho niihtañpa siikasi hokoda ngunu tapa do, ngunu kone abi ngunuka attoh aguñmi?

⁹Parthians ho Medes ho Elamites ho Mesopotamia hoka dunii atañ, Judia ho Kapadosia, Pontus ho Asia,

¹⁰Phrygia ho Pampilia, Egip ho Libya ka tache Sairene dalyi hokii, ho Rom hoka ahnii atañ, Jew atañ la Grik hokiika Jew lyinii atañ,

¹¹Kret miyuatañ la Arab miyuatañ, ngunu mohlumi ngunuka attoh aguñ ho Pinii ka kahe miigo miiniiñmi luko dopa tapa do.”

¹²Ho miilañru hemurtii ho hendḛr lamatii, kone anyañ mi lusudo, “Siikasi nii hiisa niimi pe?”

¹³Hojalo tange hii nyarpala lutii, “Mohlu niti roalha tangii tola ke.”

¹⁴Hojalo Pitar, alyañ lekuñ ka agiñho dala, mohka aguñmi goropa gyutii ho mohlumi lukotii, Judia daka miyuatañ ho hikha Jerusalem hoka dunii atañ, siimi nunu chinyato, ho ngiika luniiñ atañmi tageto.

¹⁵Niimpalukoda siika miyu atañsi tangii nyamake, nunuka henii chulipa, siisi allo ka gunta takkowa hesu rañ;

¹⁶hojalo siikasi nyibuhenii Joel ka luto laka donii:

¹⁷Ho kami allo ho hiila lyikiñ doke, Pinii ludo, ngo ngiika Yajiyallo mi hikha miyu atañmi bichi, ho nunuka oho atañ la nunuka wiinga atañ nyibu henkiñ doke, ho nunuka yapa atañ mihu kakiñ doke, ho nunuka amiabañ atañ emma makiñ doke;

¹⁸ḛh, ho ngiika milobo miira atañ la nyimii miira atañ ko hiika allo ho ngo ngiika Yajiyallo mi bichi; ho mohlu nyibu henkiñdo.

¹⁹Ho ngo yapuñ ayoho kahotamo kakiñso ho kiiddi ho kagiñnanii, ai, ho yamu, ho yamu muku ka hapiñ;

²⁰danyi hii kamo rikiñdo ho piilo hii ai pa, Attoh ka allo ahku marañpa, kaye ho kakiñ kendu allo.

²¹Ho hiila lyikiñdo hu jalopa Attoh ka armyañ mi gyochi lyangur kokiñdo.

²²Isrel daka miyuatañ, siika aguñ simi tato: Nazaret daka Jisu, siika miyu nunu agiñ hoka dabo monii si Pinii kokii ke kahe miigo ho kahotamo ho kagiñnanii Pinii mohmi miigiñ lala nunuka punkoho miitii, nunu atoh chindo

²³siika Jisu mi, Pinii bipatii mohka hemmyonii jaho ho chimbii tola, nunu ledatii ho mentii diimmah miyu atañka alah lo.

²⁴Hojalo Pinii mohmi seritii, shiinii hokii tupya kula la, niimpalukoda mohmi latu biitola biila matii hiilo.

²⁵Niimpalukoda David mohka piigo mi ludo, Ngo Attoh mi kiirañ ngiika hataho kapadu, niimpalukoda mo ngiika lahbi alah ho da ngiimi alye mayapa hiila;

²⁶hopa ngiika ahha hii hempyo ne, ho ngiika allyo si assañdo; hiika hahoho ngiika apo si doha kendo hentiñho.

²⁷Niimpalukoda no ngiika yallo mi nelimyoko ho apa kema, malo niika Darii Kone mi yahke nenkiñ ma.

²⁸No ngiimi sango ka lembo mi chindopa miitii; niika dabomonii hii ngiimi poteje hempyo giikiñdo.

²⁹Anubarmii atañ, ngo nunumi jije loda luko nando aba-apa David ka piigo mi, mo shiine ku alie biineku, ho mohka byuh siilo jalo ngunu agiñho do.

³⁰Hopa nyibuhenii pa lyilyi la, ho hiila chimbii dola Pinii ka mohmika hemme niimi, mo mohka ohoasi hokii mohka radde duko ho dusi kiine kendo,

³¹mo Kristo ka turiturku kuniiñ mi kapa kamyotii ho luko lumyotii, mohmi nelimyoko ho apakema, malo mohka apo hii yahkiñma.

³²Siika Jisu mi Pinii seri tiiku, ho hiika hiimi hikha ngunu haki bitii.

³³Hopa Pinii ka lahbi alah ho jocha kotola, ho Aba kokii hemme nii Darii Yajiyallo mi larii lala, nii mina nunu kapa do ho tapa donii mo hiimi biliñtii.

³⁴Niimpalukoda David dariiganda ho chama tii; hojalo mo atoh loda ludo, Attoh ludo ngiika Attoh mi, Duto ngiika lahbi alah ho,

³⁵nii dahepa ngo niika ahha-banii mi niika alih data naniiñpa miitema.

³⁶Hikha Isrel ka ude hopa chinto loda, Pinii mohmi Attoh ho Kristo pa miitii, siika Jisu humina nunu leda tiinii.

³⁷Siisi mohlu siimi tapa lala mohluka ahha buche pa miitii, ho Pitar mi lutii ho khiibe kiiniñkonii atañmi, “Anubarmii atañ, nii pe ngunu miichi nii?”

³⁸Ho Pitar mohlumi lutii, “Henkurto, ho kone abi baptisma lato Jisu Kristo ka armyañ pa, nunuka ingyamiigyanii atañmi hello kodu pa; ho nunu Darii Yajiyallo ka ahmiñayiñ mi larii kendoke.

³⁹Niimpalukoda hemme niisi nunupa ho nunuka wiinga atañ pake ho hikha hiika ahsa nii atañpa, kone abi humina Attoh ngunuka Pinii mohmi gyodo nii.”

⁴⁰Ho mo abuje khiibe aguñ la pyakotii ho mohlumi haro lupatii, lubiidola, “Nunu atohmi siika diimmah santuñ sokii lyangur siito.”

⁴¹Hopa hutiina mohka aguñmi talii tiinii baptisma latii, ho hiika allo ho yallo jariñ hepa lyambyañ liitii.

⁴²Ho mohlu miilañru kiiniñkonii atañka tonsḛr niimi ho dukuñsiinii siiniiñmi, yatañ petu niimi ho kuniiñ mi henga la miitii.

⁴³Ho biiso kone abika yallo ho ahtii; ho abuje kahotamo ho kagiñnanii kiiniñkonii atañ miitii.

⁴⁴ Ho hikha hutiina henje nyatiinii tongepa datii ho kapane drih mi tonge pa biitii;

⁴⁵ho mohlu mohluka gandanencha ho drih atañmi pyula lala miilañ rumi tache tahe tii, huna anna tiinii.

⁴⁶Ho allo karmyañmi, tongepa piniiude ho ahtii ho mohluka ude ho yatañ mi petulala diitii, mohlu hempyo biidola ho kobya ahha giibii dola diigo diihiñ nyatii,

⁴⁷Pinii mi assañ biidola ho hikha miyu atañmi hembiidola. Ho Attoh mohluka agiñho allo dadumi miyu lyambyañ liibitii hutiina lyangur kotii kunii.