Read Apatani 2 KORINTIA 12 Bible Online

2 KORINTIA 12 - Apatani bible

2 KORINTIA 12

¹Ngo khansu talyi loda; hang hiiko hokii khaliñ biima jalo, hojalo ngo mihukakañ talyi ho Attoh ka mihukakiñnii atañmi.

²Ngo chindu miyu kone mi Kristo ko humina nyalyañ hela nyampe kapyo yaho hingenii dariiganda ho chagii nenii ahuapo pa ha malo ahuapo giima pa ha ngo chima, Pinii sii chinsu donii.

³Ho ngo chindo siika miyu mi Diilyañdiiloganda ho chagiine ahuapo pa ha malo ahuapo pamaha ngo chima, Pinii sii chinsu donii

⁴ ho mo tapatii drih atañmi nii mina luko lakiñmanii, rongkoda miyu hiimi ludii ma.

⁵Siika miyu kii dalyipa ngo khanko talyi, hojalo ngo ngiikii atohkii dalyipa ngo khansu tama, ngiika ajumi apa lala.

⁶Ngo matiirḛ khansu nando jalo, ngo piicha kemake, niimpalukoda ngo jije mi luchi. Hojalo ngo hiimi miima apa biilyi kuke, niimpalukoda kone mitrḛ abu yapa ngiimi hema dopa huna ngiimi mo kapa tiinii malo ngiiko hokii tapa tiinii.

⁷Ho ngiimi abuje mihukakiñnii hokii ka ano hempyo sanii hokii adho atii dupa, tare sohe ngiika ayah ho niitii, Saitan ka puyu bakobo, ngiimi henga henkha miipa dupa, ngiimi hempḛr hempyo hokii adho atii dupa.

⁸Rohiñhe ngo siika piigo sipa Attoh mi kuto, siika siimi ngiimi apa dokupa;

⁹hojalo mo ngiimi lutii, Ngiika aroh-aya hii niipa khe biikiñ doke, niimpalukoda ngiika harchichike hii digoabiaya giikiñ doke ajju hotiirḛ. Ngo uro yapa hempyo biidola khansu talyi ngiika ajju mi, niimpalukoda Kristo ka tamo hii ngiiko doha kendo.

¹⁰ Niimpalukoda Kristo kiipa, hokoda, ngo hembyañ biichi ajju hotiirḛ, hiinyañmiipanii, henkhiimilyiñ, miihimiire, ho hachesiire hotiirḛ; ngiika ajju lyiho, ho ngo alḛrdu.

¹¹ Ngo piicha pa lyito! nunu ngiimi cheche siimi lutii, niimpalukoda ngo nunulo assañ kokiñtii. Niimpalukoda ngo pema atu yala lyima siika khiiniiñ ya kiiniñkonii hiila ka lusu nyanii atañ kokii, ngo hang masu jalo.

¹²Jije kiiniñkonii atañ hiila ka kagiñnanii mi nunuka punkoho miikiñtii pigiibiidola, kagiñnanii la kahotamo ho kahe miigo atañ agiñho.

¹³ Niimpalukoda nii drih ho khiibe gyoliñkonii atañ hokii ponsa yane, hiila taliimonto ngo atohloda nunupa alluabapa lyite make? Hello kupe siika miigya niipa!

¹⁴Si ngo rohiñniipa nunuko ahdupa hendila du. Ho ngo alluaba giiniiñpa lyite masuke, niimpalukoda ngo niihna nunukiinii hiimi memake hojalo nunu misuke; niimpalukoda himme atañ annii-aba pa hiila atii tiikuñ make, hojalo annii-aba ke himme atañpa atii dunii.

¹⁵Ngo hempḛr hempyo biidola miipa talyi ho miipa talyi nunuka yallo atañpa. Ngo matiirḛ nunumi uropa hendo koda, ngo lamapa henko kendo peha?

¹⁶ Hojalo lulyike ngo nunumi alluaba giiniiñpa lyimake, ngo lyolyichochi hiila, nunu luda, ho nunumi amuh biidola haliitii.

¹⁷Hang ngo nunumi diimiñlumiñla miibii nepeha ngiika nunu koka kiiniñnii kone lojalo?

¹⁸ Ngo Taitas mi inge hiila yartii, ho anubarmii atañmi mo agiñho kiiniñtii. Taitas nunumi hang diimiñlumiñla miibii nepeha? Ngunu yajiyallo koneka miichañ ho miima peha? Ngunu ahiñpa miinya mapeha?

¹⁹Nunu hiila ha hendunii ngunu atohmi lupya siido nunuka hataho hiila? Siikasi Pinii ka kataho ngunu Kristo ko ludu, ho hikha rusi nunuka ayakiipa, ngiika anubarmii atañ.

²⁰ Niimpalukoda ngo biisodo ngo ahbiila nunumi ngiika heniiñ hiilyañ mapa kapa tama byopeha hiila, ho nunu ngiimi nunuka heniiñ hiilyañ mapa kapa tama byopeha; hiilakoda hiiko pasugasu dokiñdo, kariñsiiniiñ, hadii, chahi, nipasiiniiñ, biicho, hentiisiinii, ho luniiñtasumanii.

²¹Ngo biisodo niida ngo hiira ahchi ngiika Pinii ngiimi nunuka hataho chimie dopa miilyi do hiila, ho ngo abujepa heru kendo hutiina kapyo ho ingyamiigya la danenii ho hutiina henkur nyamanii miibḛrnii hokii, hensamanii heniiñ hokii, kachotanii nii mina mohlu miinyatiinii.