Read Apatani 1 KORINTIA 12 Bible Online

1 KORINTIA 12 - Apatani bible

1 KORINTIA 12

¹Siisi yajiyallo ka ahmiñayiñ ka piigo mi, anubarmii atañ, ngo nunumi luko mapa biina ma.

² Nunu chindo nunuka Pinii mika henje mapa ka dalyiho, nunumi ngogiila lyitii luhanii puchiniiko, ho nunu imbo montii.

³ Hopa ngo nunumi hiila chinke nenado kone hetrḛ Pinii ka Yajiyallo lo lunii bo lukiñma, “Jisu mi beto!” ho kone hetrḛ lula kema “Jisu Attoh” Yajiyallo lo lumapa.

⁴Siisi abuje ahmiñayiñ atañ do, hojalo Yajiyallo ahiñ losu;

⁵ho abuje miiho sanii do, hojalo Attoh kone sii;

⁶ho abuje miigo do, hojalo hiika hii Pinii kone sii huna hiika atañmi miidopa haro lupa donii kone abimi.

⁷Kone abimi Yajiyallo mi bitii miilañruka aya kiipa.

⁸Kone mi Yajiyallo lo bitii chila mi luliñ dopa, ho kone mi chiniiñmi bitii Yajiyallo ahiñlo,

⁹kone mi bitii henje mi Yajiyallo ahiñlo, kone mi miipya lanii ka ahmiñayiñ Yajiyallo kone lo,

¹⁰ kone mi miimalyanii miigomi miidopa, kone mi nyibu hendopa, kone mi yajiyallo atañmi kangu kare ladopa, kone mi abuje aguñ lula dopa, kone mi lusi bila dopa aguñ atañmi.

¹¹Hikha siika atañsi ahiñ ho Yajiyallo kone loka miiniiñsii, huna kone abimi kabii dola mohka henko ho bidonii.

¹² Niitañpa apo konesii ho abuje hakhu giidu, hikha hakhu atañ apokii, abuje dosu dojalopa, hii apo konesii, hopa hii chuli Kristo kotrḛ.

¹³ Niimpalukoda Yajiyallo konelo ngunu hikha baptisma bikotii apo koneho-Jew atañ malo Grik atañ, miira atañ malo dasḛr danii atañ-ho hikha rumi miitii Yajiyallo kone mi tandopa.

¹⁴Niimpalukoda aposi hakhu konelo kontii miimake hojalo abu jelo ke.

¹⁵Alih matiirḛ ludo koda, Niimpalukoda ngo alahma, hopa ngo apo kiima, hiika hii hiimi apo hokii ponsa giima.

¹⁶Ho yaroo matiirḛ ludo koda, “Niimpalukoda ngo amee ma, ngo apo kiima,” hiika hii hiimi apo hokii ponsa giima.

¹⁷Hikha apo hii matiirḛ amee koda, tanananii nohna? Hikha apo hii matiirḛ yaroo koda, nempa nanii hii nohna?

¹⁸Hojalo siikasi hiila sii, Pinii hakhu atañmi apo ho giidopa miitii, kone abimi, mohka henko jaho.

¹⁹Hikharu matiirḛ hakhu ako kontii tiikoda, apo hii no pe dokiñ donii?

²⁰Hiiko hopa, hakhu abuje giido, hojalo apo konesii.

²¹Amee hii lula kema alah mi, “Ngo niimi anna make,” malo adiñ hii lula kema alih mi, “Ngo niimi anna ma.”

²²Yoheyapa ludo koda, apo ka hakhu hii niihna ajju kapa kado nii hii uro ya piigoanii pa lyido.

²³ho hiika apo ka hakhu atañmi nii mina ngunu hendo nii ano khiiniiñ ma hiila ngunu hiimi uro yapa khiido pa miidu, ho ngunuka kakiñ lasamanii hakhu atañmi aya yapa khiibiido,

²⁴niihna ngunuka abuya kakiñ lasanii hakhu atañ ho anna manii. Hojalo Pinii apo mi hiila dopa miitii, uroyapa khiidopa khiimanii hakhu mi,

²⁵niimpalukoda apo ho tache tahe giima dopa, hojalo hakhu atañmi ahiñpa kalyañkada kahiñ siidopa kone anyañ mi.

²⁶Hakhu kone matiirḛ heru dokoda, hikharu tongepa heru mondo; hakhu kone mi matiirḛ khiido koda, hikharu tongepa hempyo mondu.

²⁷ Siisi nunu Kristo ka apo ke ho kone abi nunu hiika hakhu ke.

²⁸ Ho Pinii kapyo japa gyoliñkonii ho kiiniñkonii mi kahetii, anye niipa nyibuhenii atañmi, hinge niipa tonsḛrbo atañmi, hiika hiibaho miimalyanii miigo miinii atañmi, hiikahiiba ho achih miipya niimi, hembyuñ niimi, giirasogiinii atañmi, ponge ponge aguñpaka lunii atañmi.

²⁹Miilañru kiiniñkonii peha? Miilañru nyibuhenii adiñ peha? Miilañru tonsḛrbo adiñ peha? Miilañru miimalyanii miido peha?

³⁰Miilañru miipya lanii ka ahmiñayiñ mi giido peha? Miilañru ponsa ponsa aguñpa ludo peha? Miilañru lusi bido peha?

³¹Hojalo uroya ahmiñayiñ atañmi hemi nyato. Ho ngo nunumi aya ya lembo kakiñso.