Read Apatani MIINIIÑ 27 Bible Online

MIINIIÑ 27 - Apatani bible

MIINIIÑ 27

¹Ho Italy ngunu khobo dupa lusu kulala, mohlu Pol mi bitii ho khiibe pattiih tunko nii tonge mi Augustas Kohort daka sipahi sabiimi, Julius hiiniiñ bomi.

²Ho Adramyttium daka yasiejaji ho chahii, hiikahii khopa miila dotola Asia ka lengo ho khobo dupa, ngunu siimie ho khobo, Aristarkas miilañ, Tesolonika daka Masedonia miyu.

³Allo lohe yaho ngunu Sidon ho domo; ho Julius Pol mi helakala ne, ho mohmi mohka ajiñ atañ ko miilañ kiiniñlala ho kalyañ kada ne.

⁴Ho hiika siimie hokii khori kula ngunu Saiprus daka siilokiiddi ho khobo, niimpalukoda allyi henii hii ngunu heriila hehii.

⁵Ho ngunu khopo bobiila la Silisia la Pampilia siimie mi khobo, ngunu Lisia daka Maira ho ahhii.

⁶Hiiko sipahisabii Alejandria daka yasiejaji mi kapa Italy ho khobopa, ho ngunumi ho ducha kiine.

⁷Ngunu haso hasopa abuje allo khotiiku, ho hempḛr ahiare pa Cnidas ho ahchi, ho allyi henii hii ngunumi khobo lake nema lyinii, ngunu Kret ka Salmone hopa khobo.

⁸Ahiare loda pa aruñho khoha bukula, ngunu Fair Havens lunii gandaho ahhii, niihna Lasea citi aruñho donii.

⁹Abuje myodu inku lala, ho myodi bonii ahiare la dosu lyikunii niimpalukoda nyoniiñ allo loja tiiku, Pol mohlumi tonsḛr biido,

¹⁰lubiidola, Tonsḛrbo, ngo hendo ngunuka myodi bokoso unetare ho abuje alyu siila lyikiñdo, drihpachi la yasiejaji kontii mapa, hojalo ngunuka sango tiirḛ

¹¹Hojalo sipahi sabii kepten la yasiejaji ka atoh mi hentola Pol ka luniiñ uro yapa tagela lyitii.

¹²Ho hiika jajidomo ko lakhii piko pa ano aya matii, abuya lutii hiika siimie hokii indo kukoda hiila, niihtañ pajalo hokii mohlu Phoenix ho bochi dokoda, Kret daka jajidomoko, hokii tapañ ho assañ dalyi, ho ahha ho assañ dalyi katii, ho hiiko lakhii pido koda.

¹³Ho ahadalyi ka allyi haso pa hebo lyiniiñ, mohlu hentii mohluka miigomi kapatiiku hiila, mohlu hage nanii mi jocha lala ho Kret ka aruñhopa khobo tiiku, kiitiñ ka aruñhopa.

¹⁴Hojalo hempḛr allyi uro heritii, danyichaggo dalyi hokii hiila luniiñbo, kiiddi hokii hedatii;

¹⁵ho yasiejaji hii tiida hatii ho allyi khopo bobii lama tola, ngunu hiimi lembo bila la hebo kiineto.

¹⁶Ho Kouda luniiñ atu siilokiiddi hopa khobo biila, ngunu cheche ahiare loda pa hulu mi khobobii;

¹⁷hiimi ho ratulala, mohlu yasiejaji mi kakatii; ho, biisotii mohlumi Syrtis ho hebo biichi hiila, mohlu taru mi akañ dalyiho talotii, ho hebo biikotii.

¹⁸Ho ngunumi uropa allyiaro hehii hekher miibii lyiniiñ, mohlu allo lohe yaho jaji daka drih doniimi kupa ritii;

¹⁹ho allo lohiñniiho mohlu mohluka alah lo yasiejaji daka drih mi jopa ritii.

²⁰Ho danyi malo takḛr hempḛr allo kapa kuma lyiniiñ, ho ano lama ahiare ngunu ko ahma siilyinii, hikha ngunuka santo kudo hiila heniiñ hii hikha lyuneku.

²¹Mohlu allo abuje diigo diima lyilyi nii, Pol mohluka aruñ ahhi biila mohlumi lubiido, “Miyuatañ, nunu ngiika luniiñ tageto, ho Kret hokii khori kuyo ho pamyo toh ho alyu siisa niimi alii siilyo.

