Read Apatani 1 KORINTIA 15 Bible Online

1 KORINTIA 15 - Apatani bible

1 KORINTIA 15

¹Siisi ngo nunumi lupa nando, anubarmii atañ, ngiika nunumika ayapuyu luko niimi, nii mina nunu larii tiinii, niihona nunu danii,

²niilona nunu lyangur kotiinii, nunu matiirḛ siimi biikañ dokoda, hiila makoda nunuka henjenii piigo ama.

³ Niimpalukoda ngo nunumi bibiilyi kapyo japa khiila nii mina ngo larii tiinii, Kristo ngunuka ingyamiigyanii atañpa siibi tii piniipota ka keniiñ chulipa,

⁴ mohmi alie tiiku hiila, lohiñnii allo ho mohmi seri tiiku piniipota ka keniiñ chulipa,

⁵ ho mo Cepas ko ahtii, hiikahiiba ho alyañlenye ko.

⁶Hiikahiiba ho mo langohemi abuyanii anubarmii atañ ko rongepa ahtii, abuya siisi jalo durañ, tonge miti neku jalo.

⁷Hiikahiiba ho mo Jems ko ahtii, ho hikha kiiniñkonii atañko.

⁸ Kami japa, budu mapa ka bukonii, mo ngiiko hotiirḛ ahhii.

⁹ Niimpalukoda ngo kiiniñkonii hopa atu jaku, kiiniñkonii hiila gyoko dupa tiirḛ lyima, niimpalukoda ngo Pinii ka gyoliñkonii mi miihimiireto.

¹⁰Hojalo Pinii ka aroh-aya kopa ngo da niihtañ pajalo ngo da, ho mohka ngiikii dalyi hoka aroh-aya niisi piigoama miima. Yoheyapa ludo koda, ngo uro yapa miigo miinii kone abimi, hii ngoma siijalo, hojalo Pinii ka aroh-aya niihna ngiiko donii.

¹¹Hiikohopa hiika hii ngo ha malo mohluha, ngunu tonsḛr khenyo du ho hopa nunu henje nyado.

¹²Siisi Kristo mi shiinii hokii turikunii hiila tonsḛr khenyo dokoda, niihtañpa nunu tonge lula kendo shiinii atañ turiturku kema hiila?

¹³Hojalo shiiniiñ hokii turiturku kuniiñ matiirḛ nyima koda, hokoda Kristo mi turiturku kiine kudii matii;

¹⁴ Kristo matiirḛ turiturku matii koda, ho ngunuka tonsḛrkhenyo niisi piigo ama ho nunuka henje hii piigo giima.

¹⁵Ngunumi amuhpa Pinii mi lukodopa lukiñdo, niimpalukoda ngunu Pinii kiimi pyakodo mo Kristo mi turidopa miibii ne hiila, mohmi turi dopa miima tiikoda siika luniiñsi matiirḛ jije koda shiinii hii turiturku dukuma.

¹⁶Niimpalukoda shiinii hii matiirḛ turiturku kuma koda, hokoda Kristo tiirḛ turiturku diima.

¹⁷Kristo matiirḛ turiturku matii koda, nunuka henjenii piigo ahkiñma ho siisi jalo nunu nunuka ingyamiigyaniiho darañdo.

¹⁸ Ho hutiina Kristo ko miti nyatiikunii hiika atañ tiirḛ lyuja tiiku.

¹⁹Niimpalukoda ngunuka Kristo mika hentiñ naniiñ hii matiirḛ siika sango pa kontii siikoda, ngunu hikha dohadolo hopa koda arohkapa japa lyikiñdo.

²⁰Hojalo jije hii hiila Kristo shiinii hokii turiturku tiiku, kapyo japa ka ahee hipyoja hutiina miti nyatiikunii.

²¹ Niimpalukoda miyu kone kokii shiiniiñ hii ahtii, hiichuli miyu kone kokii shiinii hokii ka turiturku kuniiñ ahdo.

²² Niimpalukoda hikha Adam ko shiitii, hiichulipa Kristo ko hikha rumi turdo miikiñdo.

²³ Hojalo kone abi atoh ka myoduho: Kristo ahee hipyoja, hiikahiiba ho mohka ahlyi kuho hutiina Kristo kiinii.

²⁴Hiikahiiba ho santrḛ kendoku, niida mo bichi ku raddeganda mi Pinii Aba mi hikha sangiinii, ho kapane otority mi ho kapane harchichike mi pyadu loke nenku lala.

²⁵Niimpalukoda mo sangii kendo loda nii dahepa mo hikha mohmika ahha banii mi mohka alih ho nyota nantema.

²⁶Kami japa ka ahha banii mika mudu losanii hii shiinii.

²⁷ “Niimpalukoda Pinii hikha drih mi mohka alih ho nyota naniiñpa atii kento.” Hojalo hiila ka luniiñsi, “Hikha drih mi mohka ura ho dokiñdo luniiñsi,” siikasi hiila mohmi apa tiila, huna hikha drih mi mohka ura ho atii tiinii.

²⁸ Niida hikha drih atañmi mohmi sangii dopa atii bichi, ho Oho mo tiirḛ atohmi mohka ura ho atii siikiñdo huna hikha drih atañmi mohko atii bitiinii, hopa Pinii kapanepa lyikiñdo kone abipa.

²⁹Hiilamakoda, niipa miyuatañ baptisma bichi shiinii pa hiila? Shiinii mi matiirḛ turi kiine kuma loda koda, niimpa miyuatañ mohlupa hiila baptisma lanya da?

