Read Apatani ROM 16 Bible Online

ROM 16 - Apatani bible

ROM 16

¹Ngo ngunuka barmii Poibe mi lubii lyike, Kenkrea gyoliñkonii daka nyimii deakon mi,

²nunu mohmi Attoh ko larii tolya piniimiyu atañ miichañ ho, ho mohmi hembyuñ tolya niihna mo nunukokii anna donii, niimpalukoda mo abuje miyu mi hembyuñ niipa dane ho ngiimi tiirḛ.

³ Priska la Ekuila nyimi ayahelyi, Kristo Jisu ko ngiika miigo miihiñ ahiñ,

⁴huna mohluka sango mi ngiika sango pa hempa siibi nii, humina ngo kontiima hikha Midomiyu hokiika gyoliñkonii atañ payapacho lukiñdo;

⁵ mohluka ude daka gyoliñkonii atañ mitrḛ ayahelyi luto. Ngiika heniiñja Ipanetas mi ayahelyi, huna kapyo japa ka Asia hokii Kristo pa lyiguhnii.

⁶Mary mi ayahelyi, huna hempḛr uro miigo miitiinii nunuka punkoho.

⁷Endronikas la Junias nyimi ayahelyi, ngiika henii-myanii ho ngiika pattiih tuhiñ koniiñ; mohlu kiiniñkonii punko hotiirḛ khiikonii miyuatañ ke, ho mohlu ngiimi tiirḛ kapyo yake Kristo ko.

⁸Emplitas mi ayahelyi, ngiika heniiñja Attoh ko.

⁹Arbanas mi ayahelyi, ngunuka miigo miihiñnii Kristo ko, ho ngiika heniiñja Istakis.

¹⁰Apelles mi ayahelyi, humina Kristo ko patiinii. Hiika atañ mitrḛ ayahelyi Eristobulus ka uru atañmi.

¹¹Ngiika disho Herodian mi ayahelyi. Hiika atañmi ayahelyi hutiina Narsisas ka uru hokiinii.

¹²Attoh koka miigo miinii atañmi ayahelyi, Tripena la Triposa mi. Heniiñja Parsis mi ayahelyi, huna Attoh ko uro miigo miine nii.

¹³Rupus mi ayahelyi, ayaloda miinii Attoh ko, mohka annii la ngiikii mitrḛ.

¹⁴Esinkritas mi ayahelyi, Plegon, Harmes, Petrobas, Harmes, ho anubarmii hutiina mohluka agiñho danii atañmi.

¹⁵Pilologus mi ayahelyi, Julia, Nerias ho mohka barmii mi, ho Olimpas, ho hikha piniimiyu atañmi hutiina mohluka agiñho dabo danii.

¹⁶ Kone anyañ mi dariipa mochu biidola ayahelyi hiila lusu tolya. Hikha Kristo koka gyoliñkonii atañ nunumi ayahelyi.

¹⁷ Ngo yarlyi ke nunumi, anubarmii atañ, hendi nyatolya hiika kokii hutiina luku luche ho ahiare miipa donii, nunu mika lukonii hokii chekho laka lunii atañmi; mohlumi adhopa atii tolya.

¹⁸Niimpalukoda sitañ miyu atañsi ngunuka Attoh Kristo mi miiho make, hojalo mohluka erre misuke, ho lujuaya ho luhiluso la aguñ lula la mohlu chimanii miyu atañmi gollu nyabiido.

¹⁹ Niimpalukoda niika lunii taniiñ mi hikharu chindo ke, hopa ngo niimi hempyo biidu, Ngo hendo no niihna aya nii hiimi chinkiñ cho ho niihna diimmah nii hiimi chima kencho hiila;

²⁰ ho chimie ka Pinii nyibya loda Saitan mi nunuka alih lo nyota lokiñ do. Ngunuka Attoh Jisu Kristo ka aroh-aya nunuka agiñho dabo kencho.

²¹ Timoti, ngiika miigo miihiñ ahiñ ayahelyi niimi; hii chulipa Lusius ho Jason ho Sosipeter, ngiika henii-myanii.

²²Ngo Tartius, siika pota siimika keniibo, Attoh ko ayahelyi.

²³ Gayas, huna ngiimika dugiibo ho hikha gyoliñkonii, nunumi ayahelyi. Irastas, citi ka tiickobiibibo, ho ngunuka anu Koartas, nunumi ayahelyi.

²⁵Siisi mohko huna nunumi alḛr giila kendonii ngiika ayapuyu chulipa ho Jisu Kristo ka tonsḛr khenyo nii hokii, chila maniiñ mika mihukakiñ nii chulipa nii mina ayu kolyuñ kolo hokii achuñ tola doniimi mih chimapa

²⁶hojalo siisi kakiñ doku ho nyibuhenii atañ keniiñho hikha miyu atañmi kakiñ tiiku, shiilamasa nii Pinii ka luniiñ chulipa, agiibitii henje laka luniiñ talii niimi

²⁷chiniiñ Pinii mi kontii assañ kencho ayudahepa Jisu Kristo kiilo! Amen.