Read Apatani 2 KORINTIA 11 Bible Online

2 KORINTIA 11 - Apatani bible

2 KORINTIA 11

¹ Ngo hendo nunumi ngiika agiñho hembo monkingcho hiila ichuche ngiika piicha ko. Ngiimi hembo mompe!

² Ngo piniikariñ kachañ ho nunumi kariñdo, niimpalukoda ngo nunumi lumyo bitiiku Kristo pa nunumi darii mihie konepa hiila mohpa millo ako kontii pa.

³Hojalo ngo biisodo niihtañpa tabu Eve mi talubalo mohka piibilo, nunuka henju tiirḛ nunumi ngogii tama suyuha hiila siika denki ho darii Kristo mika heriinii kiiso hokii.

⁴ Niimpalukoda mi kone matiirḛ ahbiila ho ngunuka tonsḛrkhenyo nii hokii Koneya Jisu mi tonsḛrkhenyo dokoda, malo nunu matiirḛ koneya yajiyallo mi larii dokoda nunuka kone lakunii hokii, malo nunu matiirḛ ponsa ya aya puyu mi talii mondo koda nunuka talii kuniiñ hokii, nunu siimi talii tiiku khepa.

⁵ Ngo hendo ngo siika kayeya kiiniñkonii atañ hiilaka lusu boko hokii atu yama hiila.

⁶ Ngo lujuaya ho luchiñ masu jalo, ngo chiniiñ ho hiila make; kapane lembo ho ngunu nunumi taladopa lukoto kapane drih ho.

⁷ Ngo ingyamiigya la miitiipeha ehna ngo atohmi atu miisu lala ho nunu mika jotu niisi, niimpalukoda ngiika Pinii ka ayapuyu mi hang lujo lama paka luko koso?

⁸ Ngo khiibe gyoliñkonii atañmi rotii mohluka hembyuñ niimi larii biidola nunumi miiho dupa hiila.

⁹Ho ngiika nunuka agiñ hoka dalyiho ho anna lyiho, ngo kone mitrḛ alluabama, niimpalukoda ngiika annami Masedonia hoka anubarmii ahnii atañ bibyuñ tii. Hopa ngo nunumika alluaba saniiñ mi lapatii ho piijo dajalo lapatalyi kapane lembo hokii.

¹⁰ Kristo ka jije ngiiko giiniiñ hiilyañ, siika ngiika khanniiñ si pema khañngo kema Akaia daka gandaho.

¹¹ Ho niimpa? niimpalukoda ngo nunumi hema ehna? Pinii chindo ngo hendu hiila!

¹² Ho ngo nii miido miikañ ari miichi, niimpalukoda mohluka luniiñmi hiilama ludupa hutiina khansu nyada nii mohluka miigo miiko ngunuka miichañ ho mudu hiila.

¹³Niimpalukoda sitañ miyuatañ amuh kiiniñkonii atañ, gollunii miigomiiniiñ, atohmi Kristo ka kiiniñkonii hiila kachiñ mado paka miigii nyanii.

¹⁴Ho kahotamo tamapa, niimpalukoda saitan tiirḛ atohmi kachiñ komadopa miigiidu hutoh ka miidopopi kapupa.

¹⁵Hopa siikasi mutu make mohka miira atañ matiirḛ atohmi kachiñ koma dopa miigii niisi denki ka miira atañ kapu nyadopa. Mohluka kamikalo hii mohluka miiniiñ hiilyañ pake kapa kendonii.

¹⁶Ngo luti biilyi ke, kone tiirḛ ngiimi piicha hiila heyo; hojalo nunu matiirḛ henjalo, piicha hiila hembiidola ngiimi lariipe, niimpalukoda ngiimi tiirḛ iche khansu ladopa.

¹⁷ (Niina ngo ludonii ngo Attoh ka otority la lumake hojalo piicha pa lyilake, siika hiilasii hiilaka khansu koso;

¹⁸niihtañpa abuje dohadolo ka drih atañmi khansu biidu, ngo tiirḛ khansu talyi.)

¹⁹ Niimpalukoda nunu hempyo biidola piicha atañ agiñ hembo monda, nunu atoh piibi siido tiirḛ!

²⁰Niimpalukoda nunu pigii nyada miyuatañ nunumi miira pa miibii dojalo, malo nunupa gyoh pesu tiijalo, malo nunumi diimiñlumiñ biido jalo, malo kamikalo siido jalo, malo moru ho pita biidojalo.

²¹Ngiika hiinyañsi, ngo luchi loda, ngunu uro haja ajju doke siika atañpa! Hojalo niijalo kone abi henyada khansu dupa-ngo piicha hiilyañ pake lulyi nii-ngo tiirḛ khansu siila kendo hiipa.

²²Mohlu Hebrew peha? Ngo tiirḛ. Mohlu Isrel miyu peha? Ngo tiirḛ. Mohlu Abraham ka oho asi peha? Ngo tiirḛ hiila.

²³ Mohlu Kristo ka miira atañ peha? Ngo hiimi tiirḛ aya yanii-ngo runii miyu hiilyañ lulyi-uro yapa miigo miitii, abuyapa patii tunkotii, khiikha lama hikotii, ho shiipa miida dopa.

²⁴Rongohe ngo Jew atañka alah ho ahtii alyañpiilye mi lama yapa hidu luniiñmi hikotii.

²⁵ Rohiñhe ngo dachañlo hikotii; ronge yalañ kukotii. Rohiñhe yasie jaji tatula lyitii; ihe la lohe ngo siimie ho dotii;

²⁶ kiirañ myodi bokoso, kiiley atañka biisokacho hokii, diipyonii atañka biisokacho hokii, ngiika atoh miyu ka biisokacho hokii, Midomiyu atañka biisokacho hokii, citi ka biisokacho hokii, jabyo hoka biisokacho hokii, yasie siimie ka biisokacho hokii, amuh anubarmii atañ kokiika biisokacho hokii;

²⁷ apo khensula miigomiiko, abuje ayoh imi mapa, haya pibii dola hangḛr biidola, kiirañ diigo diipa mapa, lakhiiho abitarii giimapa.

²⁸Ho, khiibe drih atañ hokii apalala, hikha gyoliñkonii atañ paka kiirañ hena hii ngiimi khelii dota.

²⁹ Hu ajjudo, ho ngo ajju ma ehna? Humina huhi dopa miibii nenii, ho ngo hadiima ehna?

³⁰Ngo matiirḛ khansu talyi hendo koda, ngo hiika drih atañpa khansu talyi niihna ngiika ajju mi kakiñ donii.

³¹Pinii ho Attoh Jisu ka Aba, huna ayu dahepa lyankiñ donii, chindo ngo golluma hiila.

³² Damaskas ho, govonor Radde Aretas ka agiñ hoka dabonii Damaskas citi mi dagurbii ngiimi latu dupa hiila,

³³hojalo ngiimi yagii ho jolii lala ude ka ugo hopa jopa ling, ho mohka alah hokii hargii ku.