Read Apatani ROM 7 Bible Online

ROM 7 - Apatani bible

ROM 7

¹Nunu chimapo, anubarmii atañ niimpalukoda hutiina dapo mi chindonii hiipa ke ngo ludunii. Dapo hii mohluka turla daho hosuke rataliitola dosu donii

² Hiichulipa milo ingkunii nyimii mi dapo hii gapo liitola do nii dahepa mohka millo turla duchi; hojalo mohka millo matiirḛ shiido koda mohmi hiika dapo hii millo ka piigo hokii tupya tiiku.

³Hopa, mohmi ipfyo nii hiila lukiñdo mo matiirḛ millo turla durañpa khiibe miloboka agiñho dubo dokoda. Hojalo mohka millo matiirḛ shiine kukoda mo dapo hokii tupya kotiiku, ho mo matiirḛ koneya millo biidokoda mohmi ipfyonii hiila lukiñma.

⁴ Hiichulipa, ngiika anubarmii atañ, nunu shiitii ku dapo pa Kristo ka apo kiilo, hopa nunu khiibe koneyakii kuke, hiikii humina shiiniiñ hokii turiturku kiine tiikunii niimpalukoda ngunumi Pinii pa ahee hibi kiine dupa.

⁵ Ngunuka asiialyo hoka sala darañho, ngunuka ingyamiigyanii henjuhembyo, dapo loka heri dopa miiniiñ, ngunuka asiialyo kone miikañla done shiigo ka ahee higiipa.

⁶Hojalo siisi ngunumi dapo hokii apalintiiku, niimpalukoda nii hona ngunumi nyima latu tola dotiinii hokii ngunu shiitii ku, Hopa ngunu bilo ka khu keto laka dapo donii hiilyañ miiho make hojalo Yajiyallo ka niti sango hoke.

⁷ Nii hiilape hokoda ngunu luchinii? Dapo si ingyamiigya hiila peha? Pema hiilama! Hojalo, siikasi matiirḛ dapo pama tiikoda, ngo ingyamiigya hii niihmi ludu chindiima. Ngo chindiima helyihembyo luniiñsi niihmipe hiila, dapo matiirḛ luma tiikoda, “Nunu helyihembyo kemake ah.”

⁸ Hojalo ingyamiigya hii, lujubiniiñ ho ayamyodu mi kapa biido, kapaneka helyihembyo mi ngiiko alii bitii. Dapo mi apa lala ingyamiigya hii shiila sii dosu dunii.

⁹Ronge ngo turla dato dapo mi apa lala, hojalo lujubiniiñ ka ahlyi kuho, ingyamiigya hii turiturku ho ngo shiitoku;

¹⁰ hiika lujubiniiñ niihna ngiimi sango mi hemme bidonii hii kakoso ngiipa shiigii dopa ya lyido.

¹¹Niimpalukoda ingyamiigya hii, aya myodu mi kapa biido lujubiniiñ ho, ngiimi talubalotii ho hiilo ngiimi mentii.

¹² Hopa dapo hii dariike, ho lujubiniiñ hii darii ho jije ho ayake.

¹³Hokoda, niihna aya donii hiiha shiigo mi ngiipa ahgii biniiñ? pema hiila ma! Hiika hii ingyamiigya sii, shiiniiñ hii ngiiko miila do niihna aya donii hiimi miita nala, niimpalukoda ingyamiigya mi ingyamiigya hiila kadḛr kiine dupa, ho lujubiniiñ lo ingyamiigya mi uro yapa kadḛr yadopa.

¹⁴ Ngunu chindo dapo hii yajiyallo ka drih hiila; hojalo ngo asiialyoho da, pyukotii ingyamiigya ho.

¹⁵ Ngo ngiika miiniiñmi chinsu ma. Niimpalukoda ngo miima niihna ngo miina donii, hojalo ngo miidu ngiika miina maniiñ jami.

¹⁶Siisi ngo matiirḛ miido koda nii mina ngo miina manii, Ngo taliimondu dapo si ayado hiila.

¹⁷Hopa siikasi ngoma siimika miinii bosi, hojalo ingyamiigya ngiika ura hoka duniibo.

¹⁸Niimpalukoda ngo chindo hang aya ngiiko giima hiila, hiika hii, ngiika asiialyoho. Ngo miinala hensudo niihna miidi konii, hojalo ngo miila ma hiimi.

¹⁹Niimpalukoda ngo miima aya mi nii mina ngo miina donii, hojalo diimmah miya nii mina ngo miina manii hiimi ngo miido.

²⁰Siisi ngo matiirḛ miido koda nii mina miina manii, hiika hii ngoma hiimi ka miinii bo, hojalo ingyamiigya ngiika ura hoka dunii bo.

²¹Hopa ngo kapa biido dapo mi niidana ngo miidi komi miina donii, diimmah hii aruñho do.

²²Niimpalukoda ngo Pinii ka dapo ho hempyo du, ngiika atoh uraho,

²³ hojalo ngo kapado ngiika asiialyo ka ura ho dapo koneya pasula do ngiika henju ka dapo agiñho ho ngiimi labii tola biido ingyamiigya ka dapo ngiika ura hoka duniisi.

²⁴ Ngo aburnii miyu! huna ngiimi siika apo ka shiigo hokii tupya kendo kunii?

²⁵Payapacho Pinii mi Jisu Kristo ngunuka Atoh kiilo! Hokoda, ngo atohpa Pinii ka dapo mi miiho talyi ngiika Punyu lo, hojalo ngiika asiialyo lo ngo ingyamiigya ka dapo mi.