Read Apatani ROM 8 Bible Online

ROM 8 - Apatani bible

ROM 8

¹ Hiiko hopa siisi hang khiiliisaniiñ nyima hiipa hutiina Kristo Jisu ko danii.

² Niimpalukoda Yajiyallo ka dapo ka sango, Kristo Jisu koka doniihii ngiimi tupya tiiku ingyamiigya la shiiniiñ ka dapo hokii.

³ Niimpalukoda Pinii miitiiku dapo ka miila manii mi, asiialyo loka ajju giiniiñ mi: mohka atoh Oho mi ingyamiigya ka asiialyo kapupa ho ingyamiigya pa kiiniñ bilala, mo asiialyoho ingyamiigya mi khiiliitii,

⁴ niimpalukoda dapo ka denki anna niimi ngunuko lyipe kiine dupa, huna asiialyo ka henju ho imapa hojalo Yajiyallo kii dalyi indonii.

⁵Niimpalukoda huna asiialyo kii dalyi sandonii hii mohka ahha mi asiialyo ka drih dalyi hengado, hojalo huna Yajiyallo kiilo sandonii hii mohka ahha mi Yajiyallo kii dalyi hengado.

⁶ Punyu mi asiialyo dalyi henga dopa miiniiñsi shiigo ke, hojalo punyu mi Yajiyallo kii dalyi henga dopa miiniiñsi sango la chimie ke.

⁷Niimpalukoda ahha mi asiialyo kii dalyi henga dopa miiniiñsi Pinii mika ahha-banii ke; hiika hii Pinii ka dapo ho tiilii siibima, jijeloda tiilii lakiñma;

⁸ ho huna asiialyo kii dalyi danii hii pema Pinii mi hempyo miipa lakiñma.

⁹ Hojalo nunu asiialyoho damake, nunu Yajiyallo hoke danii, jijeloda Pinii ka Yajiyallo matiirḛ nunuko giido koda. Hujalo kone Kristo ka Yajiyallo mi giima hii mohkiima ke.

¹⁰ Hojalo Kristo matiirḛ nunuko dukoda, nunuka apo ingyamiigya kopa shiido jalo, nunuka yajiyallo turla doke denki kopa.

¹¹ Hiika Yajiyallo matiirḛ nunuko giido koda huna Jisu mi shiinii hokii turdo miibii nenii, mo huna Kristo Jisu mi turdo pa miitiinii hii bikiñ doke sango niika shiinii apo ho mohka Yajiyallo niihna nunuko giidonii

¹²Hopa, anubarmii atañ, ngunu gyandi giiniike, asiialyo homa, asiialyo ka sanchañ ho sandupa

¹³ niimpalukoda nunu matiirḛ asiialyo ka sanchañ ho sando koda nunu shiikiñ do, hojalo Yajiyallo lo matiirḛ nunu asiialyo ka miigomi mentii kukoda nunu sankiñ doke.

¹⁴ Niimpalukoda hikha hutiina Pinii ka Yajiyallo lo pagii kodonii hii Pinii ka oho atañ ke.

¹⁵ Niimpalukoda nunu miira lyigiibo yajiyallo mi larii make hiira biiso dupa, hojalo nunu oho lyidu paka yajiyallo mike larii tiinii. Niida ngunu gyochi, “Abba! aba!”

¹⁶ siikasi Yajiyallo mo atoh haki bido ngunuka yajiyallo agiñho ngunu Pinii ka wiinga ke hiila,

¹⁷ ho ngunu matiirḛ wiinga koda, ngunu pensi kosa nii, Pinii kiimi ka penko sanii ho Kristo ahiñpa pensi kosanii, ngunu mo agiñho heru hembodu niimpalukoda mohka tatukatu ho ngunu tiirḛ dubo dupa.

¹⁸ Ngo hendo siisika heru heniiñ hang masu khiitiñ nansu dokoda hiika tatukatu agiñho nii mina ngunumi kakiñ kendonii.

