Read Apatani 2 KORINTIA 2 Bible Online

2 KORINTIA 2 - Apatani bible

2 KORINTIA 2

¹Niimpalukoda ngo ngiika ahha ho hiila hentii ku niiko ahbii takuma niimi hiira heru miipa dupa.

²Niimpalukoda ngo matiirḛ niimi herumiipa dokoda, hu du ngiimi hempyo miipa dupa hojalo kone humina ngo heru dopa miitiinii.

³Ho ngo ketii ngiika miiniiñ hiilyañ, niimpalukoda ngiika ahlyi ho ngo heruya miipa tama siiyuha huna ngiimi hempyo miipa dunii, niimpalukoda ngo henjedo hikha nunumi, ngiika hempyo hii hikha nunu miilañ ruka hempyo.

⁴Niimpalukoda ngo ano pamyotakho ho ahha heru biidola ho ano khebii dola ngo niimi keto, niimi heru miipa dupa hiila ma hojalo ngiika ano uro niipaka heniiñmi chinke nendupa hiila.

⁵Hojalo mi kone matiirḛ heru miipa tiikoda, mo ngiimi make, hojalo kakako (siimi ano uropa luliila luyo) nunu miilañ rumike.

⁶Niimpalukoda sichuli konemika taroyalloka diikhiiñ lukhiiñ nii khe doke;

⁷Hopa nunu hiilamapa mohmi hello ho hembyuñ toku, malo hiilamapa mo urohaja heru kiine diike.

⁸Hopa ngo nunumi yarlyi ke nunuka mohpaka hensu niimi hentitoku.

⁹Niimpalukoda siikasi hopa niihna ngo ketiinii, nunumi tenka dupa ho chindupa nunu kapane drih ho talii doha talii ma hiila.

¹⁰Hujalo humina nunu hello talyi nii, ngo tiirḛ hello talyi, Niimina ngo hello tiikunii, ngo matiirḛ hang drih mi hello tiiku koda, hiikahii nunu kiipa Kristo ka hataho,

¹¹Saitan mi ngunuko myodu lake nendiila hiila; niimpalukoda ngunu mohka henju atañmi chima miima.

¹² Ngo Troas ho Kristo ka ayapuyu mi tonsḛrkhenyo dupa ahchi biikele, lyego mi ngiipa miiko bine Attoh pa;

¹³hojalo ngiika ahha iche hetrḛ henga lamato niimpalukoda ngo ngiika anu Taitas mi hiiko kapa makopa. Hopa ngo mohlumi apa tekula ho Masedonia ho intiihe.

¹⁴Hojalo Pinii mi payapacho lulyi, huna kiirañ ngunumi Kristo kiilo pamiñ giidonii, ho ngunu kiilo mohmika chiniiñ ka riso mi kapakohe sutii kiine donii.

¹⁵Niimpalukoda ngunu Kristo ka narunempyo Pinii pa hiika atañ ko hutiina lyangur kola donya donii ho hiika atañ kotrḛ hutiina lyunya donii,

¹⁶konepa riso shiigo hokii shiigo lohe, kone yapa riso sango hokiila sango lohepa. Hu khe biido siika drih atañmi?

¹⁷Niimpalukoda ngunu hiilama, niihtañ abuje miinyada, Pinii aguñ mika kiiridudobo; hojalo lotii miyupa lyila, Pinii ka kiiniñkonii pa, Pinii ka kata ho ngunu Kristo pa ludu.