Read Apatani ROM 1 Bible Online

ROM 1 - Apatani bible

ROM 1

¹ Pol, Jisu Kristo ka miira, kiiniñkonii paka gyoliñ nii, Pinii ka ayapuyu paka atii tiingunii

²nii mina mo kappyopa hemme tola dotiinii mohka nyibuhenii atañlo darii piniipota ho,

³ayapuyu mohka Oho ka piigo mi, huna David ka ohoasi hokii bukotiinii asiialyo kii dalyi

⁴ho Pinii ka Oho lutii Yajiyallo ka darii ka harchichikelo mohka shiiniiñ hokii ka turiturku kuko hopa, Jisu Kristo ngunu Attoh,

⁵ hukiilona ngunu aroh-aya la kiiniñkonii ka miigomi kapa tiinii henjelaka luniiñ tako hopa, niimpalukoda mohka armyañ ka piigo kiipa hikha ganda siiko ho,

⁶nunu miilañmi lutala hutiina Jisu Kristo kii hiila lusu donii;

⁷ Hikha Rom daka Pinii ka heniiñ atañ, hutiina piniimiyu hiila lusu donii: Nunumi aroh-aya hiilyi ho chimie Pinii ngunuka Aba ho Attoh Jisu Kristo kokii.

⁸ Kappyopa, ngo Pinii mi payapacho lulyi Jisu Kristo mi luta nala nunu miilañrupa, niimpalukoda nunuka henjemi hikha dohadolo so gyukotii.

⁹Niimpalukoda Pinii ngiika haki, humina ngo miihodonii ngiika yajiyallo lo Oho ka ayapuyu ho, lungo mapa ngo kiirañ niimi ngiika kuniiñ ho hempadu,

¹⁰ tahiibiidola niitañpajalo Pinii ka henko ho kamikalo ho ngo nunuko ahchi ladopa.

¹¹Niimpalukoda ngo hempḛr nunumi kapa nanto, ngo nunuko yajiyallo ka ahmiñayiñ tonge mi lulii dupa nunu mika alḛr giinii pa,

¹²hiika hii, ngunu taliisiila kone anyañ ka henje lo haro lupa siidupa, anyerulo nunu kiilo la ho ngiikiilo.

¹³ Ngo nunumi chinke nenado, anubarmii atañ, ngo kiirañ nunuko ahnañto (hojalo siisilohe pa atiñ tola done), niimpalukoda ngo amoo iche ladupa nunuka punkoho ho hiika agiñho khiibe Midomiyu atañka punko hokii tiirḛ.

¹⁴ Ngo miibidopa lyido anyerupa Grik la nyibomiyu atañpa, helamiyu la piicha nyipa tiirḛ:

¹⁵hopa ngo ayapuyu mi tonsḛrkhenyo nando nunu mitrḛ hutiina Rom ho dunii.

¹⁶ Niimpalukoda ngo hiinyañma ayapuyu pa: siikasi Pinii ka harchichike hikha koneabi paka sangopyako hutiina henje nyadonii, kapyopa Jew pa ho Grik patrḛ.

¹⁷ Niimpalukoda siikaso Pinii ka denki mi kakiñdo henjelo henjenii atañpa; hiila ketola do, “Hukiihona henje giidonii denki lo sankiñ doke.”[1]

¹⁸ Niimpalukoda Pinii ka hadii hii yapuñ hokii kakiñ kendo hikha henjemanii atañ la diimmah miyu atañmi hutiina mohluka demma lo jijemi nampi biidonii.

¹⁹Niimpalukoda niihna chinkiñ donii Pinii ka piigo mi mohlupa kadḛrpa do, niimpalukoda Pinii mohlumi hiimi kakiñ tiiku.

²⁰Dohadolo mika pubii jaho hokii mohka kapalama nii henjuhii, myando koda, mohka lyulamasanii harchichike la piniiaju hii, kadḛrpa kakiñ tola do drih puniiñ atañ ho. Hopa mohlumi hello lakiñma;

²¹ mohlu Pinii mi chinsuda hojalo mohlu Pinii mi khiima malo mohmi payapacho luma, ho mohlu mohluka henjuho gonduama ho mohluka piigoamanii henju hii kamo giida.

²²Piibi lusudo, mohlu piicha paya lyido,

²³ ho shiilamanii Pinii ka tatukatu mi puchinii ajju paya liibiido, miyukapu malo piita malo achu-amyo malo tabutiyyo kapu pulala.

²⁴Hopa Pinii mohlumi kahpa biido mohluka helyihembyo miibḛr nii ahha ho, mohluka apoatañ mi khiisu mapa miiko mohluka punkoho,

²⁵niimpalukoda mohlu jije Pinii ka piigo mi amuhlo liisu biido ho heriinyada ho miihonyada putolaka donii miya, Puniibomika hensa niimi, huna ayu dahepa lyakiñ donii! Amen.

²⁶Niimpalukoda siika piigopake Pinii mohlumi kahpa biinenii khiimanii henjuho. Mohluka nyimii atañ dumiñhenju miya opalala hensamanii yamiya herii nyada,

²⁷ho milobo atañ tiirḛ hiichulipa dumiñka nyimii atañ agiñ hoka hensu niimiya opa lala ho mohlu anyañ ya hensu nyada, milobo atañ hiinyañ manii loda miinyada milobo agiñho ho mohlu mohluka miigyopa kapa kendoke mohluka miikha kopa.

²⁸Ho mohlu Pinii mi lukodopa lyima lyiniiñ; Pinii mohlumi kahpa biido piigo giimanii henjuho ho miidimako miijuluju ho.

²⁹Mohlu kapane demma miiju poteje giida, diimmah, hemikaminiiñ, kanamapa miiniiñ. Poteje kariñ, miyumenii, gasupasu, surudonyo, nyapakoya luniiñ, mohlu biicho,

³⁰nipanii, Pinii mika kahunii, lujutaru, hengiñhentii siiniiñ, hentiisiila luniiñ, diimmah mika miiliñnii, annii-aba luniiñ tamanii,

³¹piicha, henje giimanii, ahhagiimanii, kiinyi.

³²Mohlu Pinii ka dapo mi chinsu dotrḛ hutiina siika drih atañmi miidonii shiido pa lyido hiila, mohlu kontii hiimi miima, hojalo hiimika miinii atañ miilañmi ayado ludota.