Read Apatani GELESIA 6 Bible Online

GELESIA 6 - Apatani bible

GELESIA 6

¹Anubarmii atañ, miyu mi matiirḛ palle dopa latu lyimilo, nunu hutiina yajiyallo ho danii mohmi yajiyallo ka ahhakeyiñ lo lulyañ to. Atoh mitrḛ nunu kaka siito, hiilamakoda nunu tiirḛ tenka kodii ke.

²Kone anyañka alluaba baniiñ mi hembo siito, ho Kristo ka dapo mi miipeto.

³Niimpalukoda mi kone matiirḛ atohmi ngotiirḛ konesii hiila hensu dokoda, mo hang masu tiirḛ, mo atohmi talubalosiido.

⁴Hojalo kone abi atoh ka miigo miiniiñmi kaka siito, ho mo atohka hentii siido paka lyiniiñmi mohkosuke kapa siikiñ donii mohka ariapii komake.

⁵Niimpalukoda koneabi atohka hiigii mi basu kendo.

⁶Huna aguñmi tonsḛr kodonii hikha aya drih mi tachegiitote hiimi huna tonsḛr donii.

⁷Talubalo koyo; Pinii mi soku ngarkala miikiñma, niimpalukoda niijalo miyu lilo talyi, hiimi sii mo pikiñ siido nii.

⁸Mo huna mohka asiialyo lo litiinii asiialyo hokii ayamanii misu pikiñ siidonii; hojalo mo huna Yajiyallo lo lilo tiinii hii Yajiyallo hokii santḛrlamanii sango mi pikiñdo.

⁹Hopa kiije ngunu aya miigo miisa niimi renge masa, niimpalukoda myodu ahlyi ko ngunu pikiñ duku ke, ngunu matiirḛ ahha hame makoda.

¹⁰Hiiko hopa, ngunuko myodu aya dohoso, kiije ngunu hikha miyu atañpa aya miigo miisa, ho luchila hiika atañpa hutiina henje ka uru ahiñnii.

¹¹ Kato niimkane peroperopa ngo nunumi page biilyi ngiika atoh alah lo.

¹²Siikasi hiika atañpa hutiina aya hiila kakiñ nandonii asiialyoho ho hiika hii nunumi mitupipa kodopa lyigiida, ho niimpalukoda mohlumi miihimiire maya pa hiila Kristo ka dapo kiipa.

¹³Niimpalukoda hutiina mitupipa konya tiinii hiitiirḛ dapo mi atii biinyama, hojalo mohlu nunumi henyada nunumi mitupipa kodo koda hiila niimpalukoda mohlu nunuka asiialyoho assañ kodupa hiila.

¹⁴Hojalo ngo koda Jisu Kristo ka dapo mika assañ niimi sii talii siichinii, niilona[2] dohadolo mi ngiimi leda bitii kunii, ho ngo dohadolopa.

¹⁵Niimpalukoda hopa mitupipa koniiñmi hangpa khiima, malo mitupipakoma niimi, hojalo niti puliñnii.

¹⁶Chimie la aroh hii hikha hiika atañka agiñho dokiñ cho hutiina siika muju chuli indanii, Isrel ka Pinii hahoho.

¹⁷Siikahiiba sokii miyu kone hetrḛ ngiimi ahiare miipa yo; niimpalukoda ngo ngiika ahuapo ho Jisu ka miiho niimi giidu.

¹⁸Attoh Jisu Kristo ka aroh-aya hii nunuka yajiyallo agiñho dabo kencho, anubarmii atañ. Amen.