Read Apatani MIINIIÑ 22 Bible Online

MIINIIÑ 22 - Apatani bible

MIINIIÑ 22

¹“Anubarmii la aba atañ, tageto siisi ngo nunuka hataho luko talyike.”

²Ho mohlu mo Hebrew aguñ pa mohlumi ludo pa tapa lala, mohlu uroyapa chimiepa dutii. Ho mo lutii:

³“Ngo Jew ke, Cilicia ka Tarsus hoka bukonii, hojalo siika citi so sancha Gamaliel ka liidi ho, purila alḛrpa ngunuka aba atañ dapo hoka miijuluju jaho, Pinii pa hempḛr uro miichi hiila hela siilo biilyo ka nunuka henchañho.

⁴ Ngo siika Lembo mi shiido pa miihimiireto, rabiila ho nyimii milobo hemapa pattiih ho alii la miito,

⁵bukuñ nyibu la hikha bulyañ daka amiabañ atañ ngiimi haki bi. Mohluko hokii ngo siiti anubarmii atañpa labiila, ho ngo Damaskas myodi bohii hiika atañ mitrḛ selii biidupa hoka dunii atañmi ho Jerusalem ho selii biila pamyo agii dupa.

⁶“Ngo ngiika myodi bola dokele ho Damaskas aruñ ahchi biikele, allo liipa ho hempḛr uro hutoh yapuñ hokii ngiiko byohi.

⁷Ho ngo kiiddi ho giipayu ho aguñ gonge ngo tapato, ‘Sol, Sol, niimpa no ngiimi miihimiire du?’

⁸Ho ngo lusitii, ‘Hu no, Attoh?’ Ho mo ngiimi lutii, ‘Ngo Nazaret daka Jisu humina no miihimiire danii.’

⁹Siisi ngiika agiñ dabo monii atañ hutoh mi kapa siila la hojalo aguñ luniiñmi tapa ma ngiimika kone lula doniimi.

¹⁰Ho ngo lutii, ‘Niihpe ngo miichi nii, Attoh?’ Ho Attoh ngiimi lutii, ‘Gurito, ho Damaskas ho ahnge, ho hiiko niimi luko kendoke nii pana niimi kahe tiinii.’

¹¹Ho ngo kapa laku mato niimpalukoda hiika hutoh byoha kopa, ngo alah lo sebii koto ku ngiika agiñ hoka imbo monii atañlo, ho Damaskas ho ahhii.

¹²“Ho Ananias hiila kone, henjenii miyu kone dapo hokii chulipa, hikha Jew atañ loka khiikola hoka dunii,

¹³ngiiko ahhii, ho ngiika aruñho dala ngiimi lutii, ‘Abañ Sol, niika amee kapa toku.’ Ho hiika myodu jaho ngo ngiika amee kapa ku ho mohmi kappatii.

¹⁴Ho mo lutii, ‘Ngunu ka aba atañka Pinii niimi kahe tii mohka henju mi chinke nendupa, Denki kone mi kapa kiine dupa ho mohka aguñ hokii mohka luniiñ tapa kiine dupa;

¹⁵niimpalukoda no mohka haki pa lyikiñdo hikha miyu atañko niihna no kapa tiinii ho tapa tiinii.

¹⁶Ho siisi niimpa no kalyala da? Gurito ho baptisma lato, ho niika ingyamiigya atañmi ase siito, mohka armyañ mi gyobii dola.’

¹⁷“Ngo Jerusalem ho ahkur biikula ho piniiude ho kukele, ngo mihu kapa to

¹⁸ho mohmi ngiimi lula dopa kapato, ‘Are miito ho nyibya pa Jerusalem hokii lintoku, niimpalukoda mohlu niika ngiika piigo mika pyako niimi talii kemake.’

¹⁹Ho ngo luto, ‘Attoh, mohlu attoh chindo sinagog kone abi ngiimi pattiih tuntii ho hutiina niimi henje nyadonii hibiine.

²⁰Ho Stepen mi niika haki mika melyi ho, ngotiirḛ aruñho dato ho lubomonto, ho mohluka pulyetarii mi biilya bito hutiina mohmi membii nenii.’

²¹Ho mo ngiimi lutii, ‘Inge; niimpalukoda ngo niimi hempḛr adho Midomiyu ko kiiniñ biilyi ke.’”

²²Siika aguñ lohepa mohlu mohka lunii mi tatii; ho mohlu gyuritii ho lutii, “Sitañ miyu mi kiiddi apiñ sokii mempato! Niimpalukoda mo sando pa lyimake.”

²³Ho mohlu gyutii ho mohluka pulyetarii mi lyuhii lyukhe miitii ho dimḛr mi allyiho piidḛrtii,

²⁴akhobo mohmi lutii sipahi atañka duko so togii hiila, ho mohmi hibii dola taka to hiila lutii, chindu pa niimpa mohlu gyutii mohmi chekho la.

²⁵Hojalo mohlu mohmi taru lo rakele, Pol sipahi sabii mi lutii mohka aruñhoka danii bomi, “Siikasi miidi kosupeha nunupa Rom miyu mika hiniiñ si, ho hang halii mapa?”

²⁶Sipahi sabii siimi tapa lala, mo akhoboko intii ho mohmi lutii, “Niina no miipa miilyi nii? Niimpalukoda siika miyu si Rom hoka dunii ke.”

²⁷Hopa akhobo ahtii ho mohmi lutii, “Lukope ngiimi, no Rom miyu ha?” Ho mo lutii, “ḛh.”

²⁸Hiika akhobo lusitii, “Ngo siika ganda ka miyupa lyidupa abuje tiicko bila riito.” Pol lutii, “Hojalo ngo siikaganda soka bukonii.”

²⁹Hopa hutiina mohmi taka dupa miinya nenii nyibya loda mohkokii insa giinya tii; ho akhobotrḛ biisotii, niimpalukoda mo chintiiku Pol Rom ka miyu hiila ho mo mohmi ratii hiila.

³⁰Hojalo allo lohe yaho, chinna la lyitii jijemi niimpa Jew atañ mohmi haliitii, mo mohmi tapya lala, ho nyibu burii mi lubiido ho hikha bulyañ atañmi kapa siidupa, ho mo Pol mi togiila ho mohluka hataho atiitii.