³⁰Niimpa ngo gunta tahe abi achi-ahlya talyi?

³¹Ngo lulyike, anubarmii atañ, ngiika nunukoka hentii siiniiñ niihna ngiiko Kristo Jisu Attoh ko donii, Allo karmyañmi ngo siidu!

³² Nii pe ngo miiliñ biikiñ donii, miyu kii dalyi pa matiirḛ ludo koda, ngiika Ipisia ho achu-amyo agiñ hoka pasuko? Shiiniiñ hokii matiirḛ turi kuma koda, “Kiije ngunu diisa tansa, niimpalukoda arda ngunu shiikiñ do.”

³³Talubalo koyo: “diimmah ajiñhii denki henju mi miipya lodo ke.”

³⁴ Nunuka henju aya ho henya toku, ho ingyamiigya nyakuyo. Niimpalukoda tonge Pinii mi chinya make. Ngo siimi nunuka hiinyañ kiipa ke ludu nii.

³⁵Hojalo mi kone taka kendo, “Niitañpa shiinii hii turi kendo? Niitañ apo giitola mohlu ahkiñdo?”

³⁶ Nunu piicha miyu! Nii nunu lilodo hii sancha kemma nii dahepa hii shiite ma.

³⁷Ho nii nunu lilo do hii apo make hiikahii lyisa niike, hojalo kormo arasii, rongkoda emmo malo khiibe kormo do.

³⁸Hojalo Pinii hiimi apo bido niihtañpa mo kahetii, ho kormo pere abika apo mi.

³⁹Niimpalukoda hikha apo atañ kone chitañ make, hojalo miyu pa kone sii, achu-amyo atañpa koneya, piita atañpa koneya, ho koneya ngiiyyi pa.

⁴⁰Miidoago ka apo tiirḛ donya do ho kiiddiapiñ ka apo tiirḛ donya do; hojalo miidoago ka tatukatu nanii kone, ho kiiddiapiñ mika tatukatu nanii koneya.

⁴¹Danyi pa tatukatu nanii kone, ho koneya piilo paka tatukatu nanii, ho takḛr atañpa tatukatu koneya; niimpalukoda takḛr pere hokiila takḛr pere hii tatukatu nanii ponsa yado.

⁴²Hii chulipa shiinii ka turiturku kuniiñ tiirḛ. Niimina lilo donii hii lyula sanii, niihna turidokunii hii lyula samanii.

⁴³Siika siimi khiimapa lilotii, siikasi tatukatu ho turido. Siika siimi ajju ho lilo tii, siika si harchichike ho turido.

⁴⁴Siika siimi ahuapo pa lilotii, siikasi yajiyallo ka apo lo turido. Hiiko matiirḛ ahuapo giido koda, hiikaho yajiyallo ka apo tiirḛ giido.

⁴⁵Hopa hiila ketola do, “Kapyo ja miyu Adam turnii miyu pa lyitii”; kami Adam yajiyallo ka sango binii.

⁴⁶Hojalo siikasi yajiyallo make kapyo hii ahuapo siike, ho hiikahiiba ho yajiyallo.

⁴⁷Kapyo miyu hii kiiddiapiñ hokiitii, dimḛr ka miyu; anyenii miyu hii dariiganda hokii.

⁴⁸Niihtañpa dimḛr hokii miyu lyitii, hiichuli hiika atañ tiirḛ hutiina dimḛr hokii; ho niihtañpa dariiganda hokii miyu, hiichulipa hiika atañ tiirḛ dariiganda hokii.

⁴⁹Niitañpa ngunu dimḛr ka miyu ka ajju mi giido, ngunu tiirḛ dariiganda ka miyu ajju mitrḛ giikiñdo.

⁵⁰Ngo siimi nunumi lukodu, anubarmii atañ: asiialyo la ai nyi Pinii ka raddeganda mi penko lakiñma, malo lyula sanii hii penko lakiñma lyula sama niilo.

⁵¹ Kato! ngo nunumi mi chimaniimi lukodu. Ngunu miilañru miti kemake, hojalo ngunu miilañru lyiguh kendo,

⁵²ohepada, amee mibey tado ho, kamikalo jaho joka siirii mulyi ho. Niimpalukoda siirii mukiñdo, ho shiinii hii turikendo lyulasama niiho, ho ngunu lyiguh kendo.

⁵³Niimpalukoda siika lyula sanii mi lyula sama niiho alii bikiñdo, ho siika shiila sanii mi shiila sama niiho alii bikiñdo.

⁵⁴Niida lyula sanii mi lyula sama niiho atii talyi, ho shiila sanii mi shiila sama niiho, ho ahkiñdo siisi ka luniiñ atañ keto laka donii hii: “Shiigo mi pamiñniilo aniiñbiine.”

⁵⁵“O shiigo, noh niika pamiñii hii? O Shiigo, noh niika iitha hii?”

⁵⁶Shiigo ka iitha hii ingyamiigya, ho ingyamiigya ka harchichike hii dapo ke.

⁵⁷Hojalo Pinii mi payapacho hiisa, huna ngunumi pamiñ dopa bidonii Attoh Jisu Kristo kiilo.

⁵⁸Hopa, ngiika heniiñja anubarmii atañ, ranttito, abyukomapa, kiirañ Pinii ka miigomi miingu mapa miito, chimbiidola Attoh koka niika miiniiñ hii piigo ama lyikiñ ma hiila.