Read Apatani 2 KORINTIA 8 Bible Online

2 KORINTIA 8 - Apatani bible

2 KORINTIA 8

¹Ngunu nunumi chinke nenado, anubarmii atañ, Pinii ka aroh-aya piigo mi Masedonia gyoliñkonii atañ mika kakiñ niimi,

²niimpalukoda ano uropa pamyotakho agiilaka tenka lyiho hotiirḛ, mohluka ano hempyo ho hempḛr arro hotiirḛ hempa biidola bine mohluka bigo mi.

³ Niimpalukoda mohlu bitii mohlu niimkane bila kendo, ngo luko lakiñdo, ho hiimi tiirḛ abuyapa, mohlu atoh hembii siidola,

⁴ denki loda ngunumi myabii dola hembola piniimiyu atañ paka bibyuñ ko bibo monke nempe hiila

⁵ho siikasi, ngunuka bikiñcho hiila ka henko homa, hojalo kapyopa mohlu atoh Attoh mi bipyo lala ho ngunumi Pinii ka henko jaho.

⁶ Hiichulipa ngunu Taitas mi yartii no siimi miiri biitii, no hiira miipe giito mohluka punkoho siika khiiniiñ miigo siimi.

⁷Siisi no kapaneho aya yapa miido, henje ho, luniiñ ho, chiniiñho, hikha denki miigoho ho nunuka ngunu paka heniiñho-kato no siika khiiniiñ miigo sotrḛ aya yapa miito.

⁸Ngo siimi miitoloda hiila luma lyike, hojalo khiibemiyu mi denki mi kakiñ naniiñpa nunuka hensu niisi tiirḛ jije ke hiila.

⁹ Niimpalukoda no chindo Attoh Jisu ka aroh-aya mi, mo mingo siitii tiirḛ, hojalo ngunu kiipa mo aroh pa lyitii, mohka aroh kopa ngunumi mingo kiine dupa.

¹⁰ Ho siika piigoso ngiika Tonsḛrniiñ sike: siisi ke anoaya kendo nii nunupa biinya ka miigo miiri niimi miija dupa miiniiñ kontii mapa hojalo heniiñ mitrḛ,

¹¹Hopa nunuka siika heniiñ mika henju giiniimi ahiñ siila dopa nunuka miigo miija niilo nunuko hoka niijalo doniiñlo.

¹²Niimpalukoda henjuniiñ hii ho dokoda, hiika hiimi talii kendoke miyu ko niihna donii, mohko niihna nyimanii hiila mapa.

¹³Ngo hiila luma lyike khiibemiyu ka haju kiipa ho nunuka rengepehe pa,

¹⁴hojalo ahiñsiido pa lusu dokoda nunu koka abuje doniiñ hii siika myodu so mohluka anna mi bibyuñ kendo, hiichulipa mohluko abuje dolyi koho nunuka anna mitrḛ bibyuñ kodupa, hiikoho ahiñ siikiñ do.

¹⁵Hiila ketola do, “Huna abuje tiikuñ biidonii abuje dopama, ho huna lamapa tiikuñ biidonii hiikii henkhii ma.”

¹⁶Hojalo Pinii mi payapacho luto huna hiimkane denki nunumi kalyañkada dopa Taitas ka ahha ho bitii nii.

¹⁷Niimpalukoda mo ngunuka yarniiñ mi kontii taliima, hojalo mo atoh denkiloda nunuko mo ahchi hiila ahne mo atoh hensu biidola.

¹⁸ Mohka agiñho ngunu kiiniñ biilyi ke anu kone mi humina hikha gyoliñkonii atañ ho ano tapa la lyidonii mohka ayapuyu mika tonsḛrkhenyo niimi;

¹⁹ ho hii kontiima, hojalo mohmi kahetii gyoliñkonii atañ ngunu agiñho imbo niipa siika khiiniiñ miigo siimi miibo niipa ngunuka miila donii siimi, Attoh mika assañ naniipa ho ngunuka ayahenju mi kakiñ dupa.

²⁰Ngunu hendi biidola miidu kone lotrḛ pahañ halii koma dopa siika mibya laka ahmiñayiñ biniiñmi nii mina ngunu miigii donii,

²¹niimpalukoda ngunu miiniiñsi niihna ayadonii Attoh ka kata ho hiimi kontii mapa hojalo miyu ka kata hotiirḛ.

²²Ho mohluka agiñho ngunu kiiniñ biilyi ke ngunu anu mi humina ngunu kiirañ tenka tiikunii ho abuje piigo ho denki dopa kappatii, hojalo siisi ada uro yapa denki yado kapyo hokii mitrḛ niimpalukoda mohka nunu mika hentiñ ko hopa.

²³Taitas mi ludo koda, mo ngiika miigo miihiñ ahiñ ho nunu mika miiho ko miigo miihiñnii; ho ngunuka anubarmii ludo koda, mohlu puyu bakonii atañ gyoliñkonii atañ ho, Kristo mika assañ naniipa.

²⁴Hopa kakiñto, gyoliñkonii atañ ho hataho, nunuka hensu niimi ho ngunuka hentii niimi nunuka piigomi siika miyu atañmi.