Read Apatani 1 KORINTIA 5 Bible Online

1 KORINTIA 5 - Apatani bible

1 KORINTIA 5

¹Siikasi jijemi ludo koda hiila lukodo nunuka punkoho ingyamiigya henju hii do, ho hiitañje nii mina khiibemiyu kotrḛ ya kapa ma; niimpalukoda miyu hii dubo da aba ka mihie agiñho.

²Ho nunu hentii siinya da! lusudokoda nunu heru laya heru kema siipeha? Huna siimi miidonii hiimi nunuka punko hokii nempa linto.

³ Niimpalukoda ngo nunuka punkoho apopa nyima jalo ngo yajiyallo ho dake, ho hiilamatrḛ dakoda, ngo ayakacho katii kuke

⁴ Attoh Jisu ka armyañ pa huna sitañ drih miida nii. Niida nunu dakuñ talyi, ho ngiika yajiyallo hii dabo doke, ngunu Attoh Jisu ka harchichike lo,

⁵ Nunu siika miyu mi saitan mike nembi kendo nii asiialyo mi miidu loke nendupa, niimpalukoda mohka yajiyallo mi lyangur kiine dupa Attoh Jisu ka allo ho.

⁶ Nunuka khansuniisi ayamake. Nunu chimapo ipo penyo pere hii hikha aphu mi lyigii du hiila?

⁷Aseto khu ipomi ho nunu niti aphu pa lyikiñ doke, nunu jije ipo miiyomanii hiilyañ kendo. Niimpalukoda Kristo, ngunuka impobiiniiñ dituñ ka subuñ, membi tiiku.

⁸Kiije ngunu, hopa, dituñ mi sosa, khu ipo lamapa, kanatana mapa miiniiñ ho diimmah ipo lamapa, hojalo jije ho lotii ka ipo miiyomanii yatañ lo.

⁹ Ngo nunumi kebii lyike ngiika pota ho ingyamiigya henju henii miyuatañ agiñho dabo lyayo hiila;

¹⁰ hikha siika dohadolo si helyihembyo henii hiila make, malo diibuñbo rorenii, malo puchiniimi ka heriinii, hiila koda nunu dohadolo hokii ago limpa dopa lyikiñdo.

¹¹ Hojalo ngo hiila yake kebii lyinii nunumi iche hetrḛ dabo yayo kone katrḛ agiñho huna anubarmii ke hiila lubiidola mo matiirḛ miigyala ingyamiigya henju hendo milo malo diibuñ, malo puchiniimi ka heriibo, nyapakoya bo, ow taniibo, malo rorebo-hiika agiñho diibo tiirḛ diibo yayo.

¹² Niimpalukoda ngo nii tola ago miyu atañmi halii dopa lyido? Si gyoliñkonii ura hoka dunii misu masu peha nunu halii kensu donii?

¹³ Pinii agomiyu dagii niimi halii du. “Diimmah miyu mi nunuka punko hokii mompato.”