Read Apatani 1 KORINTIA 16 Bible Online

1 KORINTIA 16 - Apatani bible

1 KORINTIA 16

¹ Siisi piniimiyu atañ paka bibyuñ niimi: niihtañpa ngo Gelesia daka gyoliñkonii atañmi lukoto, hii chulipa nunu tiirḛ miito.

² Kanualo karmyañ ka kapyoja allo ho, kone abi nunu hang drih kone lakhu linto la atiito ho hiimi atii tiikuñto, mohka donii hokii, niimpalukoda bibyuñ bitiñ dopa lyikiñ make ngiika ahlyi ho.

³ Ho niida ngo ahchi, ngo kiiniñ talyike humina nunu siitipota ho ketola giinenii nunuka ahmiñayiñ mi Jerusalem ho biilii dopa.

⁴Hiila matiirḛ ludo koda ngiimi tiirḛ inkiñcho hiila, mohlu ngiimi imbo molyi diike.

⁵ Ngo nunuko kaha talyike Masedonia ho ahbiitella, niimpalukoda ngo Masedonia ho ahbii talyi hendo,

⁶ho rongkoda ngo nunuka agiñho dubo todiike malo rongkoda dorii piilo hemi duto diike, niimpalukoda nunulo ngiika myodi ingo mi nyibya yapa indo pa miiko dupa, no jalo ngo inchi.

⁷ Niimpalukoda ngo nunumi siisi impo biila kontii kaka nama; Ngo hendo nunu agiñho myodu iche myopa monto do hiila, Attoh matiirḛ talii dokoda.

⁸ Hojalo ngo Ipisia ho duchi penticost allo lohepa,

⁹ niimpalukoda lyego kahe pa ngiika miigo miiko pa miiko bitii, ho hiiko ho abuje chekho niitrḛ du.

¹⁰ Niida Timoti ahchi, kage tolya mohmi nunuka punkoho dupyopa dudo pa, niimpalukoda mo Attoh ka miigo mike miidonii, ngo chuli.

¹¹Hopa kone hetrḛ mohmi khiipa lyayo. Hembyuñ tolya mohka lembo mi chimie pa, mohmi ngiiko ahkur lado kupa; niimpalukoda ngo mohmi anubarmii atañka agiñho ahdo kukoda hiila hendo.

¹² Ngunuka anu Apollos pakoda, ngo uroloda lyarto mohmi nunumi kaha biinge ku hiila khiibe anubarmii atañka agiñho, hojalo siikasi hikha mohka henko homa siisi ahdo pa. Mo ahkiñdo niida mo ahdopa myodu kapa la lyichi.

¹³ Hendila datolya, nunuka henje ho alḛrpa datolya, harotolya, tamo tolya.

¹⁴Hikha nunuka miiniiñ hemi hensu ho miitolya.

¹⁵Siisi, anubarmii atañ, nunu chindo Istepanas ka uru atañ Akaia hopaka kapyo japa ka lyiguhnii, ho mohlu atohmi piniimiyu atañpa miigo miibi ko hengala miine;

¹⁶Ngo nunumi yarlyike sitañ miyu atañka luniiñmi tatolya ho kone abi agiñho ho miigo miinii agiñho.

¹⁷Ngo hempyo do Istepanas ho Portunatas ho Akaikas ka ahniiñmi, niimpalukoda mohlu nunuka nyima niimi hempa madopa miibii ne;

¹⁸niimpalukoda mohlu ngiika yajiyallo mi ho nunu kiimi tiirḛ niti dopa miibiine. Sitañ miyu mi kala tolya.

¹⁹ Asia daka gyoliñkonii atañ ayahelyi hiiniiñmi lulii doke. Ekuila la Priska nyi, mohluka ude daka gyoliñkonii agiñho, nunumi ahha hokiila ayahelyi hiila bilii bilyi ke Attoh ko ho.

²⁰ Hikha anubarmii atañ ayahelyi hiila bilii biilyi ke. Kone anyañmi ayahelyi hiila darii mochu mi mosu tolya.

²¹ Ngo, Pol, siika ayahelyi hiiniiñmi ngiika alah loke kebii lyinii.

²² Kone ko matiirḛ Attoh kiipa heniiñ nyima koda, mohmi beko kiineto. Ngunuka Attoh, ahlyiku!

²³ Attoh Jisu ka aroh-aya nunuka agiñho dokiñ cho.

²⁴Ngiika heniiñ nunu miilañ ruko dolyike Kristo Jisu ko. Amen.