¹⁹ Niimpalukoda miiliñ luliñnii atañ kalya rela doku Pinii ka oho atañ mika kakiñ saniiñ mi;

²⁰niimpalukoda miiliñ luliñnii atañmi piigoama hiila khiipa dopa lyidoku, mohluka atoh henko homa hojalo mohka henko hosu huna hiimi hentiinii hiisu;

²¹ niimpalukoda miiliñ luliñnii atañmi lohe atoh tupya kendoku miirapaka bukonii hokii ho hempyo tupya koku niimi kapa kendoku Pinii ka oho atañka agiñho.

²²Ngunu chindo hikha miiliñ luliñ konii atañ siisi lohe pa achihla do tongepa;

²³ ho puliñnii kontiima, hojalo ngunu atoh tiirḛ, huko hona Yajiyallo ka ahee hipyoja donii, ura ho herula ngunu kalya du oho pa chiko nyadupa, ngunuka apo mika tupyabiniiñ mi.

²⁴ Niimpalukoda siika hentiñ naniiñso ngunumi lyangur tiiku. Siisi kapa niika hentiñ naniiñ si hentiñ naniiñ make. Niimpalukoda hu hentiñdu mo kapa biidola?

²⁵Hojalo ngunu matiirḛ hentiñ dokoda nii mina ngunu kapa manii, ngunu pigiibiidola hiimi kalya du.

²⁶Hiichulipa Yajiyallo ngunumi hembyuñ du ngunuka ajju ho; niimpalukoda ngunu chima niihtañpa kukiñdo ngunuka kusa niimi, hojalo Yajiyallo ngunupa kubidu hempḛr uropa hiimi hiika aguñmi luko lakiñma.

²⁷ Ho mo huna miyu ka ahha mi medonii chindo Yajiyallo ka heniiñmi, niimpalukoda Yajiyallo kubidu piniimiyu atañpa Pinii ka henju jaho.

²⁸Ngunu chindo kapane drih hii Pinii aya kiipa sii miidunii hiipa huna mohmi hendonii, humina mohka miigo pa gyotiinii.

²⁹ Niimpalukoda humina mo chimpyo tiinii mo bardiñsoyu mitiirḛ bitii mohka oho chuli lyidopa, niimpalukoda mohmi kapyo jaka wiinga bukoniipa miidupa abuje anubarmii atañka punkoho.

³⁰Ho humina mo bardiñsoyu tiinii mo hiimi gyoduta; ho humina gyotiinii hiimi lupyatiiku; ho humina lupyatiikunii mo hiimi tatukatu kiine duta.

³¹Nii hiila pe hokoda ngunu luchi nii siimi? Pinii ngunupa matiirḛ dukoda, hu ngunumi chekho kendo?

³² Mo huna atoh ka Oho mitrḛ atii siibii manii hojalo ngunupa hiila bipatii, mo ngunumi amane drih mi mo agiñho bikiñ mata ehna?

³³ Hu Pinii ka kahe niimi halii lakiñdo? Siikasi Pinii ke huna lupya bidonii;

³⁴ hu khiilii kendo? Hii Kristo Jisu peha, huna shiibi tiinii, ḛh, huna shiinii hokii turitiikunii, huna Pinii ka lahbi alah ho dunii, huna ngunupa kubila dunii? [2]

³⁵Hu ngunumi Kristo ka heniiñ hokii miipe kendo? Hentḛrkanyiha, malo hengahenkhaha, malo miihimiireha, malo diime ahniiñha, malo nyimadama niiha, malo hachesiireha, malo ilyoha?

³⁶Hiila ketola do, “Niimpalukoda niipa ngunu hikha allo loteje menkotii; ngunumi subuñ menkosanii chulipa hentii.”

³⁷ Ma, hikha siika drih siimi ngunu pamiñ tiiku mohkiilo huna ngunumi hendo nii.

³⁸Niimpalukoda ngo hentiñdo shiigo jalo, sango jalo, miidopopi jalo, henjumiiju jalo, siisika drih atañ jalo, ahsanii drih atañ jalo, tamochikho jalo,

³⁹ohoh jalo, urañ jalo, hikha puliñnii hokii hang kone tiirḛ, miipe lakiñma ngunumi Pinii ka heniiñ hokii Kristo Jisu ngunuka Attoh kokii.