Read Apatani IPISIA 5 Bible Online

IPISIA 5 - Apatani bible

IPISIA 5

¹Hopa Pinii mi katiñnanto, heniiñja himme atañ hiilyañ.

²Ho hensu niiho into, Kristo ka ngunumika henchañho ho atohmi ngunupa bipa siitii, narunempyo binii ho Pinii mi membila.

³Hojalo datuapu ho hikha miibḛrnii malo hemikaminii atañmi nunuka punkoho armyañ tiirḛ myampa siilyayo, piniimiyu pa sike ayadonii.

⁴Hiiko kachotanii mi dokeneyo, malo hulumale lusubensu niimi, malo khiisumaniiñ mi, niihna adiñ momanii; hojalo hiiko payapacho luniiñ miya doke nento.

⁵Siika siimi henje nyatolya, datuapu malo miibḛrnii miyu, malo kone huna hemikamidonii (hiikahii, puchiniimi ka heriibo), hiipa hang pensikosanii nyima Kristo la Pinii ka raddeganda ho.

⁶Kone lotrḛ talubalo koyo gollumisu aguñlo, niimpalukoda siikasi siika drih atañ pake Pinii ka hempḛr hadii hii ahtiinii luniiñtamanii oho atañko.

⁷Hopa mohluka agiñho dabo molya yo,

⁸niimpalukoda ronge nunu kamo ho dane, hojalo siisi nunu Attoh ko hutoh hoke danii; hutoh ka himme atañ hiilyañ into

⁹(niimpalukoda hutoh ka ahee mi hikha aya ho miidiko ho jije hoke kapa donii),

¹⁰ho niihna Attoh mi hempyo miipa donii hiimi chindupa miika tolya.

¹¹Hang aheehiliñ giimanii kamo hoka miigo ho miibo lyayo, hojalo hiika atañmi kapadopa ya miitolya.

¹²Niimpalukoda siikasi hiinyañdo ludu lupa tiirḛ mohluka miisilaka miiniiñ atañmi;

¹³hojalo niida kakiñ talyi nii mijalo hutoh ho hiikahii kadḛr kendoke, niimpalukoda nii mijalo kadḛr dopa miichi hiiko hutoh hii giido.

¹⁴Hopa siikasi lutii, “Huronyato, Imilaka donii, ho turi nyatoku shiinii hokii, ho Kristo nunumi hutoh bikiñ doke.”

¹⁵Hendi nyatolya hokoda niihtañpa nunu indu, chimanii miyu hiilyañ mapa hojalo chila hiilyañ,

¹⁶ myodumyolo mi miidiko miibiitolya, niimpalukoda allo atañsi diimmah doke.

¹⁷Hopa piichapa lyilya yo, hojalo chintolya niihna Attoh ka henju jahii.

¹⁸Ho ow tangii tola dalya yo, niimpalukoda hiikahii byagii kendoke; hojalo Yajiyallo miya poteje giitolya,

¹⁹ Kone anyañmi assañbiisie ho bariebiisie ho yajiyallo ka biisie siko siitolya, sibiidola ho tapyopa miibiidola Attohpa hikha nunuka ahha lo,

²⁰kiirañ ho kapane drihpa payapacho luto Attoh Jisu Kristo ka armyañ pa Pinii Aba mi.

²¹Kone anyañmi tiilii siitolya Kristo mi khiibii dola.

²² Mihie atañ, millo atañ ko tiilii siito, Attoh mika tiilii tiichañ ho.

²³Niimpalukoda millo hii mihie ka atoh ke niihtañpa Kristo gyoliñkonii ka atoh, mohka apo, ho mo atohloda hiimika Lyangurbo.

²⁴Niitañpa gyoliñkonii Kristo ko tiiliisiidu, hopa mihie atañ tiirḛ tiilii siito kapane drih mi atoh ka millo atañ ko.

²⁵Millo atañ, nunuka mihie atañmi hento, niihtañpa Kristo gyoliñkonii mi hendu ho atohmi mohlupa hempa siibitii,

²⁶niimpalukoda mo mohlumi darii miidupa hiila, mohlumi asedupa hiila yasie loka ase sechañho aguñlo,

²⁷niimpalukoda mo gyoliñkonii mi atohmi bisudupa hiila kapyo, hang pahañhansa malo siikuñsiiri giimapa malo hiitañ hang drih, niimpalukoda mohmi darii ho hang ayamanii kapamadopa.

²⁸Hiichulipa millo atañ tiirḛ hento nunuka mihie atañmi atoh apo mika henchañho. Huna atoh mihie mi hendonii atoh mi hensu do.

²⁹Niimpalukoda miyu kone hetrḛ atoh apo mi kana siimapa miima, hojalo miilyañsiila ho kalyañkada siidu hiimi, niihtañpa Kristo gyoliñkonii mi miidu,

³⁰niimpalukoda ngunu apo koneka uru ahiñ.

³¹“Siika piigopa milobo atoh aba mi apatela ho annii mi ho mohka mihie agiñho dubo mondu, ho anye hii asiialyo konepa lyidu.”

³²Siika michilamaniisi khiiniiñ koneke, ho ngo hiila lulyi siikasi Kristo la gyoliñkonii mike luko donii;

³³hojalopa, koneabi nunu atohka mihie mi hento atoh mika hensu henchañho, ho mihie hii kaka siitolya no atoh millo mi khiisu doha hiila.