Read Apatani ROM 5 Bible Online

ROM 5 - Apatani bible

ROM 5

¹ Hopa, ngunumi henje lo lupya bitii ku, ngunukii Pinii agiñho chimie hii do Jisu Kristo kiilo.

² Mo kiilo ngunu ahla dopa lyido siika aroh-aya ho nii hona ngunu danii, ho ngunu hempyodo ngunuka hentiñho Pinii ka tatukatu mi ngunu hembo kendo hiila.

³ Hiimitiirḛ abuyapa, ngunu hempyodu ngunuka heruhenkoho, chimbiitola heruheniiñ hii pigiilaniiñ mi lingiidu,

⁴ho pigiilaniiñ hii henju miiju mi lingiidu, ho henju miiju hii hentiñnanii mi lingiidu,

⁵ ho hentiñnanii hii ngunumi heru miipama, niimpalukoda Pinii ka heniiñmi ngunuka ahha ho bito kula doku Darii Yajiyallo lo nii mina ngunumi bitii kunii.

⁶Ngunu ka ajju laka do ho, shiidi ko jaho Kristo shiibitii piniimika heriimanii atañpa.

⁷Niimpa, cheche pasu kone shiibi lakiñ siidonii denki miyu pa hojalo denki miyu kone patrḛ ya shiibi dupa haro lama.

⁸ Hojalo Pinii ngunumi mohka heniiñmi kakiñtii ngunuka ingyamiigya laka darañho Kristo mi ngunu pa shiibi kiine biidola.

⁹ Hopa, ngunumi lupya bitiiku mohka ai lo, abuyapa ngunumi lyangur tiiku Pinii ka hadii hokii.

¹⁰ Niimpalukoda matiirḛ ngunuka ahha basula darañ ho Pinii ko ngunumi yardiñ bitii ku mohka Oho ka shiiniiñlo, abuyapa, siisi ngunumi yardiñ tiiku, ngunu mohka sango lo lyangur kokiñdo.

¹¹ Hiila kontii mata, hojalo ngunu Pinii ko hempyo du Attoh Jisu Kristo kiilo, huko hokiina ngunu siisi larii tiikunii ngunumika yardiñ bikuniimi.

¹² Hopa ingyamiigya hii dohadolo so ahtii miyu kone kokiila ho shiiniiñ hii ingyamiigya hokii, ho shiiniiñ hii hikha miyuatañ ko impyatii niimpalukoda hikha miyuatañ ingyamiigyanii

¹³ingyamiigya hii lusudokoda dohadolo so dotiiku dapo mi bima rañhokii, hojalo ingyamiigya mi khiima nohna dapo nyimanii.

¹⁴ Hojalo shiiniiñ hii Adam kokiila Mose lohepa dotii, hiiko lohepa huka ingyamiigya na Adam ka talemiile nii chuli masu tiirḛ, huna hii chuli tiinii ahsa boka kone hiilyañ.

¹⁵ Hojalo binyo paka ahmiñayiñ biniiñ hii pallenii hiilyañ make. Niimpalukoda matiirḛ abuje shiitii miyu koneka palle kopa, abuyapa Pinii ka aroh-aya hii do ho binyo paka ahmiñayiñ biniiñ miyu kone Jisu Kristo ka aroh-aya kopa, abujemi bitii.

¹⁶ Ho binyo paka ahmiñayiñ biniiñ hii miyu koneka ingyamiigya laka miijo chuli make. Niimpalukoda ayakacho kaniiñhii halii niimi ahgiido koneka palle kopa, hojalo ahmiñayiñ binyo biniiñ hii abujeka palle miiniiñmi luderbidupa.

¹⁷Hokoda matiirḛ, miyu koneka palle kopa, shiiniiñ hii dotii hiika miyu kokii, hiimi abuyapa hiika miyu larii kendo aroh-aya mi poteje ho binyo paka ahmiñayiñ denki hii domiñ biikiñdo miyu kone Jisu Kristo kiilo.

¹⁸Hokoda miyu koneka palle kopa hikha miyu atañmi halii dopa lyigiitii, hopa miyu koneka denki miigo miiko hopa tupya giiko lembo pagii kendo ho abuje miyu pa sango dokiñdo.

¹⁹ Niimpalukoda miyu koneka luniiñtama kopa abujemi ingyamiigya giitii, hopa miyu koneka luniiñ tako hopa abujemi denki dopa miikiñdo.

²⁰ Dapo hii ahtii, palle nii atañmi abu yake nendupa; hojalo nohna ingyamiigya hii abuyaya talyinii, aroh-aya hii abuyaya dori kendo,

²¹ hopa, ingyamiigya hii shiiniiñ mi dogiitii, aroh-aya hiitiirḛ dogii kendo denkilo santḛrlamanii sango mi Jisu Kristo ngunuka Attoh kiilo.