Read Apatani 1 KORINTIA 2 Bible Online

1 KORINTIA 2 - Apatani bible

1 KORINTIA 2

¹ Ngiika nunu koka ahlyi ho, anubarmii atañ, ngo Pinii paka pyakoniimi nunumi gyuko dupa amake goro papo lubii dola malo lulalo.

² Niimpalukoda ngo hiila henjutii nunulo hang chinko tama Jisu Kristo la mohmika leda niimi opa lala.

³ Ho ngo nunuka ajju ho dabo monto ho hempḛr biiso ho la alye laka daho;

⁴ ho ngiika luniiñ la ngiika puyu hii chila loka lujuaya luniiñ chuli mane, hojalo Yajiyallo la harchichike nyika kakiñ niiñ,

⁵ niimpalukoda nunuka henje mi miyu atañka chila ho doma dopa hojalo Pinii ka harchichike ho.

⁶ Hojalo hangḛr kuniiñ atañ ho ngunu chila mi tiilii du, si siika santuñ ka chila masu jalo malo siika santuñ ka sangii nii boka masu jalo, huna lyukiñ donii.

⁷ Hojalo ngunu mih chimanii ho Pinii ka achuñ tola donii chila mike tiilii duniiñ, Niimina Pinii ayuho miiju tiinii ngunu mika assañ naniipa.

⁸ Kone hetrḛ siika santuñ soka sangii nii atañ siimi chima; niimpalukoda mohlu matiirḛ chintii koda, mohlu leda diimmah tatukatu ka Attoh mi.

⁹Hojalo, hiila keto laka donii hiilyañpa, “Amee kone katrḛ kapa manii, malo yaroo tapa manii, malo miyu ka ahha ka henka manii, nii mina Pinii miiju bitiinii hiipa huna mohmi hendonii,”

¹⁰ Pinii ngunumi kakiñ tiiku Yajiyallo lo. Niimpalukoda Yajiyallo kapane hemi medu, Pinii ka urañ mi lohepa.

¹¹Niimpalukoda niihtañ miyu na chindonii miyu ka henju mi hii mohka yajiyallo lomasiipeha niihna mohko giidonii? Hii chulipa kone hetrḛ Pinii ka henju mi chila kema Pinii ka Yajiyallo mapa.

¹² Siisi ngunu larii tiiku dohadolo ka yajiyallo ma, hojalo Yajiyallo niihna Pinii kokii nii, niimpalukoda ngunu chindupa ahmiñayiñ mi ngunu mika Pinii ka biniiñ mi.

¹³ Ho ngunu siimi aguñ pa luko lusidu miyu ka chila lomapa hojalo Yajiyallo ka chila lo, lukolusi la yajiyallo ka jijemi hiimi huna Yajiyallo giidonii.[1]

¹⁴ Yajiyallo giimanii miyu lariima Pinii ka Yajiyallo ka ahmiñayiñ mi, niimpalukoda hiika atañ mohlupa piigo ama, ho mo hiika atañmi chilama niimpalukoda hiika atañ yajiyallo loka kalasanii.

¹⁵ Yajiyallo miyu hii hikha drih mi kaladu, hojalo mo kone lotrḛ halii koma du.

¹⁶ “Niimpalukoda hu Attoh ka henju mi chila kendo ho mohmi hiila miito hiila lula dopa?” Hojalo ngunu ko Kristo ka henju hii do.