Read Apatani 1 KORINTIA 6 Bible Online

1 KORINTIA 6 - Apatani bible

1 KORINTIA 6

¹ Niida nunuka punko hokii kone herugiichi anubarmii kone mi, mo ila kendo peha gondu luko dupa henjemanii miyu ko piniimiyu koya insa niimi?

²Nunu chimapo piniimiyu atañ dohadolo mi halii kendo hiila? ho dohadolo hii matiirḛ nunulo halii kokiñ dokoda, nunu atuama lugo mi lula siima ha ehna?

³Nunu chimapo ngunu miidopopi miilañmi halii kendo? Niimkane abu, siika sango ka piigo mi hentola!

⁴hokoda nunuko matiirḛ sitañ lugo dokoda, niimpa nunu hiimi atii bidu mohluka hataho humina gyoliñkonii hii khiima janii?

⁵Ngo siimi nunuka hiinyañ kiipa ke lubii lyinii. Hiila nyima nunuka punkoho hiimkane tiirḛ chila miyu huna anubarmii ka punko daka lugo mi lupya bidopa,

⁶hojalo anubarmii hii anubarmii mi chekho la dapo ko indo, ho hiika hiitiirḛ henjemanii atañka hataho ha?

⁷ Kone anyañ mi gondu lusu talyi miiniiñsi nunu atoh misu khiima lupa siido nii. Niimpa miikha sabyolo heruya henda siimapa? Niimpa talubalo koda siimapa?

⁸Hojalo nunu atohlya miikhado ho talubalodo, ho nunuka atoh anubarmii atañ tiirḛ.

⁹ Nunu chimapo ingyamiigyanii miyuatañ Pinii ka raddeganda mi peñko kema hiila? Talubalo koyo; ingyamiigya henju henii tiirḛ, puchiniimi ka herii botrḛ malo ipfyo nii hiitiirḛ, malo ahiñsiiniika ipfyo botrḛ,

¹⁰malo diipyonii, malo diibuñ, malo ow taniibo, malo cheriibo, malo rorebo hii Pinii ka raddeganda mi peñko kema.

¹¹ Ho sichuli ke nunu tonge. Hojalo nunu asekokunii, nunu darii miiko kunii, nunu lupya kokunii Attoh Jisu Kristo ka armyañ pa ho ngunuka Pinii ka Yajiyallo ho.

¹² “Kapane drih atañ ngiipa ayasiido,” hojalo kapane drih hii piigo agiidu hiilama. “Kapane drih atañ ngiipa aya siido,” hojalo ngo hang drih lo miira pa biiko tama.

¹³“Diigo si erre pake ho erre si diigo pake” ho Pinii anye rumi mudu lokiñdo kone ma ho konemiilañ mi. Apo si ingyamiigya henju kiipa make, hojalo Attoh kiipake, ho Attoh si apo pake.

¹⁴Ho Pinii Attoh mi seri tiiku ho ngunumitrḛ seri kendo mohka harchichike lo.

¹⁵ Nunu chimapo nunuka apo si Kristo ka hakhu ako hiila? Hokoda ngiimi Kristo ka hakhu mi biila hiimi pfyoari ka hakhupa miito hiila? Pema miitema!

¹⁶ Nunu chimapo huna pfyoari boka agiñho dobo donii hii mohka apo konepa lyita mondo ku hiila? Niimpalukoda, hiila ketola do, “Anye hii apo konepa lyikiñdo.”

¹⁷ Hojalo huna Attoh ko konepa lyido kunii yajiyallo konepa mo agiñho lyidoku.

¹⁸Helyihembyo mi apato. Kapane ingyamiigya miyuka miiniiñ hii apo ka ago hosu; hojalo helyihembyo henii miyu mohka atoh apo misu ingyamiigya siidanii.

¹⁹ Nunu chimapo nunuka apo hii Darii Yajiyallo ka piniiude hiila, nii mina nunu Pinii kokii larii tiinii? Nunu atoh kiisu kuma ke;

²⁰ nunumi arie bila riitii ku. Hopa nunuka apo lo Pinii mi assañ diilañto.