²²Siisi ngo nunumi haro to luchi; niimpalukoda nunu punko hokii atoh ka sango mi alyu siikiñ make, hojalo yasiejaji kontii misu.

²³Niimpalukoda siyo ka ayoh jaho Pinii ka miidopopi ngiika aruñ dakiñ doke humina ngo herii dunii ho hukiina ngo,

²⁴ho mo lutii, ‘Biiso nyayo, Pol; no Kesar ka hata dakiñ doke; ho kato, Pinii hikha nunumi tiipya biilyi ke hutiina niika agiñho khobo mondo nii.’

²⁵Hopa haroto, miyuatañ, niimpalukoda ngiiko Pinii ka henje do sichuli lyikiñ doke ngiika lukonii chuli.

²⁶Hojalo ngunu siilokiiddi tonge ho khobo kendoke.”

²⁷Ayoh yolyañlepe nii ahkele, ngunu Adria ka siimie aruñho khochi habii kiile, ayoh liipaho khogiiniibo hentii mohlu kiiddi ka aruñho khochi habii doku hiila.

²⁸Hopa mohlu kaka biikele ladu tukuñ tunyi langela nyikhañhe urañ pa domi; ichuche khohi hala la hiira kakele langela alyañhela tungohe urañ domi.

²⁹Ho ngunu yalañ ho tiiha talyi hiila biisola, mohlu hatunanii mi piilye mi jolotii, ho kutii allo kiine toku pe hiila.

³⁰Ho khogiinii atañ yasiejaji hokii hargii pa miikele, ho hulu mi siimi ho ako yapa miikele, hatunanii mi alotii akañho hata dalyi hokiila,

³¹Pol lutii sipahi sabii la sipahi atañmi, “Nii dahepa siika miyuatañ yasiejaji ho dutema, nunu lyangur kola kema.”

³²Ho sipahi atañ taru mi pare biido hulu hokii, ho hiimi inke nembiido.

³³Ho allo kupa miikele, Pol miilañrumi lubiido diigo iche diitote hiila, lubiidola, “Siilo allo loyañhela lope diiku nunuka henala ho diigo diiku manii, hang diima paka lyiniiñ.

³⁴Hopa ngo nunumi lyarduke diigo iche diito; hii nunumi alḛr giikiñ doke, nunuka dimmu sohe tiirḛ lyukiñ make nunuka adiñ hokii.”

³⁵Ho mo hiimi luku lala, mo yatañ mi lala la, ho Pinii mi payapacho hiila miilañ ruka kado pa lula la mo hiimi petu biido ho diiritii.

³⁶Ho miilañru haro rila ho mohlu diigo diinyatii.

³⁷(ngunu hikha lanyela kanukhange la khe miyu yasiejaji ho du.)

³⁸Ho mohlu khe diide kulala, mohlu yasiejaji mi haju hedopa miitii, siimie ho yatañ mi jopa lola la.

³⁹Siisi allo kukele, mohlu kiiddi mi kala lakumatii, hojalo mohlu kiitiñ mi siilyo katala kadḛrtii, nii hona mohlu datiinii miila dokoda yasiejaji mi siilyo ho selii dupa miitii.

⁴⁰Hopa mohlu hatunanii mi jolo lala hiimi siimie ho apatii, hiikamyodu jaho taru mitrḛ tapyatii hiika rato laka khona nanii hoka doniiñmi; ho pulye mi tonchatii allyi lo mohluka miinii lo aruñ helii biiko dupa.

⁴¹Hojalo kiiddi ho tiihatii mohlu helii biikonii; nyetañ hii tiihatii ho abyu kuma dotii, ho kiiliñ dalyi hii tatutii lando uro paka pohanii.

⁴²Sipahi atañka heniiñ pattiih tunkonii atañmi mendu pa hentii, hiila makoda apya taliñ giila hargii biichi hela;

⁴³hojalo sipahi sabii, Pol lyangur talyi hentii, mohmi atiñlala mohluka miichi henii hokii. Mo lutii hutiina apya tala dunii jaji hokii atoh pohila kapyopa taliñ giito ho kiiddiho,

⁴⁴ho tange yasañ bata ho malo yasiejaji ka tatu tamaho. Ho si chulipa hikha kiiddi ho haliñ giiku.